Ashok Kharat प्रकरणात नाशिक पोलिसांची हाताची घडी, SIT चे तोंडावर बोट; बड्या धेंडांना वाचवण्याचा प्रयत्न की राजकीय स्वार्थ ?
विशेष पोलीस महानिरीक्षक मनोजकुमार शर्मा यांच्या आदेशान्वये १३ मार्च रोजी एसआयटीची स्थापना करण्यात आली. १९ मार्चपासून हे पथक नाशिकच्या महाराष्ट्र पोलीस अकादमीत ठाण मांडून आहे. मात्र, तपासाबाबत ज्या प्रकारे न्यायालयात बचाव पक्षाकडून प्रश्न उपस्थित केले जात आहेत, तसेच संशय आता जनमानसातही बळावू लागला आहे.
खरातविरुद्ध आतापर्यंत १२ गंभीर गुन्हे दाखल झाले असून, त्यात ८ लैंगिक अत्याचार, सावकारी, खंडणी आणि फसवणुकीचा समावेश आहे. या प्रकरणाची व्याप्ती केवळ बलात्कारापुरती मर्यादित नाही, हे शिर्डी पोलिस ठाण्यात या वर्षांच्या सुरूवातीला दाखल झालेल्या एका खंडणीच्या गुन्ह्यातून स्पष्ट झाले आहे. असे असतानाही ही माहिती दडवून एसआयटी नेमके काय साध्य करू पाहत आहे, असा सवाल विचारला जात आहे.
या गुन्ह्यात अनेक बड़े राजकीय नेते, सनदी अधिकारी तसेच उद्योगपतींचा प्रत्यक्ष-अप्रत्यक्ष संबंध असल्याची चर्चा आहे. हा संबंध उघड करण्याची जबाबदारी असलेल्या एसआयटी प्रमुख तेजस्वी सातपुते या मागील १८ मार्चपासून या प्रकरणापासून चार हात दूर आहेत की काय, अशी शंका उपस्थित होत आहे. न्यायालयात अनेकदा तपास अधिकारी दडपणाखाली असल्याचे दिसून आले आहे. दुसरीकडे, शिर्डी पोलीस तपासाची माहिती माध्यमांना नियमितपणे देत असताना नाशिकमध्येच कमालीची गोपनीयता पाळली जात असल्याने या विरोधाभासामागील नेमके कारण काय, असा प्रश्न नागरिक विचारत आहेत.
राज्याचे मुख्यमंत्री तथा गृहमंत्री देवेंद्र फडणवीस यांनी या प्रकरणात कठोर कारवाईचे आदेश दिले आहेत. मुख्यमंत्र्यांनी यातील आर्थिक गैरव्यवहाराचा तपास ‘ईडी’ (सक्त वसुली संचालनालय) करणार असल्याचे जाहीर केले आहे. मात्र, अत्याचार आणि आर्थिक गुन्ह्यांच्या तपासाची विभागणी नेमकी कशी असेल, यावर स्पष्टता नाही. गृहमंत्र्यांचे स्पष्ट निर्देश असतानाही एसआयटीने तपासाभोवती निर्माण केलेले ‘गूढ वलय गुन्हेगारांना मदत करण्यासाठी आहे की मोठ्या धेंडांना वाचवण्यासाठी? या प्रकरणाचा वापर केवळ राजकीय स्वार्थासाठी होऊ नये, अशी अपेक्षा सर्वसामान्यांकडून व्यक्त केली जात आहे.
नरबळी आणि गर्भपातः बलात्काराच्या गुन्ह्यात नरबळीसारखा गंभीर मुद्दा समोर आला होता. गर्भपात प्रकरणी डॉक्टरांची चौकशी झाल्याचे सांगितले जाते, मात्र एसआयटीने यावर मौन का पाळले आहे?
ललित पोफळेचे काय झाले? या प्रकरणातील महत्त्वाचा दुवा मानल्या जाणाऱ्या ललित पोफळेबाबत अद्याप कोणताही अधिकृत खुलासा करण्यात आलेला नाही.
नाशिक पोलिसांना मज्जावः खरातविरुद्ध दाखल होणाऱ्या गुन्ह्यांची माहिती नाशिक शहर पोलिसांना देण्यासही मज्जाव करण्यात आल्याची कुजबूज पोलीस वर्तुळात आहे.
.png "Videos"){kind=small}
