‘मी कधी मुलगी अन् पुतण्या भेदभाव केला नाही, सत्ताधारी पदे तर….’ शरद पवार यांचे आरोपांवर स्पष्टीकरण

सुप्रिया सुळे व अजित पवार यांच्यामध्ये कधीच भेदभाव केला नाही. सत्तेची पदे नेहमी अजित पवार यांना दिली असे मत शरद पवार यांनी व्यक्त केले आहे.

मुंबई : अजित पवार यांनी राष्ट्रवादीमध्ये बंड पुकारत भाजपसोबत युती केली. यानंतर शरद पवार यांच्याकडून भेदभाव होत असून आपण त्यांचा मुलगा नाही म्हणून आपल्या पक्ष दिला नाही असा आरोप अजित पवार करत आले आहेत. त्यामुळे अजित पवार व सुप्रिया सुळे यांच्यामध्ये शरद पवार हे मतभेद करत असल्याचा आरोप केला जात आहे. त्यावर आता एका मुलाखतीमध्ये शरद पवार यांनी स्पष्टीकरण दिले आहे. सुप्रिया सुळे व अजित पवार यांच्यामध्ये कधीच भेदभाव केला नाही. सत्तेची पदे नेहमी अजित पवार यांना दिली असे मत शरद पवार यांनी व्यक्त केले आहे.

अजित पवार यांच्याबाबत भेदभाव करत असलेल्या आरोपांवर शरद पवार म्हणाले, मी सुप्रिया सुळे आणि अजित पवार यांच्याबाबत कधीही मुलगी-पुतण्या असा भेद केला नाही. सुप्रिया सुळे आतापर्यंत दिल्लीच्या राजकारणातच आहेत. त्यांना कधीही सत्तापद देण्यात आले नाही. याउलट अजित पवार यांना कायमच सत्तापदे देण्यात आली. अजित पवार यांना राज्यमंत्रीपदापासून अनेक कॅबिनेट मंत्रीपदे, महत्त्वाची खाती, तीनवेळा उपमुख्यमंत्रीपद, विधिमंडळातील गटनेतेपद, विधानसभेतील विरोधी पक्षनेतेपद हे सर्वकाही देण्यात आले. सुप्रिया सुळे यांना फक्त खासदारकी दिली असून त्या दिल्लीच्या राजकारणात आहेत. सुप्रिया यांना कधीही सत्तापद देण्यात आले नाही, असे स्पष्ट मत शरद पवार यांनी व्यक्त केले आणि अजित पवार यांच्या आरोपांचे खंडन केले.

पाहिजे तर तुम्ही जा, मी येणार नाही

भाजपसोबत युती करण्यामागे विकासकामे हे कारण अजित पवार गटाकडून सांगण्यात येते. शरद पवार यांनी यावर देखील प्रत्युत्तर दिले आहे. शरद पवार म्हणाले, “सत्तेत असल्याशिवाय जनतेची कामे करता येत नाहीत, दाव्यात तथ्य नाही. विरोधी पक्षनेत्याचे पद आणि विरोधी पक्षही लोकशाहीत कायम महत्त्वाचा असतो. माझ्या 56 वर्षांच्या कारकीर्दीत मी केवळ 20 वर्षे सत्तेत होतो. उर्वरित काळ मी विरोध पक्षात घालवला. एस.एम. जोशी, कृष्णराव धुळप, जॉर्ज फर्नांडिस यांच्यासारख्या नेत्यांनी विरोधी पक्षात राहून आपले स्थान निर्माण केले. बॅरिस्टर पै नाथ बोलायला उभे राहिल्यानंतर तत्कालीन पंतप्रधान पंडित नेहरुही थांबून त्यांचे भाषण ऐकायचे. परंतु, राष्ट्रवादीचे काही नेते सत्तेविना राहू शकत नव्हते. त्यांनी पाच वर्षे विरोधात काढली होती. या मंडळींना भाजपसोबत जाण्याची घाई झाली होती. पण मी त्यांना सांगितले होते की, पाहिजे तर तुम्ही जा, मी येणार नाही.” असे उत्तर शरद पवार यांनी दिले.