Maratha Reservation : कराड-चिपळूण मार्गावर ‘रास्ता रोको’, वारुंजी फाट्यावर भगवे वादळ!
कराड : मराठा आरक्षण, कुणबी दाखले आणि ‘सगे-सोयरे’ निकषाच्या मागणीसाठी मनोज जरांगे-पाटील यांनी आंतरवाली सराटी येथे सुरू केलेल्या आमरण उपोषणाला पाठिंबा देण्यासाठी गुरुवारी कराड तालुका सकल मराठा समाज आक्रमक झाला. वारुंजी फाटा (पाटण तिकाटणे) येथे सकाळी सुमारे ११ वाजता कराड-चिपळूण मार्गावर जोरदार रास्ता रोको आंदोलन करण्यात आले. अचानक झालेल्या या आंदोलनामुळे महामार्गावरील वाहतूक ठप्प झाली असून, दोन्ही बाजूंना वाहनांच्या लांबच लांब रांगा लागल्या.
मनोज जरांगे-पाटील यांच्या उपोषणाचा सहावा दिवस सुरू असतानाच त्यांची प्रकृती खालावल्याच्या पार्श्वभूमीवर कराड तालुक्यातील मराठा बांधव मोठ्या संख्येने वारुंजी फाट्यावर एकत्र आले. हातात भगवे झेंडे घेतलेल्या आंदोलकांनी सरकारविरोधात जोरदार घोषणाबाजी केली. ‘एक मराठा, लाख मराठा’, ‘छत्रपती शिवाजी महाराज की जय’, ‘आरक्षण आमच्या हक्काचे, नाही कुणाच्या बापाचे’, ‘सगे-सोयरे निकष लागू झालाच पाहिजे’, अशा घोषणांनी परिसर दणाणून गेला.
मराठा आरक्षणाचा प्रश्न प्रदीर्घ काळापासून प्रलंबित आहे. शासनाने आता वेळकाढूपणा न करता ठोस निर्णय घेऊन मराठा समाजाला न्याय द्यावा, अशी मागणी आंदोलकांनी केली. तसेच जरांगे-पाटील यांच्या प्रकृतीकडे गांभीर्याने पाहून त्यांच्या मागण्यांवर तातडीने निर्णय घेण्याची मागणी करण्यात आली.
Maharashtra Band: मराठा आरक्षणामुळे राजकारण तापणार; उद्या ४ जिल्ह्यांत कडकडीत बंद!
दरम्यान, आंदोलकांच्या शिष्टमंडळाने कराडच्या पोलीस उपअधीक्षक राजश्री पाटील आणि शहर पोलीस ठाण्याचे निरीक्षक दत्तात्रय दराडे यांची भेट घेऊन मागण्यांचे निवेदन सादर केले. शासनाने मागण्यांवर सकारात्मक निर्णय घ्यावा, अशी भूमिका यावेळी मांडण्यात आली. त्यानंतर रास्ता रोको आंदोलन स्थगित करण्यात आले.
सरकारने मराठा समाजाच्या मागण्यांकडे गांभीर्याने पाहिले नाही आणि मनोज जरांगे-पाटील यांच्या मागण्यांवर तातडीने निर्णय घेतला नाही, तर आंदोलन अधिक तीव्र करण्याचा इशारा आंदोलकांनी दिला. आगामी काळात पुणे-बंगळुरू राष्ट्रीय महामार्ग रोखून आंदोलन करण्याचा इशाराही यावेळी देण्यात आला.
रास्ता रोकोमुळे कराड-चिपळूण मार्गावरील वाहतूक काही काळ पूर्णपणे विस्कळीत झाली. दोन्ही बाजूंना वाहनांच्या मोठ्या रांगा लागल्याने प्रवाशांना गैरसोयीचा सामना करावा लागला. वाहतूक सुरळीत करण्यासाठी पोलिसांना हस्तक्षेप करावा लागला. आंदोलनाच्या पार्श्वभूमीवर कराडच्या पोलीस उपअधीक्षक राजश्री पाटील आणि पोलीस निरीक्षक दत्तात्रय दराडे यांच्या मार्गदर्शनाखाली मोठा पोलीस बंदोबस्त तैनात करण्यात आला होता.
.png "Videos"){kind=small}
