नागपुरातील डंपिंग यार्डजवळ भीषण आग; आगीत 8 गोदामे जळून खाक

भांडेवाडी परिसरालगत जयेश रामपाल शाहू आणि तुषार शाहू यांच्या मालकीची सुमारे १८ टिनशेड गोदामे आहेत. ही गोदामे विविध व्यापाऱ्यांना भाड्‌याने देण्यात आली आहेत. सोमवारी एका फोमच्या गोदामात आग लागली.

नागपूर : बहादुरानगर पंचायत हद्दीतील बिडगाव येथील डंपिंग यार्डजवळ भीषण आग लागली. या आगीत आठ गोदामे जळून खाक झाली. या घटनेची माहिती मिळताच विविध अग्निशमन केंद्रातून 9 पाण्याचे बंब घटनास्थळी पोहोचले आणि अखेर 4 तासांच्या अथक प्रयत्नानंतर आगीवर नियंत्रण मिळवण्यात प्रशासनाला यश आले.

मिळालेल्या माहितीनुसार, भांडेवाडी परिसरालगत जयेश रामपाल शाहू आणि तुषार शाहू यांच्या मालकीची सुमारे १८ टिनशेड गोदामे आहेत. ही गोदामे विविध व्यापाऱ्यांना भाड्‌याने देण्यात आली आहेत. सोमवारी एका फोमच्या गोदामात आग लागली. काही क्षणांतच आग शेजारील भंगार गोदामांपर्यंत पसरली. आग वेगाने पसरत गेल्याने एकापाठोपाठ एक शेजारील 8 गोदामांना आगीने कवेत घेतले. या घटनेची माहिती मिळताच नागपूर महानगरपालिकेच्या कळमना, वाठोडा, लकडगंज, सक्करदरा, सुगतनगर आणि सिव्हिल लाईन्स अग्निशमन केंद्रांमधील पथके तात्काळ घटनास्थळी दाखल झाली.

याशिवाय बहादुरानगर पंचायत आणि मिहान येथूनही अग्निशमन वाहने बोलावण्यात आली. जवळपास ४ तासांच्या अथक प्रयत्नांनंतर आगीवर नियंत्रण मिळवण्यात यश आले आणि आग इतर गोदामांपर्यंत पसरण्यापासून रोखण्यात आली. या भीषण घटनेत सुदैवाने कोणतीही जीवितहानी झाली नसली तरी मोठ्या प्रमाणात आर्थिक नुकसान झाले आहे. आग लागण्याचे नेमके कारण अद्याप स्पष्ट झाले नसून याबाबत पुढील तपास सुरू आहे.

5 सिलिंडरचा स्फोट अन् अधिक भडकली आग

गोदामांमध्ये ठेवलेल्या सुमारे ५ सिलिंडरचा स्फोट झाल्याने आग अधिक भडकली आणि परिस्थिती आणखी गंभीर झाली. घटनेची माहिती मिळताच शहरातील विविध अग्निशमन केंद्रांमधून एकूण ९ अग्निशमन गाड्या घटनास्थळी दाखल झाल्या. आगीची तीव्रता लक्षात घेता अतिरिक्त मदतही बोलावण्यात आली. मात्र तोपर्यंत गोदामांमध्ये ठेवलेले स्टेशनरी, स्पेअर पार्ट्स, अॅल्युमिनियम खिडक्या, सुती धागा तसेच प्लायवुडचा साठा खाक झाला. तसेच मालवाहू ऑटोही आगीच्या भक्ष्यस्थानी सापडला.

पारशिवनीत घर जळाले

दुसऱ्या एका घटनेत, नगर पंचायत पारशिवनीच्या प्रभाग क्रमांक ४ मध्ये शॉर्ट सर्किटमुळे लागलेल्या भीषण आगीत एका घरातील सर्व साहित्य जळून खाक झाल्याची रविवारी रात्री घडली. राया आगीत मोठे नुकसान झाले असून, कुटुंबावर मोठे आर्थिक संकट
ओढवले आहे. मिळालेल्या माहितीनुसार, सूर्यवंशी यांच्या मालकीच्या घरात भाड्याने राहणारे कैलाश दामाजी डायरे (वय ४०) यांच्या घरात अचानक शॉर्ट सर्किटमुळे आग लागली. काही क्षणांतच घरातील सर्व साहित्य खाक झाले.

हेदेखील वाचा : Satara News : सोनगाव कचरा डेपोला भीषण आग; धुराच्या लोटामुळे नागरिक हैराण, ठोस उपाययोजनांची मागणी