फोटो सौजन्य सोशल मिडिया
Helping Hand Stricken Farmers : वाढदिवस म्हटलं की राजकीय नेत्यांच्या शुभेच्छांचे बॅनर, होर्डिंग्ज, जाहिराती आणि विविध कार्यक्रमांवर मोठ्या प्रमाणात खर्च केला जातो. मात्र, या पारंपरिक पद्धतीला छेद देत मिरा-भाईंदर शहरातील भाजपचे गटनेते व प्रमुख नेते हसमुख गेहलोत यांनी आपल्या वाढदिवसानिमित्त सामाजिक बांधिलकी जपणारा अनोखा उपक्रम हाती घेतला आहे. महाराष्ट्रातील दुष्काळग्रस्त भागातील शेतकऱ्यांसाठी मदतीचा हात देण्यासाठी त्यांनी कार्यकर्त्यांना वाढदिवसाच्या शुभेच्छांचा खर्च सामाजिक कार्यासाठी वळविण्याचे आवाहन केले आहे.
गेहलोत यांनी आपल्या कार्यकर्त्यांना स्पष्टपणे सांगितले आहे की, “माझ्या वाढदिवसानिमित्त कुठेही बॅनर, पोस्टर किंवा होर्डिंग लावू नका. त्याऐवजी सोशल मीडियाच्या माध्यमातून मला शुभेच्छा द्या.” विशेष म्हणजे या शुभेच्छांच्या पोस्टमध्ये ‘शेतकरी आपला अन्नदाता’ हा हॅशटॅग वापरण्याचे आवाहन करण्यात आले आहे.
या उपक्रमाची आणखी एक महत्त्वाची बाजू म्हणजे सोशल मीडियावर त्यांच्या वाढदिवसानिमित्त करण्यात येणाऱ्या प्रत्येक शुभेच्छा पोस्टमागे 500 रूपये शेतकऱ्यांच्या मदतीसाठी जमा करण्याची ग्वाही गेहलोत यांनी दिली आहे. त्यामुळे वाढदिवसाच्या शुभेच्छांचे रूपांतर थेट शेतकऱ्यांच्या मदतीत करण्याचा प्रयत्न या माध्यमातून करण्यात येत आहे.
राजकीय क्षेत्रात वाढदिवसानिमित्त होणारा अनावश्यक खर्च, मोठमोठे बॅनर आणि शक्तिप्रदर्शन यावर अनेकदा टीका केली जाते. अशा परिस्थितीत गेहलोत यांनी बॅनरबाजी टाळून त्याऐवजी दुष्काळग्रस्त शेतकऱ्यांच्या मदतीला प्राधान्य देण्याचा घेतलेला निर्णय चर्चेचा विषय ठरत आहे. “शेतकरी हा समाजाचा अन्नदाता आहे. त्याच्यावर संकट आले असताना आपल्या आनंदाच्या प्रसंगी त्याच्या मदतीसाठी काही करता आले, तर त्यापेक्षा मोठे सामाजिक कार्य दुसरे कोणते?” असा संदेश या उपक्रमातून देण्यात येत आहे.
गेहलोत यांच्या या उपक्रमामुळे राजकीय नेत्यांनी वाढदिवस, जयंती अथवा अन्य वैयक्तिक कार्यक्रमांवर होणारा खर्च सामाजिक उपक्रमांकडे वळविण्याचा आदर्श घ्यावा, अशी अपेक्षा व्यक्त होत आहे. विशेषतः दुष्काळग्रस्त भागातील शेतकऱ्यांना मदतीची गरज असताना ‘वाढदिवसाचा उत्सव’ हा ‘शेतकरी मदतीचा उपक्रम’ बनविण्याची संकल्पना राजकीय क्षेत्रासाठी निश्चितच अनुकरणीय ठरू शकते.
मिरा-भाईंदरमध्ये सुरू झालेला हा उपक्रम केवळ एका नेत्याच्या वाढदिवसापुरता मर्यादित न राहता इतर राजकीय पक्ष आणि लोकप्रतिनिधींनीही स्वीकारल्यास त्यातून मोठ्या प्रमाणावर शेतकरी मदत निधी उभा राहू शकतो. त्यामुळे “बॅनर नको, शेतकऱ्यांना मदत हवी” हा संदेश राजकीय क्षेत्रात रुजण्याची गरज असल्याचे मत नागरिकांकडून व्यक्त होत आहे.
.png "Videos"){kind=small}
