Dheeraj Deshmukh : लातूरमध्ये आमचं पॅनल जिंकलं; जाहीरनाम्यातील आश्वासनं पूर्ण करणार – धीरज देशमुख, सौजन्य : सोशल मीडिया
Dheeraj Deshmukh : लातूर जिल्हा मध्यवर्ती सहकारी बँकेच्या निवडणुकीत काँग्रेसचे माजी आमदार धीरज देशमुख यांच्या नेतृत्वाखालील सहकार पॅनेलने 19 पैकी 14 जागा जिंकत दणदणीत विजय मिळवला. या निवडणुकीत भाजप नेते संभाजी पाटील-निलंगेकर आणि आमदार रमेश कराड यांच्या नेतृत्वाखालील परिवर्तन पॅनेलला पाच जागांवर समाधान मानावे लागले.
या विजयानंतर धीरज देशमुख यांनी पत्रकार परिषद घेत विविध विषयांवर भाष्य केले. लातूर जिल्हा मध्यवर्ती सहकारी बँकेच्या निवडणुकीत आमच्या पॅनलचा विजय झाला असून निवडणुकीदरम्यान जाहीरनाम्यात दिलेली आश्वासनं पूर्ण करण्यासाठी येत्या काळात कामाला सुरुवात करणार असल्याची ग्वाही धीरज देशमुख यांनी दिली.
प्रत्येक निवडणूक ही वेगवेगळ्या पद्धतीनं लढवावी लागते. आपण काय काम केले आहे आणि पुढे काय करणार आहोत, याच्या आधारावर मतदार मतदान करतात असेही ते पुढे म्हणाले.
या विजयाबाबत बोलताना देशमुख म्हणाले की, आम्ही आमचं पॅनल उभं केलं आणि त्यात यश मिळवलं. आता जाहीरनाम्यातील आश्वासनांची पूर्तता करून प्रत्यक्ष काम सुरू करू. तसेच गोकुळमध्ये जो प्रकार घडला, तशी परिस्थिती लातूरमध्ये निर्माण होणार नाही, असंही त्यांनी स्पष्ट केले.
महायुतीच्या काही नेत्यांकडून काँग्रेसच्या माजी अध्यक्षा सोनिया गांधी यांच्या नव्या पुस्तक फाडण्याच्या काही ठिकाणी घटना घडल्या. यावर प्रतिक्रिया देताना धीरज देशमुख म्हणाले की, हा त्यांनी केलेला एक निव्वळ स्टंट आहे. कोणतं पुस्तक वाचायचं किंवा नाही, हा प्रत्येकाचा वैयक्तिक प्रश्न आहे. मात्र, लोक हे पुस्तक वाचत असून त्यातील आठवणी आणि मांडणी समजून घेत आहेत. पुस्तक फाडणाऱ्यांचा इतिहास पाहिला तर ते केवळ स्टंटबाजी करत असल्याचं दिसतं, असा टोला त्यांनी लगावला. अशोक चव्हाण यांचे गांधी घराण्याशी चांगले संबंध असून, तेही हे पुस्तक वाचत असावेत, असं देशमुख म्हणाले.
दरम्यान, अमित देशमुख यांच्यासंदर्भात बोलताना त्यांनी संबंधित कार्यक्रमात एका ठरावीक मुद्द्याला अधिक महत्त्व देण्याचा प्रयत्न झाल्याचं सांगितलं. कार्यक्रमात केलेलं भाष्य हे सर्वधर्मसमभाव आणि स्वातंत्र्यलढ्यात सहभागी झालेल्या व्यक्तींच्या संदर्भात असावं. मात्र, सध्या त्यांना एकाकी पाडण्याचं काम सुरू असल्याचा आरोपही त्यांनी केला.
तसेच मराठा आरक्षण आंदोलनाबाबत बोलताना देशमुख म्हणाले की, आंदोलनातील खऱ्या मागण्यांऐवजी इतर मुद्द्यांवर अधिक चर्चा होत असल्याने समाजाच्या मूळ मागण्या दुर्लक्षित होत आहेत. मनोज जरांगे यांना काही संशय असेल तर सरकारने त्याची चौकशी करावी, असं मत त्यांनी व्यक्त केलं.
दरम्यान, रणजित सावरकर यांच्या वक्तव्यांवर प्रतिक्रिया देताना देशमुख म्हणाले की, कोणतीही समस्या समोर आली की नेहरूंचं नाव घेऊन त्यांना प्रश्न विचारले जातात. एखाद्या व्यक्तीने पुस्तकात आपल्या आठवणी लिहिल्या असतील, तर त्या गोष्टी मनावर घेण्याची गरज नाही. इतिहासात जे लिहिलं गेलं आहे, ते पुसून टाकता येणार नाही, असंही धीरज देशमुख यांनी स्पष्ट केले.






