हिंगोलीत हिवाळ्यातच पाणीटंचाईची चाहूल; भूजल पातळीत 2.23 मीटरने झाली घट

आगामी काळात पिण्याच्या पाण्याची मागणी वाढल्यास गावनिहाय परिस्थितीचा आढावा घेऊन उपाययोजना राबविण्याचे नियोजन आहे. वेळेत दुरुस्तीची कामे पूर्ण करणे, पर्यायी पाणीस्स्रोत उपलब्ध करणे आणि गरज भासल्यास टँकरद्वारे पाणीपुरवठा करणे, या उपायांवर भर दिला जाणार आहे.

• दुरुस्तीपासून टँकरपर्यंत विविध उपाययोजना
• पाण्याचा काटकसरीने वापर करण्याचे नियोजन
• पाणीटंचाईचे संकट गडद होण्याची चिन्हे

हिंगोली : पावसाळा संपताच जिल्ह्यात पाणीटंचाईचे संकट गडद होण्याची चिन्हे दिसू लागली आहेत. भूजल पातळीत सप्टेंबर महिन्यातच २.२३ मीटरने घट झाल्याने आगामी काळात ग्रामीण भागातील पाणीपुरवठ्याचा प्रश्न गंभीर होण्याची शक्यता आहे. संभाव्य पाणीटंचाईचा सामना करण्यासाठी जिल्हा प्रशासनाने आतापासूनच तयारी सुरू केली असून, विविध उपाययोजनांसाठी ९ कोटी ४८ लाख रुपयांचा कृती आराखडा तयार केला आहे.

पावसाळा संपल्यानंतर लगेचच काही गावांमध्ये पिण्याच्या पाण्याची समस्या निर्माण होऊ लागली आहे. विहिरी आणि विंधन विहिरींची पाणीपातळी खालावत असल्याने ग्रामीण भागातील नागरिकांना पाण्यासाठी भटकंती करावी लागत आहे. ऑक्टोबर महिन्यातच टंचाईची चाहूल लागल्याने आगामी उन्हाळ्यात परिस्थिती अधिक बिकट होण्याची शक्यता व्यक्त केली जात आहे. पाणीटंचाईची तीव्रता वाढण्यापूर्वीच आवश्यक उपाययोजना करण्यावर प्रशासनाने भर दिला आहे.

दुरुस्तीपासून टँकरपर्यंत विविध उपाययोजना

टंचाईग्रस्त गावांमध्ये परिस्थितीनुसार विविध कामे केली जाणार आहेत. बंद किंवा बिघाड झालेल्या नळपाणीपुरवठा योजनांची दुरुस्ती, पूरक पाणीपुरवठा योजनांची अंमलबजावणी, नवीन विंधन विहिरी घेणे, अस्तित्वातील विहिरींचे खोलीकरण आणि खासगी विहिरींचे अधिग्रहण यांचा आराखड्यात समावेश आहे. ज्या गावांमध्ये अन्य पर्यायांद्वारे पाणीपुरवठा करणे शक्य होणार नाही, तेथे टँकरचा पर्याय वापरण्यात येणार आहे.

कल्याण-डोंबिवलीत भाजप-मनसेमध्ये पुन्हा वादाची ठिणगी; शशिकांत कांबळे यांचे केडीएमसी आयुक्तांना पत्र

पाण्याचा काटकसरीने वापर करण्याचे नियोजन

उपलब्ध प्रकल्प आणि तलावांमधील पाणी पिण्यासाठी राखून ठेवण्यासह पाण्याचा काटकसरीने वापर करण्याचे नियोजन केले जात आहे. त्याचबरोबर ज्या गावांमध्ये पाणीपुरवठा योजनांमध्ये बिघाड आहे किंवा पर्यायी पाणीस्रोतांची गरज आहे, अशा ठिकाणी आवश्यक कामे हाती घेण्याची तयारी करण्यात आली आहे. आगामी काळात पिण्याच्या पाण्याची मागणी वाढल्यास गावनिहाय परिस्थितीचा आढावा घेऊन उपाययोजना राबविण्याचे नियोजन आहे. वेळेत दुरुस्तीची कामे पूर्ण करणे, पर्यायी पाणीस्स्रोत उपलब्ध करणे आणि गरज भासल्यास टँकरद्वारे पाणीपुरवठा करणे, या उपायांवर भर दिला जाणार आहे.

FAQ

हिंगोली जिल्ह्यात पाणीटंचाईचे संकट का निर्माण होत आहे?
– पावसाळा संपल्यानंतर भूजल पातळीत घट होत असल्याने आगामी काळात ग्रामीण भागात पाणीटंचाईची शक्यता वाढली आहे.

सप्टेंबर महिन्यात भूजल पातळीत किती घट झाली?
– सप्टेंबर महिन्यात जिल्ह्यातील भूजल पातळीत २.२३ मीटरने घट झाली आहे.

पाणीटंचाईचा सर्वाधिक परिणाम कुठे होण्याची शक्यता आहे?
– ग्रामीण भागातील पाणीपुरवठ्यावर पाणीटंचाईचा गंभीर परिणाम होण्याची शक्यता आहे.