Sharad Pawar: ‘महागाईच्या झळा आणखी तीव्र होणार’; अर्थव्यवस्था, दुष्काळ अन् साखरेच्या दरांवरून शरद पवारांनी सरकारला घेरलं

Sharad Pawar: राज्य आणि देशातील वाढती महागाई, अर्थव्यवस्थेची स्थिती, साखरेचे दर, संभाव्य दुष्काळ, मनोज जरांगे यांचे आंदोलन, शिवसेना चिन्ह सुनावणी तसेच दिल्लीतील विद्यार्थ्यांच्या आंदोलनासह विविध मुद्द्यांवर प्रतिक्रिया देताना शरद पवारांनी सरकारवर जोरदार टीका केली.

• ‘महागाईच्या मूळ दुखण्याकडून लक्ष हटवण्यासाठी नवे मुद्दे पुढे’
• सरकारवर गंभीर आरोप
• साखर आयातीला विरोध, दुष्काळावरही व्यक्त केली चिंता

Sharad Pawar: राज्य आणि देशातील वाढती महागाई पाहता तसेच अर्थव्यवस्थेच्या स्थितीवरून राष्ट्रवादी काँग्रेसचे ज्येष्ठ नेते शरद पवार यांनी सरकारवर जोरदार टीका केली. र्वसामान्य कुटुंबांना दैनंदिन गरजा पूर्ण करणे कठीण होत असताना मूळ आर्थिक प्रश्नांऐवजी वेगवेगळे मुद्दे चर्चेत आणून जनतेचे लक्ष दुसरीकडे वळवले जात असल्याचा आरोप यावेळी पवार यांनी केला. शिक्षणासह विविध विषयांवरील वाद निर्माण होणे हा त्याचाच भाग असल्याचा दावा करत हे सर्व ठरवून होत असल्याचे दिसत असल्याचे मत शरद पवार यांनी व्यक्त केले.

आंदोलन करण्याची संधी

दिल्लीतील कॉकरोच जनता पार्टीच्या आंदोलनावर प्रतिक्रिया देताना, विद्यार्थ्यांना लोकशाही पद्धतीने आंदोलन करण्याची संधी मिळायला हवी, असे सांगण्यात आले. विद्यार्थ्यांच्या काही मागण्या असून त्याबाबत सरकारने स्वीकारलेल्या धोरणातील त्रुटींवर न्यायव्यवस्थेनेही भाष्य केल्याचा दावा शरद पवार यांनी केला. प्रशासनाशी संबंधित निर्णयांमध्ये न्यायालयाला वारंवार हस्तक्षेप करावा लागत असेल तर ती चिंतेची बाब आहे. असं मत शरद पवार यांनी व्यक्त केलं.

Eknath Khadse: ‘नाथाभाऊंनी पक्ष उभा केला’ शरद पवारांकडून एकनाथ खडसेंचं कौतुक; भाजपला दाखवला आरसा

शिवसेना पक्ष आणि चिन्हासंदर्भातील सुनावणी

शिवसेना पक्ष आणि चिन्हासंदर्भातील सुनावणीवर मात्र शरद पवार यांनी सावध भूमिका घेण्यात आली. प्रकरणाची सुनावणी अद्याप सुरू असल्याने न्यायालयाचा अंतिम निकाल येण्यापूर्वी भाष्य करणे योग्य ठरणार नाही, असे सांगण्यात आले. आणखी काही दिवस प्रतीक्षा करून अंतिम निर्णयानंतर यावर चर्चा करता येईल, अशी भूमिका मांडण्यात आली.

तिमाही जीडीपी आणि देशाची अर्थव्यवस्था

तिमाही जीडीपी आणि देशाच्या अर्थव्यवस्थेवर बोलताना केंद्र सरकारवर निशाणा साधण्यात आला. पंतप्रधान आणि केंद्रीय अर्थमंत्री देशाच्या अर्थव्यवस्थेचे सकारात्मक चित्र दाखवण्याचा प्रयत्न करत असले तरी महागाई आणि सामान्य नागरिकांच्या आर्थिक अडचणी या मूळ प्रश्नांकडे पुरेसे लक्ष दिले जात नसल्याचा आरोप करण्यात आला. आगामी काळात रुपयाच्या मूल्यावरील दबाव आणि वाढत्या महागाईचा थेट परिणाम सर्वसामान्यांच्या खिशावर होईल, असेही मत शरद पवार यांनी व्यक्त केलं.

आर्टिफिशियल इंटेलिजन्स संस्था

पंतप्रधान नरेंद्र मोदी यांच्या संभाव्य बारामती दौऱ्याबाबत १६ ऑक्टोबरची तारीख देण्यात आल्याचे सांगण्यात आले. मात्र या तारखेत पुढे-मागे बदल होण्याची शक्यता असल्याचेही स्पष्ट करण्यात आले. बारामतीत उभारण्यात आलेल्या आर्टिफिशियल इंटेलिजन्स संस्थेची पंतप्रधान पाहणी करतील आणि त्यांना या प्रकल्पाचे सविस्तर सादरीकरण दिले जाणार असल्याची माहिती देण्यात आली.

साखरेचे वाढते दर

साखरेच्या वाढत्या दरांवर बोलताना त्याचा प्रत्यक्ष फायदा अद्याप ऊस उत्पादकांना झाल्याचे दिसत नाही,असं शरद पवार यांनी म्हटलं. उत्पादन खर्च वाढत असताना बाजारातील वाढत्या किमतीचा काही हिस्सा प्रत्यक्ष पीक घेणाऱ्या शेतकऱ्यापर्यंत पोहोचणे आवश्यक असल्याची भूमिका मांडण्यात आली. साखर आयातीच्या प्रस्तावालाही विरोध दर्शवत, सध्याच्या परिस्थितीत साखर आयात करणे योग्य नसल्याचे मत व्यक्त करण्यात आले.

पावसाने दडी मारल्याने निर्माण झालेल्या परिस्थितीवर गंभीर चिंता व्यक्त करण्यात आली. दुबार पेरणीच्या संकटाबरोबरच आगामी काळात पिण्याच्या पाण्याचे आणि शेतीसाठीच्या पाण्याचे प्रश्नही गंभीर होण्याची शक्यता व्यक्त करण्यात आली. विशेषतः मराठवाड्याला दुष्काळाचा मोठा फटका बसण्याची भीती असून संकटात सापडलेल्या नागरिक आणि शेतकऱ्यांना मदत करण्यासाठी सर्वांनी एकत्रित प्रयत्न करण्याची गरज असल्याचे सांगण्यात आले.

FDA अधिकारी तुकाराम मुंढे यांच्या दुग्ध व्यवसायावरील कारवाईचे समर्थन करण्यात आले. कारवाईमुळे दुधातील भेसळीला आळा बसल्याचे सांगत भेसळमुक्त आणि दर्जेदार दुधासाठी ग्राहक काही प्रमाणात अधिक पैसे देण्यास तयार असल्याचे मत व्यक्त करण्यात आले.

मनोज जरांगे यांच्या आंदोलनाबाबत काही मंत्री त्यांची भेट घेणार असल्याचे सांगत सरकारकडून नेमका कोणता निर्णय किंवा प्रस्ताव दिला जातो, हे पाहावे लागेल, अशी प्रतिक्रिया शरद पवार यांनी दिली.
दरम्यान, विखे पाटील यांच्या टीकेला प्रत्युत्तर देताना, “१९९४ पासून आजपर्यंत काय करत आहात? आजपर्यंत तुम्ही सत्तेमध्येच आहात,” असा सवाल उपस्थित करत त्यांच्या टीकेवर पलटवार करण्यात आला.

शरद पवारांच्या राष्ट्रवादीकडून 10 प्रवक्त्यांची नवी टीम जाहीर; जितेंद्र आव्हाडांसह ‘या’ नेत्यांवर मोठी जबाबदारी