Shiv Sena Candidates: जिल्हा बँकेची निवडणूक रंगणार! शिवसेनेने उतरवले उमेदवार; सहकारातील राजकीय समीकरणांना नवे वळण

Shiv Sena Candidates: अहिल्यानगर जिल्हा मध्यवर्ती सहकारी बँकेच्या निवडणुकीत शिवसेनेने सक्रिय सहभाग घेत उमेदवार मैदानात उतरवले आहेत. संगमनेर तालुक्यातून तीन आणि शेवगावमधून एक उमेदवार रिंगणात उतरल्याने जिल्हा बँकेच्या निवडणुकीतील चुरस वाढण्याची शक्यता आहे.

• जिल्हा बँक निवडणुकीत शिवसेनेची एन्ट्री
• संगमनेर तालुक्यातून शिवसेनेचे तीन तर शेवगावमधून एक उमेदवार मैदानात
• आ.लंघे, आ खताळ, लोखंडे यांच्या उपस्थितीत अर्ज दाखल

 

पोपट पिटेकर, अहिल्यानगर: अहिल्यानगर जिल्हा मध्यवर्ती सहकारी बँकेच्या निवडणुकीची रणधुमाळी आता रंगू लागली आहे. विविध राजकीय पक्ष आणि गटांकडून उमेदवारी अर्ज दाखल करण्याची प्रक्रिया सुरू असतानाच उपमुख्यमंत्री एकनाथ शिंदे यांच्या नेतृत्वाखालील शिवसेनेनेही या निवडणुकीत सक्रिय सहभाग घेतला आहे. संगमनेर तालुक्यातून तीन, तर शेवगावमधून एक उमेदवार मैदानात उतरवण्यात आल्याने जिल्हा बँकेतील राजकीय चुरस आणखी वाढण्याची शक्यता आहे. (Shiv Sena Candidates)

MPSC Protest : रोहित पवारांचं आंदोलन ‘पॉलिटिकल स्पॉन्सर्ड’? 200 ते 250 गाड्यांमधून कार्यकर्ते आणले’, भाजप नेत्याचा गंभीर आरोप

गेल्या काही दिवसांपासून महायुती आणि महाविकास आघाडीतील बड्या नेत्यांनी पडद्यामागून हालचाली करत, शिवसेनेला विश्वासात न घेताच ही निवडणूक बिनविरोध उरकण्याचा घाट घातला होता. मात्र, या प्रस्थापित राजकीय गणितांना सुरुंग लावत शिवसेनेच्या सर्वच प्रमुख नेत्यांनी स्वबळावर आपली ताकद दाखवण्याचा आक्रमक निर्णय घेतला आहे. यामुळे जिल्ह्याच्या सहकार क्षेत्रातील जुने मातब्बर आणि सत्ताधारी नेत्यांचे धाबे चांगलेच दणाणले आहेत.

​संगमनेर तालुक्यातून तीन प्रमुख उमेदवारांचे अर्ज दाखल

जिल्हा बँकेत सर्वसामान्य शेतकरी आणि कार्यकर्त्यांना न्याय मिळवून देण्यासाठी शिवसेनेने संगमनेर तालुक्यातून आपले तीन खंदे शिलेदार रिंगणात उतरवले आहेत. आमदार विठ्ठलराव लंघे, आमदार अमोल खताळ आणि माजी खासदार सदाशिव लोखंडे यांच्या प्रमुख उपस्थितीत उमेदवारांनी निवडणूक निर्णय अधिकाऱ्यांकडे आपले उमेदवारी अर्ज मोठ्या शक्तीप्रदर्शनाने दाखल केले. ​या अर्ज दाखल करण्याच्या प्रसंगी संगमनेर, अकोले, श्रीरामपूर तसेच शेवगाव तालुक्यातील शिवसेनेचे प्रमुख पदाधिकारी, स्थानिक लोकप्रतिनिधी आणि हजारो शिवसैनिक मोठ्या उत्साहाने उपस्थित होते.

घराणेशाही आणि मक्तेदारीविरुद्ध बंड: अरुण मुंडे ‘एनटी डी’ मधून मैदानात

जिल्हा बँकेच्या रिंगणात प्रस्थापित राजकारण्यांवर जोरदार हल्लाबोल करत शिवसेनेचे खंदे नेते अरुण मुंडे यांनी ‘एन टी डी’ मतदारसंघातून शिवसेना पॅनेलच्या वतीने आपला अधिकृत उमेदवारी अर्ज दाखल केला आहे. ​गेल्या अनेक वर्षांपासून आपल्या गावातील विकास सोसायटी अतिशय पारदर्शक आणि यशस्वीपणे चालवण्याचा दांडगा अनुभव अरुण मुंडे यांच्या पाठीशी आहे. जिल्हा बँक ही केवळ काही मोजक्या घराण्यांची वा जहागीरदारांची मालमत्ता नसून ती सर्वसामान्य शेतकरी आणि सभासदांची आहे..असा घणाघाती आरोप करत मुंडे यांनी स्थानिक सत्ताधाऱ्यांविरुद्ध एल्गार पुकारला आहे. सर्वसामान्य शेतकरी आणि तळागाळातील कार्यकर्त्यांचा बुलंद आवाज बनून ते या निवडणुकीच्या मैदानात उतरले आहेत.

सहकार क्षेत्रातील चुरस वाढली; राजकीय गणिते बदलणार?

​उपमुख्यमंत्री एकनाथ शिंदे यांच्या सूचनेनुसार शिवसेनेने जिल्ह्याच्या प्रत्येक तालुक्यातून आपले अधिकृत उमेदवार मैदानात उतरवण्याची रणनीती आखली आहे. शिवसेनेच्या या आक्रमक पवित्र्यामुळे अहिल्यानगर जिल्हा बँकेच्या निवडणुकीत आता मोठी चुरस निर्माण झाली असून आगामी काळात संपूर्ण जिल्ह्याचे राजकीय वातावरण कमालीचे तापणार असल्याचे स्पष्ट दिसत आहे

CJP Leaders Claim Arrest Plan: अभिजीत, आशुतोष, सौरवसह CJP नेत्यांना अटक करण्याचे प्लॅनिंग; बड्या नेत्याचा खळबळजनक दावा