Nagpur News : नागपुरात डीजे बंदीचा कडकडाट; आदेशावरून वातावरण तापले

Nagpur News : नागपुरात डीजे आणि उच्च क्षमतेच्या साऊंड सिस्टिमवर पोलिसांनी बंदी घातल्याने उत्सवाच्या पार्श्वभूमीवर वातावरण तापले आहे. ध्वनिप्रदूषणाला आळा घालण्यासाठी घेतलेल्या या निर्णयामुळे डीजे व्यावसायिक आणि आयोजकांमध्ये नाराजी निर्माण झाली असून, बंदीच्या आदेशावरून चर्चा आणि विरोधाचे सूर उमटत आहेत.

• चळवळ धर्माच्या उत्सवाच्या विरोधात नाही
• मध्यम मार्ग काढा DJ व्यवसाय
• हे आम्ही खपवून घेणार नाही
• DJ वाजवणारच – विश्व हिंदू परिषद

Nagpur News – डीजेवर बंदी घालावी की नको, यावरून भाजपच्या आजी-माजी आमदारांत जोरदार घमासान सुरू झाले आहे. नागपुरात डीजे बंदीवरून आजी-माजी आमदारांसह, विश्व हिंदू परिषदही आक्रमक झाली आहे. आनंदाच्या नावाखाली होणारा कर्णकर्कश डीजे, ध्वनिप्रदूषण आणि लेजर लाईटचा अतिरेक थांबला पाहिजे, अशी भूमिका घेत भाजपचे माजी आमदार संदीप जोशी यांनी लोकचळवळ उभारली आहे.

तर हिंदू सणांच्या तोंडावरच डीजेवर बंदी का, असा सवाल भाजपचेच विद्यमान आमदार प्रवीण दटके यांनी केला आहे. तिकडे विश्व हिंदू परिषदेनेही डीजे बंदीला विरोध केला आहे. विहिंप म्हणते की काहीही होवो, आम्ही आमच्या सणांना डीजे वाजवणारच. तर या बंदीने डीजे व्यावसायिकांवर कुऱ्हाड कोसळणार आहे.

Ganeshotsav 2026: गणेशोत्सवात DJ-लेझरला ‘नो एन्ट्री’! विश्वास नांगरे पाटलांचा मोठा निर्णय; नियम मोडल्यास थेट कारवाई

चळवळ धर्माच्या उत्सवाच्या विरोधात नाही

डीजेवरील बंदीसाठी व्यापक जनचळवळ उभारली असून, चळवळीचा पहिला टप्पा म्हणून ऑनलाईन पेटिशनद्वारे नागरिकांचा सहभाग नोंदवण्यात येत आहे. ही चळवळ कोणत्याही धर्माच्या, उत्सवाच्या किंवा समाजाच्या विरोधात नाही. मात्र, एकाच्या किंवा समूहाच्या आनंदासाठी दुसऱ्यांच्या आरोग्याशी आणि शांततेशी तडजोड होऊ नये. त्यासाठी टप्प्याटप्प्याने चळवळ चालवली जाणार आहे, असे संदीप जोशी यांनी म्हटले आहे.

मध्यम मार्ग काढा DJ व्यवसाय

आम्ही अनेक गणेश, दुर्गादेवी मंडळांकडून अग्रीम रक्कम घेऊन लाखोंचे साहित्य विकत घेतले आणि अचानक बंदी आणली तर आम्ही बरबाद होऊन जाऊ, असे डीजे-साऊंड सिस्टीम संघटनेचे म्हणाणे आहे. कारण, एका डीजे व्यावसायिकावर ३००-४०० लोक अवलंबून असतात. काम करणारी मुले, मेस वाल्या महिला, ट्रान्सपोर्टच्या गाड्या, डेकोरेशन, जनरेटर आदी व्यवसाय अवलंबून असतात.

डीजेवर बंदी आणणे, हा उपाय नाही तर यातून मध्यम मार्ग काढला पाहीजे, अशी भूमिका डीजे आणि साऊंड सिस्टम व्यावसायिक रविकांत पवनीपगार, नंदन गजेंद्रगडेकर, कमलेश भांडेकर, स्वप्निल सुले, किरण घाडोले आणि निखिल कामडे यांनी मांडली.

Ganeshotsav 2026: गणेशमूर्तीच्या सोंडेची दिशा काय सांगते? उजव्या सोंडेच्या बाप्पाच्या पूजेत का पाळतात कडक नियम?

हे आम्ही खपवून घेणार नाही

डीजे बंदीच्या पोलिस आयुक्तांच्या आदेशावर आमदार प्रवीण दटके यांनी आक्रमक भूमिका घेतली आहे. बंदीला आमचा विरोध नाही, मात्र, हा आदेश फक्त हिंदूंच्या सणांच्या आधीच का, असा सवाल त्यांनी उपस्थित केला आहे. इतर जाती-धर्माच्या सणांच्या वेळी असा आदेश का काढला गेला नाही, असा थेट सवाल त्यांनी पोलिस प्रशासनाला केला आहे. हे आम्ही खपवून घेणार नाही, असा इशाराही त्यांनी दिला आहे. पोलिस आयुक्तांनी हे परिपत्रक मागे घ्यावे, अशी मागणी आमदार दटकेंनी केली आहे.

DJ वाजवणारच – विश्व हिंदू परिषद

ईदपूर्वी डीजे बंदी करा, अशी मागणी पोलिस आयुक्त विश्वास नागरे पाटील यांना आम्ही केली होती. त्यावेळी कोणतीही पावले उचलली नाही. आता हिंदू सणांपूर्वीच डीजे बंदी केली. याला आमचा विरोध आहे, असे विश्व हिंदू परिषद नागपूरचे मंत्री अमोल ठाकरे यांनी म्हटले आहे. गुन्हे दाखल झाले तरी चालेल, पण सहा तारखेला जन्माष्टमीला शोभायात्रेत डीजे वाजवणारच, असे त्यांनी ठणकावून सांगितले.