शीव रुग्णालय ३,२८६ खाटांचे होणार, आज मुख्यमंत्री देवेंद्र फडणवीस यांच्या हस्ते उदघाटन (फोटो सौजन्य-ChatGPT)
रुग्णालय पुनर्विकास दुसऱ्या टप्प्यात सर्वांत महत्त्वाची बाब म्हणजे रुग्णशय्या क्षमतेत एकूण ३,२८६ खाटांची व्यवस्था उपलब्ध होणार असून, त्यातच २,२०० खाटांची १५ मजली मुख्य इमारत उभारली जाणार आहे. येथे स्थिर रुग्णांसाठी स्वतंत्र कक्ष, तसेच पूर्ण मजला अतिदक्षता विभागासाठी राखीव असेल. त्यामुळे गंभीर रुग्णांवर अधिक लक्ष केंद्रित करता येणार आहे.
रुग्णांना एकाच छताखाली बहुतेक सर्व तपासण्या मिळणार ही या प्रकल्पाची मोठी जमेची बाजू ठरणार आहे. एक्स-रे, सोनोग्राफी, सीटी-स्कॅन, एमआरआय अशा अत्याधुनिक तपासण्या एकाच इमारतीत उपलब्ध राहणार आहेत. तसेच ऑपरेशन थिएटरची संख्या १२ वरून २४ पर्यंत वाढवण्यात येणार असल्याने शस्त्रक्रियांसाठी प्रतीक्षा कमी होईल.
आपत्कालीन सेवांमध्येही मोठा बदल होणार आहे. १४ मजली स्वतंत्र आपत्कालीन इमारतीत ६०० खाटांची व्यवस्था, ट्रॉमा केअर, मोठ्या अपघातांसाठी विशेष विभाग आणि अत्याधुनिक लाइफ सपोर्ट प्रणाली उपलब्ध राहणार आहे. त्यामुळे अपघातग्रस्त व गंभीर रुग्णांना तत्काळ उपचार मिळणे शक्य होईल. दररोज मोठ्या संख्येने येणाऱ्या बाह्य रुग्णांसाठी स्वतंत्र १३ मजली इमारत उभारण्यात येणार असून, १०० हून अधिक तपासणी कक्ष, मोठे प्रतीक्षालय, रक्तपेढी आणि प्रयोगशाळा यामुळे रुग्णांची गर्दी व्यवस्थापन अधिक सुलभ होईल. याशिवाय, ‘न्यूमॅटिक शूट’ प्रणालीमुळे तपासणी नमुने काही मिनिटांत प्रयोगशाळेत पोहोचतील. त्यामुळे वेळेची बचत होऊन निदान आणि उपचार प्रक्रिया वेगवान होणार आहे.
कर्करोग रुग्णांसाठी स्वतंत्र १३ मजली इमारत, रेडिओथेरपी, केमोथेरपी आणि आधुनिक निदान सुविधा उपलब्ध होणार असल्याने आर्थिकदृष्ट्या दुर्बल रुग्णांसाठी मोठा आधार निर्माण होणार आहे. एकूणच, सायन रुग्णालयाचा हा दुसरा टप्पा म्हणजे ‘जास्त खाटा, कमी प्रतीक्षा आणि जलद उपचार’ या त्रिसूत्रीवर आधारित रुग्णसेवेचा नवा अध्याय ठरणार आहे.
“सायन रुग्णालयाच्या पुनर्विकासाच्या दुसऱ्या टप्प्यामुळे रुग्णसेवेत गुणात्मक बदल घडणार आहे. वाढीव रुग्णशय्या, अत्याधुनिक तपासणी सुविधा आणि स्वतंत्र आपत्कालीन तसेच कर्करोग विभागामुळे रुग्णांना एकाच छताखाली सर्व उपचार वेळेत मिळतील. विशेषतः गरीब आणि दूरवरून येणाऱ्या रुग्णांसाठी ही सुविधा अधिक दिलासादायक ठरेल. आमचा भर ‘कमी प्रतीक्षा, जलद निदान आणि तत्काळ उपचार’ यावर आहे.” अशी माहिती लो. टिळक सर्वसाधारण सायन रुग्णालय अधिष्ठाता डॉ. प्रमोद इंगळे यांनी दिली.
आज २७ मार्च रोजी शुक्रवारी सायन रुग्णालयाच्या पुनर्विकासाच्या दुसऱ्या टप्प्याचा भूमिपूजन सोहळा दुपारी २.०० वाजता मुख्यमंत्री देवेंद्र फडणवीस यांच्या हस्ते होणार असून प्रमुख उपस्थिती मुंबई शहर जिल्हा पालकमंत्री एकनाथ शिंदे, उपमुख्यमंत्री सुनेत्रा पवार, महापौर रितू तावडे, यांच्या सह सांस्कृतिक कार्य मंत्री आशिष शेलार, कौशल्य रोजगार मंत्री मंगल प्रभात लोढा, खा. अनिल देसाई, आम. तामील सेल्वन, आदी उपस्थित राहणार आहेत.
.png "Videos"){kind=small}
