Ganpati Special Train: कोकणातील चाकरमान्यांसाठी खुशखबर! दादरहून सुटणार ‘मोदी एक्सप्रेस’; जाणून घ्या वेळ, थांबे अन् बुकिंग

Ganpati Special Train: गणेशोत्सवासाठी मुंबईहून कोकणात जाणाऱ्या चाकरमान्यांसाठी यंदाही ‘मोदी एक्सप्रेस’ धावणार आहे. सिंधुदुर्गचे पालकमंत्री नितेश राणे यांनी दिलेल्या माहितीनुसार, 9 आणि 11 सप्टेंबर रोजी सकाळी 10.30 वाजता दादर येथील प्लॅटफॉर्म क्रमांक 14 वरून ही विशेष ट्रेन रवाना होणार आहे.

• गणेशोत्सवासाठी ‘मोदी एक्सप्रेस’ पुन्हा सज्ज
• 9 आणि 11 सप्टेंबरला मुंबईहून कोकणात धावणार
• प्रवाशांना जेवण-पाण्याचीही सुविधा

Ganpati Special Train: गणेशोत्सवासाठी मुंबईतून कोकणातील आपल्या गावी जाणाऱ्या चाकरमान्यांसाठी महत्त्वाची बातमी आहे. यंदाही गणेशभक्तांच्या सेवेसाठी ‘मोदी एक्सप्रेस’ (Modi Express 2026) सज्ज झाली आहे. येत्या 9 आणि 11 सप्टेंबर रोजी मुंबईतील दादर येथून ही विशेष ट्रेन कोकणाच्या (Ganpati Special Train) दिशेने रवाना होणार असल्याची माहिती राज्याचे मंत्री तथा सिंधुदुर्गचे पालकमंत्री नितेश राणे यांनी दिली आहे.

गेल्या 14 वर्षांपासून गणेशोत्सवाच्या काळात मुंबईतील चाकरमान्यांना कोकणातील आपल्या गावी पोहोचवण्यासाठी ‘मोदी एक्सप्रेस’ची व्यवस्था केली जात आहे. ही परंपरा यंदाही कायम ठेवण्यात आली आहे. नितेश राणे यांनी गणेशभक्त आणि चाकरमान्यांना या विशेष ट्रेनच्या सुविधेचा लाभ घेण्याचे आवाहन केले आहे.

Ganesh Idol Price Hike : गणेशोत्सवाला महागाईची झळ! बाप्पाच्या मूर्तींचे दर कडाडले, तब्बल 30 टक्क्यांची वाढ

9 आणि 11 सप्टेंबरला धावणार ‘मोदी एक्सप्रेस’

नितेश राणे यांनी दिलेल्या माहितीनुसार, यंदा ‘मोदी एक्सप्रेस’ 9 आणि 11 सप्टेंबर रोजी मुंबईतून कोकणासाठी रवाना होणार आहे. दोन्ही दिवशी सकाळी 10.30 वाजता दादर येथील प्लॅटफॉर्म क्रमांक 14 वरून ट्रेनचा प्रवास सुरू होणार असल्याचे सांगण्यात आले आहे.

गणेशोत्सवाच्या काळात मुंबई, ठाणे आणि आसपासच्या भागातून मोठ्या संख्येने चाकरमानी कोकणातील आपल्या मूळ गावी जातात. या काळात रेल्वे आणि रस्ते वाहतुकीवर मोठा ताण असतो. त्यामुळे ‘मोदी एक्सप्रेस’मुळे काही प्रवाशांना अतिरिक्त प्रवासाचा पर्याय उपलब्ध होणार आहे.

कुठे असणार थांबे?

मुंबईतील दादर येथून रवाना झाल्यानंतर ‘मोदी एक्सप्रेस’ कोकणातील प्रमुख ठिकाणी थांबणार आहे. उपलब्ध माहितीनुसार ट्रेनला रत्नागिरी, वैभववाडी, कणकवली आणि सावंतवाडी येथे थांबे देण्यात येणार आहेत. त्यामुळे सिंधुदुर्ग आणि रत्नागिरी जिल्ह्यांतील विविध भागांत जाणाऱ्या गणेशभक्तांना या विशेष ट्रेनचा फायदा होणार आहे.

तिकीट बुकिंग कधी?

‘मोदी एक्सप्रेस’मधून प्रवास करू इच्छिणाऱ्या चाकरमान्यांसाठी 2 सप्टेंबर ते 5 सप्टेंबर या कालावधीत तिकीट बुकिंगची प्रक्रिया राबवण्यात येणार असल्याची माहिती देण्यात आली आहे. कणकवली, देवगड आणि वैभववाडी भागातील प्रवाशांनी तिकीट बुकिंगसाठी संबंधित भाजप मंडळ अध्यक्षांशी संपर्क साधावा, असे आवाहन करण्यात आले आहे. रत्नागिरी थांब्यासाठी जिल्हाध्यक्ष प्रशांत यादव यांच्याशी संपर्क साधता येणार असल्याचेही सांगण्यात आले आहे.

खाणे आणि पाण्याचीही व्यवस्था

गणेशोत्सवासाठी गावाकडे निघालेल्या चाकरमान्यांचा प्रवास सुखकर व्हावा, यासाठी ट्रेनमध्ये आवश्यक सुविधा उपलब्ध करून देण्यात येणार आहेत. प्रवाशांसाठी खाण्यापिण्याची तसेच पिण्याच्या पाण्याची व्यवस्था करण्यात येणार असल्याची माहिती नितेश राणे यांनी दिली.

14 वर्षांची परंपरा यंदाही कायम

गणेशोत्सव आणि कोकणातील चाकरमानी यांचे विशेष नाते आहे. मुंबईत नोकरी-व्यवसायासाठी स्थायिक झालेले हजारो कोकणवासीय गणपतीच्या दिवसांत आवर्जून आपल्या गावी परततात. त्यामुळे या काळात कोकणाकडे जाणाऱ्या रेल्वे गाड्यांना मोठी गर्दी असते. गेल्या 14 वर्षांपासून चाकरमान्यांसाठी ‘मोदी एक्सप्रेस’ची व्यवस्था करण्यात येत असल्याचे नितेश राणे यांनी सांगितले. यंदाही ही परंपरा कायम ठेवत दोन दिवशी विशेष ट्रेन चालवण्यात येणार आहे.

नाचत-गाजत गणपती बाप्पाचे स्वागत करण्यासाठी गावाकडे जाणाऱ्या चाकरमान्यांचा प्रवास अधिक सुखकर आणि उत्साहपूर्ण करण्याच्या उद्देशाने ‘मोदी एक्सप्रेस’ पुन्हा एकदा सज्ज झाली आहे.

Pune Ganeshotsav: ‘रूप पाहता लोचनी’! ‘वृक्ष गणपती’ ते…’; पुण्याच्या बाजारात अवतरली बाप्पाची विविध मनमोहक रूपे