kolhapur : जळालं होतं, पण स्वप्न जळलं नाही ! केशवराव भोसले नाट्यगृह पुन्हा दिमाखात उभं राहिले

Kolhapur : कोल्हापुरातील ऐतेहासिक केशवराव भोसले नाट्यगृह ८ ऑगस्ट २०२४ च्या रात्री भीषण आगीच्या भक्ष्यस्थानी गेलं होतं या आगीत नाट्यगृहाचे मोठे नुकसान झाले होते . रंगमंच जाळून खाक झाला आणि इमारतीचा काही भाग आणि छतही कोसळले होते . हे नाट्यगृह १९१५ मध्ये राजश्री छत्रपती शाहू महाराजांनी उभारले होते .

• केशवराव भोसले नाट्यगृहाचा इतिहास
• २५ कोटींच्या निधीतून पुनर्बांधणी
• राखेतून पुन्हा सांस्कृतिक वैभव

Kolhapur : एका रात्रीत आगीच्या भक्ष्यस्थानी गेलेलं आणि कोल्हापूरच्या सांस्कृतिक विश्वाला मोठा धक्का देणारं संगीतसूर्य केशवराव भोसले नाट्यगृह अखेर पुन्हा दिमाखात उभं राहिलं आहे. ८ ऑगस्ट २०२४ रोजी लागलेल्या भीषण आगीत नाट्यगृहाचे मोठ्या प्रमाणावर नुकसान झाले होते. त्यानंतर या ऐतिहासिक वास्तूची पुनर्बांधणी करण्याचे आव्हान प्रशासनासमोर उभे राहिले. आता तब्बल दोन वर्षांनी पुनर्बांधणी झालेल्या नाट्यगृहाचे आज महाराष्ट्राचे मुख्यमंत्री मा. देवेंद्र फडणवीस जी यांच्या हस्ते या नाट्यगृहाचे उदघाटन करण्यात आले .

आगीच्या घटनेनंतर कोल्हापूरसह राज्यभरातील कलाकार, रंगकर्मी आणि नाट्यरसिकांनी नाट्यगृह पुन्हा उभे करण्याची मागणी केली होती. हे नाट्यगृह केवळ नाटकांचे सादरीकरण होणारे ठिकाण नसून कोल्हापूरच्या सांस्कृतिक इतिहासाचा महत्त्वाचा भाग आहे. त्यामुळे पुनर्बांधणी करताना आधुनिक सुविधा देतानाच त्याचा ऐतिहासिक वारसा जपण्यावरही भर देण्यात आला.

केशवराव भोसले नाट्यगृहाचा इतिहास

कोल्हापूरच्या सांस्कृतिक इतिहासात संगीतसूर्य केशवराव भोसले नाट्यगृह खूपच महत्वाचे आहे . शाहू महाराजांनी युरोपच्या दौऱ्यात भव्य नाट्यगृहे आणि अँफी थियेटर पहिल्या नंतर कोल्हापुरात ही कलाविष्कारासाठी असे नाट्यगृह असावे असे त्यांना वाटले आणि या त्यावेळच्या दर्जेदार नाट्यगृहाची निर्मिती झाली . १९१३ मध्ये याच्या बांधकामाला सुरवात झाली १९१५ मध्ये याचे काम पूर्ण झाले . तसेच सुरवातीला हे नाट्यगृह पूर्वी पॅलेस थियेटर या नावाने ओळखले जात होते .

Kolhapur Madhuri Elephant : लाडक्या ‘माधुरी’ हत्तीणीला आणण्यासाठी कोल्हापुरात ग्रामस्थ आक्रमक!
१९५७ मध्ये संगीतसूर्य केशवराव भोसले नाट्यगृह असे या नाट्यगृहाचे नामकरण करण्यात आले . मराठी रंगभूमीवरील महान गायक आणि अभिनेते केशवराव भोसले यांच्या स्मरणार्थ हे नामकरण करण्यात आले .

२५ कोटींच्या निधीतून पुनर्बांधणी

नाट्यगृहाच्या पुनर्बांधणीसाठी शासनाने २५ कोटी १० लाख रुपयांचा निधी मंजूर केला होता. ऑक्टोबर २०२४ मध्ये पुनर्बांधणीच्या कामाचे भूमिपूजन झाले. त्यानंतर विविध टप्प्यांत बांधकाम आणि अंतर्गत कामांना वेग देण्यात आला. नाट्यगृहातील सुविधा अधिक आधुनिक करण्यासोबतच रंगमंच, प्रेक्षक व्यवस्था आणि तांत्रिक सुविधांमध्येही सुधारणा करण्यात आली.

पुनर्बांधणीच्या काळात या प्रकल्पाकडे संपूर्ण महाराष्ट्राचे लक्ष लागले होते. आगीत उद्ध्वस्त झालेली वास्तू पुन्हा उभी राहणार का, तिचे मूळ स्वरूप कितपत जपले जाणार आणि नव्या नाट्यगृहात कोणत्या सुविधा असणार, याबाबत रसिकांमध्ये उत्सुकता होती.

क्रिकेटप्रेमींसाठी आनंदाची बातमी! कोल्हापुरात लवकरच उभे राहणार आंतरराष्ट्रीय दर्जाचे स्टेडियम

राखेतून पुन्हा सांस्कृतिक वैभव

केशवराव भोसले नाट्यगृहाचे पुनरुज्जीवन हा केवळ एका इमारतीचा पुनर्बांधणी प्रकल्प नाही, तर कोल्हापूरच्या सांस्कृतिक अस्मितेला पुन्हा उभारी देणारा क्षण मानला जात आहे. आगीत सर्व काही गमावलेल्या या वास्तूने पुन्हा एकदा रंगभूमीसाठी आपले दरवाजे खुले केले आहेत.

आजच्या लोकार्पणानंतर कोल्हापूरच्या नाट्यरसिकांना पुन्हा एकदा या ऐतिहासिक रंगमंचावर नाटक, संगीत आणि विविध सांस्कृतिक कार्यक्रमांचा आनंद घेता येणार आहे. त्यामुळे ‘आगीत भस्मसात झालं, पण सांस्कृतिक वैभव संपलं नाही’, अशी भावना कोल्हापूरकरांमध्ये पाहायला मिळत आहे