मुंबई : गेल्या काही दिवसांपासून महाराष्ट्रातील राजकारणात अनेक उलथापालथ होताना दिसत आहे. महाविकास आघाडी सरकार अस्थिर करण्याचा प्रयत्न सुरु असताना आता विधानसभेचे उपाध्यक्ष नरहरी झिरवळ यांच्याविरोधात अविश्वास प्रस्ताव दाखल झाल्याची माहिती दिली जात आहे. त्यानंतर आता महाराष्ट्रातील राजकारणात नवा अध्याय पाहिला मिळत आहे.
काँग्रेसचे प्रदेशाध्यक्ष नाना पटोले यांनी विधानसभेच्या अध्यक्षपदाचा राजीनामा दिल्यानंतर अध्यक्षपद रिक्त झाल्याने उपाध्यक्षच विधानसभेची जबाबदारी पाहत आहेत. पण आता त्यांच्याच विरोधात अविश्वास प्रस्ताव दाखल झाल्याचे सांगितले जात आहे.
कोण आहेत नरहरी झिरवाळ?
राष्ट्रवादी काँग्रेसचे अध्यक्ष शरद पवार यांच्या जवळचे आणि विश्वासू कार्यकर्ते म्हणून नरहरी झिरवळ यांची ओळख आहे. नाशिक जिल्ह्यातील दिंडोरी विधानसभा मतदारसंघाचे नरहरी झिरवळ आमदार आहेत. दिंडोरी तालुक्यातील वनारे हे त्यांचे मूळ गाव. आदिवासी बहुल भागातील जनतेचे ते प्रतिनिधित्व करतात.
