गणेशोत्सवामध्ये लाऊडस्पीकर मर्यादेतच वाजवा! पुण्यातील बापटनंतर ठाण्यात डॉ. महेश बेडेकर यांची भूमिका
Thana News: गणेशोत्सवादरम्यान डीजेवर बंदी आणावी, हा मुद्दा पुण्यातील बापट यांनी उपस्थित केला होता. आता ठाण्यातही अशाच प्रकारची मागणी जोर धरू लागली असून, जनहित याचिकाकर्ते डॉ. महेश बेडेकर यांनी लाऊडस्पीकर मर्यादेतच वाजवा, अशी मागणी केली आहे. गणेशोत्सव व नवरात्रोत्सवाच्या पार्श्वभूमीवर शहरात होणारे ध्वनिप्रदूषण आणि रस्ते-पादचारी मार्ग अडवून उभारण्यात येणारे अनधिकृत मंडप रोखण्यासाठी मुंबई उच्च न्यायालयाने दिलेल्या आदेशांची प्रभावी अंमलबजावणी करावी, अशी मागणी बेडेकर यांनी सरकारकडे केली आहे. नियमभंग झाल्यानंतर किंवा नागरिकांच्या तक्रारी आल्यानंतर कारवाई करण्यापेक्षा प्रशासनाने स्वतःहून पुढे येऊन उत्सव सुरू होण्यापूर्वीच प्रतिबंधात्मक पावले उचलावीत, असे त्यांनी प्रशासनाला दिलेल्या पत्रात सांगितले आहे.(फोटो सौजन्य – istock)
सण-उत्सवांच्या काळात डीजे, लाऊडस्पीकरमुळे होणारा कानठळ्या बसवणारा आवाज आणि पदपथ व्यापून उभारण्यात येणाऱ्या बेकायदा मंडपांविरोधात डॉ. महेश बेडेकर यांनी २०१० मध्ये मुंबई उच्च न्यायालयात जनहित याचिका दाखल केली होती. या याचिकेवर न्यायालयाने वेळोवेळी महत्त्वपूर्ण मार्गदर्शक तत्त्वे व कडक निर्देश जारी केले आहेत. या निर्देशांचे पालन व्हावे यासाठी डॉ. बेडेकर यांनी राज्याचा गृह विभाग, पर्यावरण विभाग, पोलीस महासंचालक, ठाणे पोलीस आयुक्त, पालिका आयुक्त, जिल्हाधिकारी आणि महाराष्ट्र प्रदूषण नियंत्रण मंडळाला सविस्तर पत्र पाठवून न्यायालयाच्या आदेशांची आठवण करून दिली आहे.
रस्त्यांवर चालण्याचा पादचाऱ्यांचा अधिकार आणि शांततेत जगण्याचा ज्येष्ठ नागरिक, रुग्ण व विद्यार्थ्यांचा अधिकार हा मूलभूत हक्क आहे. मंडप वा इतर तात्पुरत्या संरचनांना पादचारी वाहनचालकांचा विचार करूनच परवानगी देण्यात यावी. एखाद्या आयोजकाकडून यापूर्वी नियमांचे उल्लंघन झाले असल्यास, भविष्यात त्याला परवानगी देताना पूर्वीच्या उल्लंघनांची नोंद व त्यावरील कारवाई विचारात घेण्यात यावी, असे मत -डॉ. महेश बेडेकर यांनी व्यक्त केले आहे.
.png "Videos"){kind=small}
