Video : धावत्या लोकलच्या दारात लटकणाऱ्या महिलेचा थरार; पुलाच्या खांबाला साडी अडकली अन्…, रेल्वे सुरक्षेवर पुन्हा प्रश्नचिन्ह

Mumbai Local News : दिवा–सीएसएमटी लोकलच्या दारात लटकून प्रवास करणाऱ्या महिलेचा थरारक व्हिडिओ सोशल मीडियावर व्हायरल झाला आहे. धावत्या लोकलमध्ये तिची साडी रेल्वे पुलाच्या खांबाला घासल्याने काही क्षणांसाठी जीव धोक्यात आला. या घटनेनंतर रेल्वे सुरक्षेचा मुद्दा पुन्हा ऐरणीवर आला आहे.

• धावत्या लोकलच्या दारात लटकणाऱ्या महिलेचा थरार
• पुलाच्या खांबाला साडी अडकली
• रेल्वे सुरक्षेवर पुन्हा प्रश्नचिन्ह उपस्थित

Mumbai Local Viral Video News Marathi : मुंबईच्या जीवनवाहिनी असलेल्या लोकल ट्रेनमध्ये गर्दीमुळे जीव धोक्यात घालून प्रवास करण्याच्या घटना सातत्याने समोर येत आहेत. अशातच दिवा–सीएसएमटी लोकलमधील एका महिलेचा थरारक व्हिडिओ सोशल मीडियावर मोठ्या प्रमाणात व्हायरल होत आहे. व्हिडिओमध्ये संबंधित महिला धावत्या लोकलच्या दारात लटकून प्रवास करताना दिसते. याचवेळी तिची साडी रेल्वे पुलाच्या खांबाला घासते, त्यामुळे काही क्षणांसाठी अत्यंत धोकादायक परिस्थिती निर्माण होते. काही सेकंदांचा फरक पडला असता तर मोठी दुर्घटना घडली असती. सुदैवाने महिला बचावली आणि अनर्थ टळला.

Mumbai News: लोकल प्रवासावर हिंसाचाराचे सावट! किरकोळ संभाषणही सहन होईना, समाज पोहोचला ‘टिपिंग पॉइंट’ वर

या घटनेचा व्हिडिओ सोशल मीडियावर वेगाने व्हायरल होत असून, प्रवाशांच्या सुरक्षेबाबत गंभीर प्रश्न उपस्थित केले जात आहेत. रेल्वे प्रशासनाने वारंवार लोकलच्या दारात उभे राहून किंवा लटकून प्रवास करू नये, असे आवाहन केले आहे. मात्र गर्दीमुळे अनेक प्रवासी जीव धोक्यात घालून प्रवास करण्यास मजबूर असल्याची भावना प्रवासी संघटनांनी व्यक्त केली आहे.

विशेषतः सकाळी आणि संध्याकाळच्या गर्दीच्या वेळेत लोकलमधून पडून मृत्यू किंवा गंभीर जखमी होण्याच्या घटना वारंवार घडतात. त्यामुळे लोकल फेऱ्या वाढवणे, गर्दी कमी करण्यासाठी प्रभावी उपाययोजना करणे आणि प्रवाशांच्या सुरक्षिततेसाठी ठोस पावले उचलणे, अशी मागणी पुन्हा जोर धरू लागली आहे. हा व्हायरल व्हिडिओ रेल्वे प्रशासन आणि प्रवाशांसाठी गंभीर इशारा मानला जात आहे.

See more

याआधी चर्चगेट ते नालासोपारा दरम्यान धावणाऱ्या लोकल ट्रेनमध्ये २२ वर्षीय मयंक लोहारची चाकूने वार करून हत्या करण्यात आली. अंधेरी आणि बोरिवली स्टेशनच्या दरम्यान, मयंक आणि आरोपी रोशन सुवर्णा यांच्यात ट्रेनचा दरवाजा उघडा ठेवण्यावरून वाद झाला. हा वाद विकोपाला गेला आणि सहप्रवाशांनी मारहाण केल्यानंतर, रोशनने आपल्या बॅगेतून एक धारदार शस्त्र काढून मयंकवर प्राणघातक हल्ला केला. शताब्दी रुग्णालयात मयंकला मृत घोषित करण्यात आले. बोरिवली जीआरपीने आरोपीला अटक केली आहे. पीडित कुटुंब आता आरोपीला फाशीची शिक्षा आणि कुटुंबाच्या पुनर्वसनाची मागणी करत आहे.

सीटच्या वादातून कड्याने प्राणघातक हल्ला

तसेच बुधवारी रात्री सुमारे १२:०० वाजता, परळ ते अंबरनाथ दरम्यान धावणाऱ्या लोकल ट्रेनच्या जनरल डब्यात दोन प्रवाशांमध्ये सीटवरून वाद झाला. वादाचे रूपांतर हाणामारीत झाले आणि एका व्यक्तीने दुसऱ्या प्रवाशावर जड धातूच्या ब्रेसलेटने हल्ला केला. या हल्ल्यात एक प्रवासी गंभीर जखमी झाला असून त्याला सायन रुग्णालयात दाखल करण्यात आले आहे. मध्य रेल्वेचे मुख्य जनसंपर्क अधिकारी (CPRO) स्वप्निल नीला यांनी स्पष्ट केले आहे की, धारदार शस्त्राने हल्ला झाल्याच्या सोशल मीडियावरील बातम्या खोट्या आहेत. हा हल्ला केवळ एका ब्रेसलेटने करण्यात आला असून, आरोपीविरोधात गुन्हा दाखल करण्यात आला आहे.

Mumbai News: तिकीट तपासताना कोणतेही गैरवर्तन नाही! अंधेरी एसी लोकलमधील वादावर पश्चिम रेल्वेचे स्पष्टीकरण