फोटो सौजन्य सोशल मीडिया
जागेचा ताबा आणि मोजणीची प्रक्रिया रखडल्याने हा प्रश्न सुटत नसल्याचा आरोप रोहित वाडकर यांनी केला आहे. जिल्हा परिषद प्रशासन राजकीय दबावाखाली काम करत असल्याचा आरोप करत त्यांनी दसऱ्यापर्यंत ठोस कार्यवाही न झाल्यास नागरिकांसह आमरण उपोषण करण्याचा इशारा दिला आहे.
मालतपूर प्राथमिक आरोग्य केंद्र हे वाई तालुक्याच्या पश्चिम भागातील नागरिकांसाठी महत्त्वाचे आरोग्य केंद्र आहे. मात्र, सध्या गावच्या चावडीवरील अवघ्या दोन खोल्यांमध्ये हे केंद्र सुरू आहे. वाढती गरज लक्षात घेता केंद्राला स्वतंत्र आणि सुसज्ज इमारत मिळणे आवश्यक आहे.
त्यासाठी सातत्याने पाठपुरावा करूनही प्रशासनाकडून ठोस निर्णय घेतला जात नसल्याची खंत रोहित वाडकर यांनी व्यक्त केली. ग्रामीण भागातील नागरिकांच्या आरोग्याशी संबंधित प्रश्न अनेक वर्षे प्रलंबित राहणे दुर्दैवी असल्याचेही त्यांनी म्हटले आहे.
मालतपूर येथील सर्व्हे क्रमांक ८७/३५ मधील जागेचा प्रश्न या संपूर्ण प्रकरणाच्या केंद्रस्थानी आहे. ही जागा जिल्हा परिषदेच्या मुख्य कार्यकारी अधिकारी यांच्या नावावर असल्याचे सांगण्यात येत असले, तरी प्रत्यक्ष ताबा मिळण्याची प्रक्रिया पूर्ण झालेली नाही. जागेच्या मोजणीसाठी आरोग्य विभागाने ३ जुलै रोजी महसूल विभागाला पत्र दिले होते.
मात्र, त्यानंतरही अपेक्षित कार्यवाही झाली नसल्याचा आरोप वाडकर यांनी केला. जागेची मोजणी कधी होणार, ताबा कधी मिळणार आणि इमारतीच्या उभारणीची प्रक्रिया कधी सुरू होणार, याबाबत प्रशासनाने स्पष्ट कालमर्यादा जाहीर करावी, अशी मागणी त्यांनी केली आहे.
जिल्हा परिषद मुख्य कार्यकारी अधिकारी यशनी नागराजन यांच्या कार्यपद्धतीवरही रोहित वाडकर यांनी प्रश्न उपस्थित केले आहेत. अधिकारी आणि तालुका आरोग्य विभागावर राजकीय दबाव आणला जात असल्याने कामात अडथळे निर्माण होत असल्याचा त्यांचा आरोप आहे.
यापूर्वी या प्रश्नावरून परस्परांवर टीका करणारे मकरंद आबा आणि दिनकर शिंदे आता एकत्र असूनही आरोग्य केंद्राचा प्रश्न सुटलेला नाही, अशी टीकाही त्यांनी केली. प्रशासनाने केवळ आश्वासने न देता प्रत्यक्ष कामाला सुरुवात करावी, अशी त्यांची मागणी आहे. दसऱ्यापर्यंत ठोस निर्णय आणि कार्यवाही झाली नाही, तर पश्चिम भागातील नागरिकांना सोबत घेऊन आमरण उपोषण सुरू करण्याचा इशारा वाडकर यांनी दिला आहे.
.png "Videos"){kind=small}
