‘… तर राजीनामा देऊन जाऊ शकता’; महाराष्ट्राचे ‘सिंघम’ Tukaram Mundhe यांचा ‘त्या’ कर्मचाऱ्यांना थेट इशारा

छत्रपती संभाजीनगर येथील प्रयोगशाळेतील 29 कर्मचाऱ्यांनी आयुक्त तुकाराम मुंढे यांच्या कार्यपद्धतीविरोधात अन्न व औषध प्रशासन मंत्री नरहरी झिरवळ यांच्याकडे तक्रार केली होती.

• राज्यभरात एफडीएची भेसळखोरांवर कारवाई 
• तुकाराम मुंढे आहेत एफडीएचे आयुक्त 
• 29 कर्मचाऱ्यांनी केली होती मुंढेंविरुद्ध तक्रार 

Tukaram Mundhe Warn To 29 Officers: सध्या महाराष्ट्रात एफडीए करत असलेल्या कारवायांची चर्चा मोठ्या प्रमाणात होत आहे. भेसळखोरांवर मोठ्या प्रमाणात कारवाई केली जात आहे. एफडीएचे आयुक्त तुकाराम मुंढे यांच्या नेतृत्वात या कारवाया केल्या जात आहेत. तुकाराम मुंढे शिस्तबद्ध आणि नियमानुसार काम करण्यासाठी ओळखले जातात. दरम्यान सध्या ते अन् व औषध विभगाचे आयुक्त आहेत. त्यांनी आपल्या एफडीएच्या कर्मचाऱ्यांना कठोर इशारा दिल्याचे समजते आहे.

महाराष्ट्रातील आपल्या कडक आणि शिस्तप्रिय कार्यशैलीसाठी ओळखले जाणारे ज्येष्ठ आयएएस अधिकारी तुकाराम मुंढे पुन्हा एकदा आपल्या आक्रमक भूमिकेमुळे चर्चेत आले आहेत. पदभार स्वीकारल्यापासून अन्न भेसळ आणि नियमबाह्य कारभाराविरोधात धडक कारवायांचा बडगा उगारणाऱ्या तुकाराम मुंढेंनी आता विभागातील कर्मचाऱ्यांच्या तक्रारींवर कडक शब्दांत प्रत्युत्तर दिले आहे.

प्रकरण काय? 

छत्रपती संभाजीनगर येथील प्रयोगशाळेतील 29 कर्मचाऱ्यांनी आयुक्त तुकाराम मुंढे यांच्या कार्यपद्धतीविरोधात अन्न व औषध प्रशासन मंत्री नरहरी झिरवळ यांच्याकडे तक्रार केली होती. लॅबचे कामकाज अचानक दोन शिफ्टमध्ये सुरू करण्यात आल्यामुळे सकाळी ९ वाजल्यापासून रात्री उशिरापर्यंत काम करावे लागत आहे.शनिवार, रविवार आणि शासकीय सुट्ट्यांच्या दिवशीही कामावर उपस्थित राहण्याचे आदेश दिले जात आहेत. अपुऱ्या मनुष्यबळात कामाचा अतिरिक्त ताण दिला जात असून, प्रलंबित नमुने वेगाने निकाली काढण्यासाठी दबाव टाकला जात असल्याची तक्रार कर्मचाऱ्यांनी मंत्री नरहरी झिरवळ यांच्याकडे केली होती.

दुधासह ब्रँडेड पनीरला वाढती पसंती, FDA च्या धडक कारवाईचा परिणाम; हॉटेलांमध्येही शुद्ध पनीरलाच मागणी

तुकाराम मुंढे यांची प्रतिक्रिया काय?

छत्रपती संभाजीनगरच्या प्रयोगशाळेतील 29 कर्मचाऱ्यांनी मुंढे यांच्याविरुद्ध तक्रार केली होती. यावर आता मुंढे यांनी आपली प्रतिक्रिया दिली आहे. अन्न व औषध चाचणी प्रयोगशाळा ही कोणतीही साधी सरकारी कचेरी नसून, ती जनतेच्या आरोग्याशी थेट जोडलेली २४ तास कार्यरत राहणारी आणीबाणीची यंत्रणा आहे. 10 ते 6 असे ऑफिसचे टायमिंग लॅबमध्ये दिले जाऊ शकत नाही. लॅबची सेवा 24 तास चालणारी सेवा असते. म्हणजे यांच्या कर्मचाऱ्यांनी 24 तास काम केले पाहिजे असा यायचा अर्थ होत नाही.

Tukaram Munde News: तुकाराम मुंढे यांना पालक सचिवपदावरून तडकाफडकी का हटवले?

आपण शिफ्टमध्ये काम करतो. आठवड्याला 48 तासांपेक्षा कोणाला जास्त काम दिले जात नाही. तसेच एक दिवस सार्वजनिक सुट्टी देखील दिली जाते. आता आपण दोन शिफ्टमध्ये 6 दिवस काम सुरू केले आहे. आवश्यकता पडल्यास 24 तास सेवा सुरू करावी लागेल. त्यामुळे काही गैरसमज झाला असेल तर तो दूर करण्यात येईल. आता त्या ठिकाणी व्यवस्थित काम सुरू आहे. ज्यांना शासन नियमानुसार काम करायचे नाही ते राजीनामा देऊन निघून जाऊ शकतात.