बारामती / नवराष्ट्र न्यूज नेटवर्क : बाललैंगिक अत्याचार प्रकरणी आरोपी अनिल बबन बनकर (रा. टिळेकर वस्ती, पिलानवाडी, ता. दौंड) यास बारामती येथील अतिरिक्त जिल्हा व सत्र न्यायाधीश जे.पी. दरेकर यांनी गुरुवारी (दि.17) बाललैंगिक अत्याचार प्रकरणी जन्मठेपेची शिक्षा (Life Imprisonment) व सतरा हजार रुपये दंडाची शिक्षा सुनावली.
या प्रकरणाची हकीकत अशी की, हा गुन्हा यवत पोलीस स्टेशनच्या हद्दीत पिलानवाडी, (ता. दौंड) येथील एका पोल्ट्रीवर घडला होता. पीडितेची आई व कुटुंबीय पोल्ट्रीवर कामास होते. घटना १८ जून २०२० रोजी दुपारी ३ ते ४ च्या सुमारास घडली होती. त्यावेळी पीडिता ६ वर्षांची होती. पीडितेची आई भाजीपाला आणण्यासाठी राहू येथे गेली होती. त्यावेळेस पीडिता व तिचे भाऊ-बहिण पोल्ट्रीजवळ खेळत होते. त्यावेळेस आरोपी तेथे आला. त्याने पीडितेच्या बहिणीला बाहेर जाण्यास सांगून पीडितेला पोल्ट्रीत घेऊन त्या चिमुकलीवर लैंगिक अत्याचार केला. आई-वडिलांना जर ही गोष्ट सांगितली तर तिला पोटात चाकू मारण्याची धमकी देऊन निघून गेला, अशी फिर्याद पीडितेच्या आईने यवत पोलीस ठाण्यात दिली.
या प्रकरणाचा तपास यवत पोलीस स्टेशनचे तत्कालीन पोलिस उपनिरीक्षक एस. एस. वाघमोडे यांनी करून आरोपी विरुध्द दोषारोपपत्र दाखल केले. आरोपी न्यायालयीन बंदी होता. या प्रकरणामध्ये सरकार पक्षातर्फे विशेष सरकारी वकील प्रसन्न जोशी यांनी ७ साक्षीदार तपासले. त्यामध्ये फिर्यादी म्हणजेच पीडितेची आई ही न्यायालयात फितूर झाली होती व फिर्यादीच्या विसंगत जबाब न्यायालयात दिला. परंतु, पीडिता ही ७ वर्षांची असूनही तिने झालेली घटना न्यायालयात सविस्तर सांगितली.
तसेच सदर खटल्यामध्ये डॉ. शशिकला एम. यांचा न्याय वैद्यकीय पुरावा महत्वाचा ठरला. तसेच इतर साक्षीदारांच्या साक्षी महत्वाच्या ठरल्या. विशेष सरकारी वकील प्रसन्न जोशी यांनी सदर खटल्याचे पूर्ण कामकाज पाहिले व त्यांनी केलेला युक्तिवादी ग्राह्य धरुन न्यायालयाने आरोपी अनिल बनकर याला बाल लैंगिक अत्याचार प्रतिबंधक कायदा कलम ६ प्रमाणे जन्मठेपेची व दहा हजार रुपये दंडाची शिक्षा सुनावली.
याशिवाय, कलम १० प्रमाणे सात वर्षे सश्रम कारावास व पाच हजार रुपये दंड व कलम १२ प्रमाणे ३ वर्षे सश्रम कारावास व दोन हजार रुपये दंड अशी शिक्षा सुनावली. दंडातील दहा हजार रुपयांची रक्कम पीडितेला देण्याचा आदेश न्यायालयाने दिला आहे. या खटल्यामध्ये सरकारी वकील प्रसन्न जोशी यांना यवत ठाण्याचे पोलिस निरीक्षक नारायण पवार यांच्या मार्गदर्शनाखाली कोर्टपैरवी अंमलदार पोलीस नाईक वेनुनाद तुकाराम ढोपरे व न्यायालयीन कोर्ट पैरवी एन.ए. नलवडे यांनी सहकार्य केले.
