MPSC अध्यक्ष विवेक भिमनवार यांची गच्छंती अटळ; मुख्यमंत्र्यांचे थेट राज्यपालांना पत्र, आता चौकशी समिती...
मुंबई : महाराष्ट्र लोकसेवा आयोगाच्या (एमपीएससी) उमेदवारांचे आंदोलन लक्षात घेता आता मुख्यमंत्री देवेंद्र फडणवीस यांनी मोठा निर्णय घेतला आहे. त्यांनी राज्यपाल जिष्णु देव वर्मा यांना पत्र लिहून संविधानाच्या कलम ३१७ नुसार एमपीएससी आयोगाचे माजी व सध्याचे अध्यक्ष आणि सदस्यांवर कारवाई करण्यासाठी एका चौकशी समितीचे गठन करण्याची विनंती केली आहे.
मुख्यमंत्र्यांनी हायकोर्टाच्या निवृत्त न्यायमूर्तींच्या अध्यक्षतेखाली ही समिती स्थापन करण्याची शिफारस केली असून, पुढील कारवाईसाठी तीन महिन्यांच्या आत अहवाल सादर करण्यास सांगितले. तज्ज्ञांच्या मते, मुख्यमंत्री फडणवीस यांच्या या शिफारशीनंतर आता एमपीएससीचे विद्यमान अध्यक्ष विवेक भिमनवार यांचे पद जाणे निश्चित मानले जात आहे. एमपीएससीच्या परीक्षामधील कथित गैरव्यवहार आणि पेपरफुटीच्या प्रकरणांवरून पुण्यात विद्यार्थ्यांचे आंदोलन सुरू आहे. विशेषतः अलीकडेच अन्न व औषध प्रशासन विभागांतर्गत असलेल्या ‘ड्रग इन्स्पेक्टर’ पदाचा पेपर फुटल्याने विद्याथ्यांमध्ये मोठा संताप पाहायला मिळत आहे.
दरम्यान, पुण्यातील एमपीएससी विद्यार्थ्यांच्या आंदोलनामुळे महायुती सरकारवरील दबाव वाढला आहे. नुकतीच मुख्यमंत्री फडणवीस व स्पर्धा परीक्षेची तयारी करणाऱ्या विद्यार्थ्यांच्या प्रतिनिधीमंडळात बैठक पार पडली. त्या बैठकीत एमपीएससीचे सचिव महेंद्र हरपाळकर यांच्या बदलीसंदर्भात आश्वासन देण्यात आले. त्यानंतर हरपाळकर यांना सचिवपदावरून कार्यमुक्त करण्यात आले. मात्र, आता विद्यार्थी एमपीएससी अध्यक्ष विवेक भिमनवार यांच्या राजीनाम्याच्या मागणीवर ठाम आहेत. याच कारणामुळे मुख्यमंत्र्यांनी आपल्या अधिकारांचा वापर करत राज्यपालांना हे पत्र लिहिले आहे.
पवारांनी केली मुख्यमंत्र्यांशी चर्चा
राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यानी नुकतीच मुख्यमंत्री फडणवीस यांच्याशी फोनवरून संवाद साधत एमपीएससी विद्याथ्यांच्या प्रतिनिधीशी चर्चा करून त्यांच्या समस्यांवर लवकरात लवकर तोडगा काढण्याचे आवाहन केले, गरज भासल्यास आणि विद्यार्थी प्रतिनिधी तयार असल्यास, हा तिढा सोडवण्यासाठी व न्याय्य मार्ग काढण्यासाठी आपण स्वतः योगदान देण्यास तयार असल्याचेही त्यांनी सांगितले.
रोहित पवार यांनीही उघडली आघाडी
पुण्यात राष्ट्रवादी शरद पवार गटाचे आमदार रोहित पवार यांच्या नेतृत्वाखालीही एमपीएससी विद्याथ्यांचे आंदोलन सुरू आहे. मात्र, यातही आता अनेक गट पडले आहेत. सध्या पुण्यात तीन वेगवेगळ्या ठिकाणी विरोध प्रदर्शन सुरू आहे.
.png "Videos"){kind=small}
