Karjat News : पंतप्रधान मोदींच्या कर्जत दौऱ्याची चर्चा; संभाव्य कार्यक्रमासाठी रस्त्यांच्या डांबरीकरणाला वेग

Karjat News : पंतप्रधान नरेंद्र मोदी यांच्या संभाव्य कर्जत दौऱ्याच्या पार्श्वभूमीवर रस्त्यांचे डांबरीकरण आणि हेलिपॅड उभारणीची कामे सुरू झाली आहेत. टोरंट कंपनीच्या प्रस्तावित प्रकल्पाच्या भूमिपूजनासाठी पुलाची वाडी आणि लाखाची वाडी परिसराची चर्चा आहे. मात्र दौऱ्याबाबत अधिकृत स्पष्टता नसल्याने स्थानिकांमध्ये प्रश्न उपस्थित होत आहेत.

• भूमिपूजनासाठी पुलाची वाडी, लाखाची वाडी चर्चेत
• संभाव्य मार्गावरील रस्त्यांची कामे युद्धपातळीवर
• शेतकऱ्यांचा विरोध आणि दौऱ्याच्या निश्चिततेवर प्रश्न

Karjat News : कर्जत तालुक्यात पंतप्रधान नरेंद्र मोदी यांच्या संभाव्य दौऱ्याची चर्चा सुरू झाली असून, प्रशासनाकडून तयारीला वेग आल्याचे चित्र आहे. टोरंट कंपनीच्या प्रस्तावित हायड्रॉलिक प्रकल्पाच्या भूमिपूजनासाठी पंतप्रधान कर्जतमध्ये येणार असल्याची शक्यता वर्तवली जात आहे. या पार्श्वभूमीवर संभाव्य मार्गावरील रस्त्यांचे डांबरीकरण आणि हेलिपॅड उभारणीची कामे सुरू करण्यात आली आहेत. मात्र, पंतप्रधानांचा दौरा निश्चित झाला आहे का, याबाबत अद्याप स्पष्टता नाही.

भूमिपूजनासाठी पुलाची वाडी, लाखाची वाडी चर्चेत

पाली तर्फे कोतवाल खलाटी ग्रामपंचायत हद्दीतील सायडोंगर येथे टोरंट कंपनीकडून प्रस्तावित हायड्रॉलिक प्रकल्प उभारण्याच्या हालचाली सुरू आहेत. या प्रकल्पाच्या भूमिपूजनासाठी पंतप्रधान नरेंद्र मोदी कर्जतला येण्याची चर्चा आहे. भालिवडी ग्रामपंचायत हद्दीतील पुलाची वाडी आणि लाखाची वाडी येथील शासकीय जमिनीवर भूमिपूजन सोहळा होण्याची शक्यता वर्तवली जात आहे.

Senior Citizen Rehabilitation : MDL च्या CSR उपक्रमांतर्गत वांद्रे येथे PMD-VK केंद्राचे उद्घाटन

संभाव्य मार्गावरील रस्त्यांची कामे युद्धपातळीवर

३ नोव्हेंबर रोजी पंतप्रधान नरेंद्र मोदी पुणे जिल्ह्यातील बारामती येथे कार्यक्रमासाठी येणार असल्याची माहिती आहे. त्यानंतर दुसऱ्या सत्रात ते कर्जत तालुक्याला भेट देणार असल्याची चर्चा सुरू आहे. या पार्श्वभूमीवर आंबिवली फाटा ते भीमाशंकर घाट रस्त्यालगत नागेरे फाट्यावरून सावळे गावाकडे जाणाऱ्या मार्गाचे काम सुरू झाले आहे. यापूर्वी हा रस्ता प्रामुख्याने पायी जाण्यासाठी आणि बैलगाडीच्या वापरासाठी होता. आता त्याचे नव्याने बांधकाम केले जात आहे.

बुलढाण्यात पाणीटंचाईचं संकट? आमदार संजय गायकवाडांकडून आढावा; अधिकाऱ्यांना दिले महत्त्वाचे निर्देश

शेतकऱ्यांचा विरोध आणि दौऱ्याच्या निश्चिततेवर प्रश्न

टोरंट कंपनीच्या प्रस्तावित प्रकल्पाला स्थानिक शेतकऱ्यांचा विरोध असल्याचे सांगितले जात आहे. हा विरोध कायम असताना भूमिपूजन सोहळ्याची तयारी सुरू झाल्याने स्थानिकांमध्ये चर्चा रंगली आहे. पंतप्रधानांच्या संभाव्य दौऱ्यासाठी हेलिपॅडची कामे सार्वजनिक बांधकाम विभागाकडून हाती घेण्यात आली आहेत. मुख्यमंत्री आणि इतर मंत्र्यांसाठीही स्वतंत्र हेलिपॅड उभारण्याची शक्यता आहे. मात्र, पंतप्रधान खरोखरच कर्जतमध्ये येणार का आणि शेतकऱ्यांच्या विरोधाचे काय होणार, असे प्रश्न उपस्थित होत आहेत.