‘तू काय पालिकेचा मालक आहेस का?’; माजी आरोग्य निरीक्षकांची साताऱ्यात बाचाबाची

सातारा पालिका आणि तेथील मलईदार टेंडर याची संपूर्ण जिल्ह्यात नेहमी चविष्ट चर्चा असते. बांधकाम विभाग बिलो टेंडर आणि ॲबॉव्ह टेंडरचा पद्धतशीर खेळ करून मर्जीतल्या ठेकेदाराला ते काम मिळून देण्यामध्ये पटाईत आहे.

सातारा : सातारा नगरपालिकेच्या दोन माजी आरोग्य निरीक्षकांची सातारा शहरातील एका उड्डाणपुलाखाली आर्थिक कारणावरून जोरदार शाब्दिक बाचाबाची झाल्याची घटना समोर आली आहे. या प्रकरणाचा व्हिडिओ प्रसार माध्यमांच्या हाती लागल्याने पालिकेतले चिरीमिरीचे राजकारण पुन्हा एकदा समोर आले आहे.

सातारा पालिका आणि तेथील मलईदार टेंडर याची संपूर्ण जिल्ह्यात नेहमी चविष्ट चर्चा असते. बांधकाम विभाग बिलो टेंडर आणि ॲबॉव्ह टेंडरचा पद्धतशीर खेळ करून मर्जीतल्या ठेकेदाराला ते काम मिळून देण्यामध्ये पटाईत आहे. सातारा नगरपालिकेचे दोन माजी आरोग्य अधिकारी अशाच काहीशा आर्थिक कारणावरून बॉम्बे रेस्टॉरंट चौकातील उड्डाणपुलाखाली तंटत असल्याचे दिसून आले. या भांडणाला नगरपालिकेचे विद्यमान आरोग्य अधिकारी साक्षीदार होते. विषय होता काही जुन्या देण्याघेण्याचा जो साताऱ्यातून मिळणार होता.

हेदेखील वाचा : चिनी नागरिकाच्या संपर्कात राहून आखला फसवणुकीचा प्लान; पुण्यातील चित्रपट निर्मात्याला पोलिसांनी ठोेकल्या बेड्या

दरम्यान, दोन्ही आरोग्य निरीक्षक सातारा जिल्ह्यातील दोन वेगवेगळ्या नगरपालिकेमध्ये बदलून गेले आहेत. दोन्ही आरोग्य निरीक्षक साताऱ्यात राहण्यासाठी असून अजूनही त्यांचे लागेबांधे सातारा नगरपालिकेशी आहेत.

तू काय पालिकेचा मालक आहेस का?

नव्या जोशाचा आरोग्य निरीक्षक एकेकाळी व्यवस्थापनाच्या गळ्यातील ताईत होता, तर दुसऱ्या आरोग्य निरीक्षकाच्या कामाचा प्रकाश फारसा न पडल्याने तो आरोग्य निरीक्षक प्रशासक अभिजीत बापट यांच्या गुड बुकमध्ये कधीच नव्हता. अशा दोन आरोग्य निरीक्षकांची हमरातुमरी काही जणांनी गोपनीयरीत्या चित्रित केली. ही हमरातुमरी आर्थिक देवाणघेवाणीच्या संदर्भातील होती. आता ही कोणत्या हिशोबाची देवाण-घेवाण होती हे मात्र समजले नाही. मात्र, तू इतका शहाणा झालास का?, तू काय पालिकेचा मालक आहेस का? अशा भाषेमध्ये दोन्ही आरोग्य निरीक्षकांनी एकमेकांचे वाभाडे काढले.

आरोग्य विभागाची पुन्हा एकदा चर्चा

एकूणच या प्रकारामुळे सातारा पालिकेच्या आरोग्य विभागाची पुन्हा एकदा चर्चा सुरू झाली आहे. सातारा पालिकेत १३ टक्क्याचे राजकारण चालते, असे म्हटले जात होते. कोणत्याही ठेकेदाराला विचारले असता टेंडर मिळताना बरीच भागवाभागवी करावी लागते, असे ठेकेदार वैतागून सांगतात. त्यामध्ये आरोग्य विभाग ही येतो.

हेदेखील वाचा : Shrikant Shinde in Parliament : लोकसभेमध्ये 50 खोकेंच्या घोषणा; श्रीकांत शिंदे म्हणाले, “ही महापालिका नाही तर संसद…