मंत्री शिवेंद्रसिंहराजेंचा तिकिट काढून एसटीने प्रवास; अधिकाऱ्यांनाही केल्या ‘या’ सूचना

एसटी महामंडळाच्या मेढा आगाराला नुकत्याच नवीन ८ एसटी बसेस मिळाल्या. बसेसच्या लोकार्पण सोहळ्यावेळी मंत्री शिवेंद्रसिंहराजे भोसले यांनी तिकीट काढून एसटी बसमधून फेरफटका मारत एसटी प्रवासाचा आनंद लुटला.

सातारा : सातारा जिल्ह्यातून एक मोठी बातमी समोर आली आहे. सार्वजनिक बांधकाम मंत्री छत्रपती शिवेंद्रसिंहराजे भोसले यांच्या प्रयत्नातून एसटी महामंडळाच्या मेढा आगाराला नुकत्याच नवीन ८ एसटी बसेस मिळाल्या. या एसटी बसेसचा लोकार्पण सोहळा मेढा आगारात उत्साहात झाला. यावेळी मंत्री शिवेंद्रसिंहराजे भोसले यांनी तिकीट काढून एसटी बसमधून फेरफटका मारत एसटी प्रवासाचा आनंद लुटला. बसेसच्या लोकार्पण सोहळ्याला महामंडळाचे सातारा विभाग नियंत्रक रोहन पलंगे, ज्योती गायकवाड यांच्यासह जावलीचे तहसीलदार हणमंत कोळेकर, गटविकास अधिकारी निलेश पाटील, सहाय्यक पोलीस निरीक्षक सुधीर पाटील, महावितरणचे उपकार्यकारी अभियंता सुरेंद्र भूतकर, शाखा अभियंता सुरेश कुंभार यांनी सुद्धा हजेरी लावली. यावेळी मेढा आगार व्यवस्थापक नीता बाबर यांच्यासह आगारातील अधिकारी वाहक, चालक व तालुक्यातील नागरिकांनी गर्दी केली होती.

जावली तालुक्यातील बहुतांश भाग हा दुर्गम-डोंगराळ असून, या भागातुन प्रवाशांचा प्रवास सुखकर होण्यासाठी एसटी बसेसचाच पर्याय नागरिकांना निवडावा लागतो. मात्र मेढा आगारातील अनेक बसेस जुन्या झाल्या होत्या. त्यामुळे एसटी बसेस बंद होण्याचे प्रकार नेहमी घडत होते. यासाठी तालुक्यातील नागरिकांनी नवीन एसटी बसेस मिळण्याची वारंवार मागणी मेढा आगारकडे व सार्वजनिक बांधकाम मंत्री भोसले यांच्याकडे केली होती.

नवीन बसच्या मागणीला यश

मंत्री शिवेंद्रसिंहराजे यांनी तालुक्यातील नागरिकांना सुखकर प्रवास करता यावा, यासाठी नागरिकांच्या मागणीचा पाठपुरावा स्वतः करत राज्य परिवहन विभागाकडे नवीन बस उपलब्ध करून देण्याची मागणी केली होती. या मागणीला यश आले असून, राज्य परिवहन विभागाकडून मेढा आगाराला नवीन आठ बसेस मिळाल्या आहेत. या बसेसचा लोकार्पण सोहळा मोठ्या उत्साहात झाला.

हे सुद्धा वाचा : वनराज आंदेकर खूनप्रकरणी मोठी अपडेट; 21 आरोपींविरुद्ध 1700 पानांचे दोषारोपपत्र न्यायालयात सादर

गैरसोय होणार नाही याची खबरदारी घ्या

मंत्री शिवेंद्रसिंहराजे यांनी फीत कापून एसटी बसेसचे लोकार्पण केले. त्यांनी तिकिट काढून नवीन बसमधून फेरफटका मारत एसटी प्रवासाचा आनंद लुटला. मेढा आगाराला नवीन बसेस मिळाल्यामुळे तालुक्यातील नागरिक व शाळकरी मुलांनी आनंद व्यक्त केला. दरम्यान, नवीन बसेस मिळाल्याने प्रवाशांची गैरसोय दूर होणार आहे. मेढा आगाराने बसचे वेळापत्रक काटेकोरपणे पाळून प्रवाशांची गैरसोय होणार नाही याची खबरदारी घ्यावी, अशा सूचना शिवेंद्रसिंहराजे यांनी अधिकाऱ्यांना केल्या.

हे सुद्धा वाचा : मावळ हादरलं! एकावर 4 जणांचा प्राणघातक हल्ला; दांडके अन् तलवारीने बेदम मारहाण