फोटो सौजन्य सोशल मीडिया
सिंचनासाठी शेतकऱ्यांना प्रत्येक आवर्तनाची प्रतीक्षा करावी लागत असताना कालव्यातून वाहून जाणारे पाणी रोखण्यासाठी पाटबंधारे विभागाकडून ठोस उपाययोजना का केल्या जात नाहीत, असा सवाल शेतकरी आणि नागरिक उपस्थित करत आहेत.
धोम उजव्या कालव्यात पाणी सोडल्यानंतर अनेक ठिकाणी नादुरुस्त दारे आणि फुटलेल्या फाट्यांमधून पाण्याची गळती होत असल्याचे निदर्शनास येत आहे. सिंचनासाठी शेतकऱ्यांना सोडण्यात येणाऱ्या पाण्याचा काही भाग अशा प्रकारे वाया जात आहे.
कालव्याच्या माध्यमातून शेतीपर्यंत पाणी पोहोचवण्याचे नियोजन केले जात असताना सुरुवातीलाच होणारा हा अपव्यय चिंतेचा विषय ठरत आहे. पाणी सोडण्यापूर्वी कालव्यावरील दारे आणि फाट्यांची तपासणी केली जाते का, गळती आढळल्यानंतर त्याची नोंद घेतली जाते का, असे प्रश्न उपस्थित होत आहेत.
पिंपरी-चिंचवडकरांची प्रतीक्षा संपणार! मार्चपासून भामा-आसखेडचे 167 एमएलडी पाणी मिळणार
कालव्याची देखभाल, दुरुस्ती आणि पाणीवाटपाचे नियोजन करण्याची जबाबदारी पाटबंधारे विभागाची आहे. पाणीटंचाईच्या काळात नागरिकांना काटकसरीने पाणी वापरण्याचे आवाहन केले जाते. शेतकऱ्यांनाही उपलब्ध पाण्याचा जपून वापर करण्याचे निर्बंध पाळावे लागतात.
मात्र, दुसरीकडे विभागाच्या अखत्यारीतील कालव्यातूनच पाणी वाया जात असल्याने प्रशासनाच्या कार्यपद्धतीवर प्रश्न उपस्थित होत आहेत. कालव्याची नियमित पाहणी करण्याची जबाबदारी असलेल्या कर्मचाऱ्यांकडून प्रत्यक्षात किती वेळा तपासणी केली जाते, गळतीच्या तक्रारींकडे किती गांभीर्याने पाहिले जाते आणि दुरुस्तीला विलंब का होतो, याची उत्तरे मिळणे आवश्यक आहे.
धोम उजव्या कालव्यातील पाण्याचा अपव्यय रोखण्यासाठी वरिष्ठ अधिकाऱ्यांनी तातडीने लक्ष घालावे, अशी मागणी शेतकरी आणि नागरिकांकडून होत आहे. गळती होत असलेल्या ठिकाणांची प्रत्यक्ष पाहणी करून नादुरुस्त दारे आणि फुटलेल्या फाट्यांची तातडीने दुरुस्ती करावी, अशी अपेक्षा व्यक्त केली जात आहे.
तसेच प्रत्येक आवर्तनापूर्वी आणि पाणी सुरू असताना कालव्याची नियमित तपासणी करण्याची व्यवस्था करावी, अशीही मागणी आहे. देखभाल आणि दुरुस्तीच्या कामात हलगर्जीपणा झाला आहे का, याची वरिष्ठ स्तरावर चौकशी व्हावी, असे नागरिकांचे म्हणणे आहे. पाण्याचा प्रत्येक थेंब महत्त्वाचा असताना कालव्यातून होणारी गळती थांबवून उपलब्ध पाण्याचा योग्य वापर होणे गरजेचे आहे.






