Sarnaik MMRDA Diwali Bonus
भाईंदर : मुंबई महानगर प्रदेश विकास प्राधिकरणाच्या (MMRDA) अखत्यारीतील मेट्रो आणि मोनोरेल स्थानकांवर कार्यरत असलेल्या ५५४ कंत्राटी सुरक्षा रक्षकांना कामावरून कमी करण्याच्या प्रकरणात परिवहन मंत्री प्रताप सरनाईक यांनी हस्तक्षेप केला आहे. त्यांच्या आक्रमक भूमिकेनंतर संबंधित सुरक्षा रक्षकांना पुन्हा सेवेत रुजू करून घेण्यासह दोन महिन्यांचे थकीत वेतन, कामावरून दूर ठेवलेल्या ७ ते ८ दिवसांचा पगार आणि दिवाळी बोनस देण्याचे निर्देश देण्यात आल्याची माहिती समोर आली आहे. (Pratap Sarnaik)
मुंबई मेट्रो लाईन ७, २A, ९, २B तसेच मुंबई मोनोरेलच्या ५१ स्थानकांवर सुमारे ५५४ सुरक्षा रक्षक कार्यरत आहेत. संबंधित कंत्राटदाराने १ ऑक्टोबर २०२६ पासून कोणतीही कायदेशीर नोटीस न देता केवळ व्हॉट्सॲप संदेशाद्वारे या कर्मचाऱ्यांना कामावरून कमी केल्याचा आरोप आहे. त्यामुळे अनेक कामगारांच्या कुटुंबांवर आर्थिक संकट ओढवले होते. अन्यायग्रस्त SISPL सुरक्षा रक्षकांनी मंत्री प्रताप सरनाईक यांच्याकडे धाव घेत मदतीची मागणी केली.
कामगारांच्या तक्रारीची गंभीर दखल घेत सरनाईक यांनी MMRDA महानगर आयुक्त डॉ. संजय मुखर्जी यांच्याशी संपर्क साधून या प्रकरणी तातडीने कार्यवाही करण्याची मागणी केली. कोणत्याही कामगारावर अन्याय सहन केला जाणार नाही, अशी ठाम भूमिका त्यांनी घेतली. सर्व ५५४ सुरक्षा रक्षकांना पुन्हा सेवेत सामावून घेणे, थकीत वेतन अदा करणे आणि दिवाळी बोनस देण्याबाबत त्यांनी निर्देश दिल्याचे सांगण्यात आले.
या प्रकरणात शिवसेनेच्या महिला जिल्हा संघटक निशा नार्वेकर, भाईंदर पूर्व शहर समन्वयक मनोज राणे आणि मिरा रोड शहरप्रमुख संतोष गोळे यांनी कामगारांच्या बाजूने पाठपुरावा केला.
“कामगारांच्या हक्कांची पायमल्ली आणि कंत्राटदारांची दडपशाही सहन केली जाणार नाही. कामगारांचा हक्क आणि सन्मान जपण्यासाठी आम्ही सदैव तत्पर आहोत,” अशी भूमिका मंत्री सरनाईक यांनी मांडली. या हस्तक्षेपामुळे सुरक्षा रक्षकांना दिलासा मिळाल्याचे सांगण्यात येत आहे.
Shivaji Park CJP Protest : मुंबईत शिवाजी पार्कवर CJP चं आंदोलन, पोलिसांचा मोठा बंदोबस्त तैनात
.png "Videos"){kind=small}
