
गोल्डी बराडला पकडण्यासाठी कॅनडाचे मोठे बक्षीस; माहिती देणाऱ्याला २.५ लाख कॅनेडियन डॉलर मिळणार
गोल्डी बराडचे खरे नाव सतिंदरजीत सिंह असून कॅनडातील विन्निपेग येथे झालेल्या सुखदूल सिंह गिल यांच्या हत्येप्रकरणी त्याच्यावर गंभीर आरोप आहेत. २० सप्टेंबर २०२३ रोजी सकाळी सुमारे १० वाजण्याच्या सुमारास विन्निपेगच्या उत्तर-पश्चिम भागातील हेजलटन ड्राइव्ह परिसरातील एका घरात गोळीबार झाला होता. या घटनेची माहिती मिळताच पोलिसांनी घटनास्थळी धाव घेतली. त्यावेळी ३९ वर्षीय सुखदूल सिंह गिल यांचा मृतदेह आढळला होता.
या प्रकरणाचा तपास विन्निपेग पोलिसांच्या होमिसाइड युनिटने सुरू केला. या तपासात रॉयल कॅनेडियन माउंटेड पोलिस (RCMP), मॅनिटोबा जस्टिस आणि इतर तपास यंत्रणांनीही सहकार्य केले. तपासानंतर गोल्डी बराड आणि त्याचा साथीदार करनबीर सिंह यांच्याविरोधात कारवाईची प्रक्रिया सुरू झाली.
२३ फेब्रुवारी २०२६ रोजी या दोघांविरोधात फर्स्ट डिग्री मर्डर म्हणजेच प्रथम श्रेणीतील हत्या आणि हत्येचा कट रचल्याचे आरोप निश्चित करण्यास मंजुरी देण्यात आली. त्यानंतर दोघांविरोधात अटक वॉरंट जारी करण्यात आले. पोलिसांच्या माहितीनुसार, गोल्डी बराडचे वय ३२ वर्षे, तर करनबीर सिंहचे वय २६ वर्षे आहे. दोघेही सशस्त्र आणि धोकादायक असू शकतात, असा इशारा पोलिसांनी नागरिकांना दिला आहे. त्यामुळे त्यांच्याबाबत कोणतीही माहिती मिळाल्यास स्वतःहून त्यांच्याशी संपर्क साधण्याऐवजी थेट पोलिसांना माहिती देण्याचे आवाहन करण्यात आले आहे.
कॅनडाप्रमाणेच अमेरिकेतही गोल्डी बराडविरोधात कारवाई सुरू आहे. ७ जुलै २०२६ रोजी अमेरिकेच्या अटर्नी कार्यालयाने ‘ऑपरेशन हार्ड बॉल’च्या कारवाईची माहिती दिली होती. यामध्ये लॉरेन्स बिश्नोईच्या संघटित गुन्हेगारी टोळीतील भूमिकेबद्दल गोल्डी बराडवर आरोप करण्यात आल्याची माहिती समोर आली आहे. २९ सप्टेंबर २०२६ रोजी FBI ने गोल्डी बराडला आपल्या टॉप-१० मोस्ट वॉन्टेड फरार आरोपींच्या यादीत समाविष्ट केल्याची माहिती समोर आली होती. त्याच्या अटकेसाठी मदत करणारी माहिती देणाऱ्याला १० लाख अमेरिकन डॉलरपर्यंतचे बक्षीस जाहीर करण्यात आले आहे.
विन्निपेग पोलिसांचे डेप्युटी चीफ कॅम मॅककिड यांनी अशा प्रकारच्या हिंसाचाराला कॅनडामध्ये थारा दिला जाणार नसल्याचे स्पष्ट केले. नागरिकांची सुरक्षितता राखण्यासाठी आणि हिंसक गुन्ह्यांना आळा घालण्यासाठी तपास यंत्रणा सातत्याने काम करत राहतील, असे त्यांनी सांगितले.
गोल्डी बराड आणि करनबीर सिंह यांच्याबाबत माहिती असलेल्या नागरिकांनी पोलिसांशी संपर्क साधावा, असे आवाहन करण्यात आले आहे. यासाठी पोलिसांनी (431) 334-9160 हा संपर्क क्रमांक जारी केला आहे. अमेरिका आणि कॅनडा या दोन्ही देशांमध्ये गोल्डी बराडविरोधात शोधमोहीम सुरू असल्याने त्याच्या अटकेबाबत आंतरराष्ट्रीय तपास यंत्रणांच्या पुढील हालचालींकडे लक्ष लागले आहे.
Ans: कॅनडाच्या BOLO Program ने गोल्डी बराडला टॉप-२५ मोस्ट वॉन्टेड गुन्हेगारांच्या यादीत पहिला क्रमांक दिला आहे. ही घोषणा १९ नोव्हेंबर २०२६ रोजी करण्यात आली.
Ans: गोल्डी बराडच्या अटकेसाठी उपयुक्त माहिती देणाऱ्याला २.५ लाख कॅनेडियन डॉलर म्हणजेच सुमारे २.३३ कोटी रुपयांपर्यंतचे बक्षीस दिले जाणार आहे. हे बक्षीस २ नोव्हेंबर २०२७ पर्यंत उपलब्ध आहे.
Ans: कॅनडातील विन्निपेग येथे २० सप्टेंबर २०२३ रोजी झालेल्या सुखदूल सिंह गिल यांच्या हत्येप्रकरणी गोल्डी बराडवर फर्स्ट डिग्री मर्डर आणि हत्येचा कट रचल्याचे आरोप आहेत.