युद्धामुळे विवाह अडचणीत! लग्नसराईच्या ऑर्डर कशा पूर्ण करायच्या; कॅटरिंग व्यावसायिकांची चिंता वाढली
आखाती देशातील युद्ध परिस्थितीमुळे झालेल्या घरगुती वापराच्या गॅस टंचाईचे परिणाम आता लग्नसराईच्या कार्यक्रमांवरही दिसू लागले आहेत. लग्नात येणाऱ्या पाहुण्यांसाठी वधू-वराकडून भोजनाची व्यवस्था केली जाते. त्यासाठी जेवणाच्या ऑर्डर एक ते दोन महिने आधी केटरिंग व्यावसायिकांना दिल्या जातात. अशात गॅस टंचाईमुळे लग्नसराईच्या ऑर्डर कशा पूर्ण करायच्या? असा प्रश्न केटरिंग व्यावसायिकांसमोर उभा राहिल्याने अनेक केटरिंग व्यावसायिकांनी स्वीकारलेल्या ऑर्डर रद्द केल्या आहेत. त्यामुळे आता लग्नाच्या तारखा पुढे ढकलायच्या की अन्य पर्याय शोधायचे, या विचारात वाग्दत्त वर-वधू ‘गॅस’वर आहेत.(फोटो सौजन्य – AI)
विवाहसोहळा थाटात पार पडावा, आलेल्या पाहुण्यांना उत्तम चवीचे जेवण मिळावे यासाठी दोन ते चार महिने आधी हॉल आणि केटरिंग बुक केले जातात. मात्र, अचानक आलेल्या गॅस संकटामुळे पत्रिका वाटलेल्या असताना लग्न पुढे ढकलण्याच्या विचारात असल्याचे काही भावी वधू-वरांनी सांगितले. केटरिंग व्यावसायिकांना पर्यायी व्यवस्था करण्याची विनंती करूनही उपाय होत नसल्याचे नाईलाजास्तव लग्न पुढे ढकलण्याचा विचार असल्याचे वधू-वरांचे म्हणणे आहे. आम्ही ज्या केटरिंग व्यावसायिकांकडे बुकिंग केले होते, त्यांचा आम्हाला फोन आला आणि तुमची ऑर्डर आम्ही पूर्ण करू शकत नाही, असे त्यानी सांगितले. आम्ही त्याना अन्य उपाय करण्याची विनंती केली. सोबतच तुमच्या ओळखीतील अन्य केटरिंग सुचवण्याची विनंती केली. मात्र, सर्वच केटरिंग व्यावसायिक सारख्याच परिस्थितीतून जात असल्याने कोणीही ऑर्डर पूर्ण करण्यासाठी तयार नसल्याची माहिती काही वधू वरांनी दिली आहे.
काही कॅटरिंग व्यावसायिकांनी विद्युत शेगडी व कोळशाच्या शेगडीचा पर्याय शोधला आहे. यातून व्यावसायिक ग्राहकांना सर्विस देत असले तरी त्यांचे प्रयत्न कुठेतरी अपुरे पडल आहेत. गॅसवर ५०० लोकांचे जेवण बनवायला जितका वेळ लागतो, त्याच्या दुप्पट वेळ विद्युत शेगडी किवा कोळशाच्या शेगडीवर जेवण बनवायला लागतो आहे. त्यामुळे मजुरीही जास्त लागते आहे. आम्ही मुंबईत बऱ्याच ठिकाणी गॅस सिलेंडरच्या उपलब्धतेसाठी चौकशी केली. पण, सिलेंडरची उपलब्धता नसल्याचे काही पुरवठादारांनी सांगितल्याची माहिती माऊली केटरर्सच्या वैभव लांबे यांनी दिली, लग्न सराईच्या काळात मुंबई महानगर क्षेत्रात दरवर्षी लाखो विवाह सोहळे पार पडतात. यातून लग्न हॉल मालक, केटरिंग व्यावसायिक आणि या ठिकाणी काम करणारे मजूर यांच्यासह अनेकांना रोजगार मिळतो. मात्र, गॅस पुरवठा मर्यादित झाल्याने आणि सिलेंडरचा किमती वाढल्याने अनेक केटरिंग व्यावसायिकांनी। ऑर्डर रद्द केल्याने याचा परिणाम मजुरांच्या रोजगारावरही झाला आहे.
ग्राहकांच्या आग्रहाखातर आम्ही सर्वतोपरी प्रयत्न करत आहोत. मात्र, ही परिस्थिती अशीच राहिली तर पूर्ण केटरिंग इंडस्ट्री बंद पडण्याच्या मार्गावर आहे. आमची राज्य सरकारला विनंती आहे की, गॅस सिलेंडरची कमी उपलब्धता असली तरी चालेल, पण एका ठराविक कालावधीने सिलेंडर पुरवठा सुरू ठेवावा. वैभव लांबे, केटरर्स मालक, मुंबई, यांनी मत व्यक्त केले आहे.
.png "Videos"){kind=small}
