Nagpur News : २५ हजार पगार, हातात १५ हजार! विकास ठाकरे आक्रमक; दोषींवर गुन्ह्याची मागणी

Nagpur News : नागपुरात २५ हजार रुपये पगार मंजूर असताना कर्मचाऱ्यांच्या हातात केवळ १५ हजार रुपये मिळत असल्याच्या मुद्द्यावर आमदार विकास ठाकरे आक्रमक झाले आहेत. या प्रकरणात एजी एन्व्हायरो, सुरक्षा एजन्सी, संबंधित बँक आणि दोषी मनपा अधिकाऱ्यांवर गुन्हा दाखल करण्याची मागणी करण्यात आली आहे.

• विनापरवानगी बँक खाती आणि वेतनावर दरोडा
• मुख्य मागण्या
• आवाज उठवला म्हणून पगार रोखला
• मनपाच्या संशयास्पद भूमिकेवर प्रश्नचिन्ह

Nagpur News : कचरा संकलनाचे काम करणाऱ्या ‘एजी एन्व्हायरो’ कंपनीने सुरक्षा एजन्सी आणि मनपा अधिकाऱ्यांशी संगनमत करून १७ सुरक्षा रक्षकांच्या नावावर त्यांची परवानगी न घेताच परस्पर बैंक खाती उघडल्याचा खळबळजनक आरोप काँग्रेस आमदार विकास ठाकरे यांनी केला आहे. या खात्यांमधून कोट्यवधींचे संशयास्पद व्यवहार करण्यात आले असून, सुरक्षारक्षकांना ठरलेल्या वेतनापेक्षा दरमहा हजारो रुपये कमी देऊन आर्थिक फसवणूक करण्यात आली असल्याचाही आरोप आहे.

वेतनातील तफावत: कंत्राटाच्या नियमानुसार प्रत्येक सुरक्षारक्षकाला दरमहा २५,६०० रुपये वेतन मिळणे बंधनकारक होते, मात्र प्रत्यक्षात हाती पडलेली रक्कम कर्मचाऱ्यांना केवळ १५,५०० रुपये दिले जात होते.
वार्षिक अपहार त्यामुळे १७ सुरक्षारक्षकांचे दरमहा १,७१,७०० रुपये म्हणजेच वर्षाला तब्बल २०,६०,४०० रुपये हडपण्यात आले.

विनापरवानगी बँक खाती आणि वेतनावर दरोडा

पीडित सुरक्षा रक्षकांच्या शिष्टमंडळाने आमदार विकास ठाकरे यांची भेट घेऊन या गैरप्रकाराची पोलखोल केली. नोव्हेंबर २०१९ पासून ‘आर्मर सिक्युरिटी इंडिया लिमिटेड’ या एजन्सीने सूर्योदय स्मॉल फायनान्स बैंकेत (बडीं शाखा) सुरक्षारक्षकांची कोणतीही संमती नसताना त्यांच्या नावाने खाती उघडली.

लग्नात मिळालेल्या दागिन्यांवर पतीचा हक्क नाही; घटस्फोटानंतर पत्नीला सर्व ‘स्त्रीधन’ परत द्या; हायकोर्टाचा आदेश

मुख्य मागण्या

संपूर्ण कंत्राट कालावधीतील सर्व आर्थिक व्यवहारांचे तात्काळ विशेष ऑडिट करण्यात यावे. बनावट खाती उघडणारी सुरक्षा एजन्सी, एजी एन्व्हायरो, सूर्योदय बैंक आणि मनपाच्या दोषी अधिकाऱ्यांवर तात्काळ गुन्हे दाखल करावेत. कर्मचाऱ्यांना त्यांच्या हक्काच्या वेतनाची थकीत रक्कम व्याजासह त्वरित अदा करण्यात यावी.

आवाज उठवला म्हणून पगार रोखला

मे २०२६ मध्ये जेव्हा सुरक्षारक्षकानी या अन्यायाविरोधात आवाज उठवला, तेव्हा एजन्सीने सुडाचे राजकारण करत त्यांचे वेतनच रोखून धरले, पगार न मिळाल्याने जून २०२६ पासून या कर्मचा-यांवर काम बंद करण्याची वेळ आली.

Nagpur Health : रुग्णांच्या जीवाशी खेळाल तर कारवाई अटळ; आरोग्य विभागाचा इशारा

मनपाच्या संशयास्पद भूमिकेवर प्रश्नचिन्ह

मनपा ही ‘मुख्य नियोक्ता’ असताना कंत्राटदार कंपनी कामगार कायद्यांचे पालन करतेय की नाही, याची कोणतीही तपासणी अधिकाऱ्यांनी केली नाही. इतकेच नव्हे तर वाद निर्माण झाल्यानंतर एजी एन्व्हायरोने जुन्याच मालकांशी संबंधित असलेल्या ‘एलिट सिक्युरिटास’ या दुसऱ्या एजन्सीला कंत्राट दिले. केवळ नाव बदलून तोच गैरप्रकार सुरू ठेवण्यात आल्याचा संशय आमदार ठाकरे यांना आहे.