विरोधी पक्षाच्या खासदारांची मुख्यमंत्र्यांसोबत बैठक; शिवाजी काळगेंनी केली ‘ही’ महत्वाची मागणी

ग्रामीण भागातील विविध विकासकामांमधील अडचणी त्वरित दूर करून विकासाला गती द्यावी, अशी मागणी लातूर लोकसभा मतदारसंघाचे खासदार डॉ. शिवाजी काळगे यांनी मुख्यमंत्री देवेंद्र फडणवीस यांच्याकडे केली.

• विरोधी पक्षाच्या खासदारांची मुख्यमंत्र्यांसोबत बैठक
• शिवाजी काळगेंनी केली महत्वाची मागणी
• ग्रामीण रस्ते, पाणी, वीज प्रश्नांवर चर्चा

लातूर : ग्रामीण भागातील विविध विकासकामांमधील अडचणी त्वरित दूर करून विकासाला गती द्यावी, अशी मागणी लातूर लोकसभा मतदारसंघाचे खासदार डॉ. शिवाजी काळगे यांनी मुख्यमंत्री देवेंद्र फडणवीस यांच्याकडे केली. महाराष्ट्रातील विरोधी पक्षांच्या लोकसभा सदस्यांनी राज्यातील विविध लोकसभा मतदारसंघांशी संबंधित विकासकामे, निधीवाटप, प्रशासकीय व प्रोटोकॉलच्या प्रश्नांबाबत मुंबईत मुख्यमंत्री देवेंद्र फडणवीस यांची भेट घेऊन सविस्तर चर्चा केली. लोकसभा मतदारसंघांचा व्यापक भौगोलिक व लोकसंख्यात्मक विस्तार लक्षात घेता विकासकामांसाठी अधिक न्याय्य निधी उपलब्ध करून देणे, जिल्हा नियोजन समितीच्या निधीवाटपात खासदारांच्या योग्य विचार करणे, पायाभूत सुविधा निधी, ग्रामसडक योजना, ग्रामीण मार्ग व सार्वजनिक बांधकाम विभागाच्या रस्ते विकासकामांच्या नियोजनात संबंधित खासदारांचा सक्रिय सहभाग सुनिश्चित करावा, अशा मागण्या यावेळी केल्या.

विरोधी खासदारांना निधीबाबत मुख्यमंत्र्यांची ग्वाही

खासदार शाहू छत्रपती यांच्या पुढाकाराने झालेल्या या बैठकीस खासदार सुप्रिया सुळे, खासदार अरविंद सावंत, खासदार डॉ. शिवाजी काळगे, खासदार विशाल पाटील, खासदार शोभा बच्छाव, खासदार कल्याण काळे, खासदार बळवंत वानखेडे, खासदार बजरंग सोनवणे आणि खासदार प्रतिभा धानोरकर उपस्थित होते. मुख्यमंत्री देवेंद्र फडणवीस यांनी विरोधी पक्षाच्या खासदारांनी प्रतिनिधित्व केलेल्या मतदारसंघांनाही स्थानिक विकासकामांसाठी निधीवाटपात समान व न्याय्य वागणूक दिली जाईल, अशी ग्वाही दिली. बैठकीत मांडण्यात आलेल्या विविध प्रश्नांवर आवश्यक ती कार्यवाही करण्याचे आश्वासनही त्यांनी दिले.

हे सुद्धा वाचा : जुन्या किरकोळ कारणावरून तरुणाचा खून, आईने आरडाओरड केली पण…; नांदेड जिल्ह्यातील घटनेनं खळबळ

ग्रामीण रस्ते, पाणी, वीज प्रश्नांवर चर्चा

खासदार डॉ. शिवाजी काळगे यांनी पंतप्रधान ग्रामसडक योजनेतील कामे, ग्रामीण भागातील रस्त्यांची आवश्यकता तसेच शेतकऱ्यांना वीज जोडण्या उपलब्ध करून देताना येणाऱ्या अडचणी मुख्यमंत्री फडणवीस यांच्या निदर्शनास आणून दिल्या. जलजीवन मिशनच्या अंमलबजावणीतील अडचणी आणि ग्रामीण भागातील पाणीपुरवठ्याच्या प्रश्नांवरही चर्चा झाली. केंद्र व राज्य शासनाच्या विविध योजनांच्या अंमलबजावणीत खासदारांचा सहभाग, जिल्हास्तरीय शासकीय कार्यक्रमांमध्ये लोकसभा सदस्यांना प्रोटोकॉलनुसार योग्य स्थान व सन्मान आणि आवश्यक प्रशासकीय सुविधा उपलब्ध करून देण्याबाबतही चर्चा करण्यात आली. बैठकीदरम्यान महाराष्ट्र लोकसेवा आयोगाच्या औषध निरीक्षक पदाच्या भरती परीक्षेच्या कथित पेपरफुटीच्या पार्श्वभूमीवर परीक्षा रद्द करण्यात आल्याच्या मुद्द्यावरही विरोधी पक्षाच्या खासदारांनी मुख्यमंत्र्यांकडे प्रश्न उपस्थित केला. या प्रकरणात जबाबदारी निश्चित करून दोषींवर कठोर कारवाई करावी, अशी मागणी करण्यात आली.