BJPचे स्वप्न भंगले, मावळमध्ये APMC समिती झाली बरखास्त; प्रशासकाची नियुक्ती,

कृषी उत्पन्न बाजार समितीत राजकीय वादंग निर्माण झाला आहे. तीन वर्षांपूर्वी मोठ्या आर्थिक खर्चात निवडून आलेल्या संचालक मंडळात राष्ट्रवादी काँग्रेसचे स्पष्ट बहुमत होते.

Pune Political News : वडगाव मावळ : सतिश गाडे : मावळ तालुक्यातील कृषी उत्पन्न बाजार समितीत गेल्या काही दिवसांत घडलेल्या नाट्यमय राजकीय घडामोडींना अखेर पूर्णविराम मिळाला असून, समिती बरखास्त करून प्रशासकाची नियुक्ती करण्यात आली आहे. या संपूर्ण प्रकरणात आमदार सुनील शेळके (MLA Sunil Shelke) यांच्या राजकीय खेळीला यश मिळाल्याची जोरदार चर्चा आहे.

तीन वर्षांपूर्वी मोठ्या आर्थिक खर्चात निवडून आलेल्या संचालक मंडळात राष्ट्रवादी काँग्रेसचे स्पष्ट बहुमत होते. सभापतीपदी संभाजी शिंदे, तर उपसभापतीपदी नामदेव शेलार यांची नियुक्ती करण्यात आली होती. मात्र, ठरल्याप्रमाणे पदांची अदलाबदल न करता या दोघांनी सलग तीन वर्षे पदे कायम ठेवल्याने संचालकांमध्ये असंतोष वाढत गेला.

या पार्श्वभूमीवर असंतुष्ट संचालकांनी अविश्वास ठरावाची तयारी सुरू केली. याची चाहूल लागताच सभापती आणि उपसभापतींनी राजीनामे दिले. त्यानंतर झालेल्या निवडणुकीत राष्ट्रवादीकडे बहुमत असूनही अंतर्गत फुटीमुळे भाजपने सभापतीपद पटकावले. मात्र, हा विजय केवळ काही तासांचाच ठरला. घडामोडींची गंभीर दखल घेत आमदार सुनील शेळके, जिल्हाध्यक्ष विठ्ठलराव शिंदे आणि तालुकाध्यक्ष गणेश खांडगे यांनी तातडीची बैठक बोलावून राष्ट्रवादीच्या सर्व संचालकांना राजीनाम्याचे आदेश दिले.

हे देखील वाचा : अशोक खरातची भेट? एकनाथ शिंदे, जयंत पाटील…न संपणारी बड्या नेत्यांची यादी; अंजली दमानिया यांचा गौप्यस्फोट

या आदेशानुसार १३ पैकी ९ संचालकांनी तत्काळ राजीनामे दिले, तर उर्वरित ४ संचालकांनी दुसऱ्या दिवशी राजीनामे सादर केले. परिणामी, संचालक मंडळ कोलमडल्याने बाजार समिती बरखास्त होण्याचा मार्ग मोकळा झाला. दरम्यान, संचालक मंडळ अस्तित्वात नसल्याने समितीचे कामकाज पूर्णतः ठप्प झाले. पहिली बैठकही कोरम अभावी केवळ चर्चेपुरतीच मर्यादित राहिली.

यानंतर सहाय्यक निबंधकांकडून अहवाल सादर झाल्यानंतर महाराष्ट्र कृषी उत्पन्न खरेदी-विक्री (विकास व विनियमन) अधिनियम 1963 च्या कलम 45(1) अंतर्गत जिल्हा उपनिबंधक, सहकारी संस्था, पुणे (ग्रामीण) यांनी समिती बरखास्त करण्याचा आदेश दिला. त्यानुसार सहाय्यक निबंधक नवनाथ अनपट यांची प्रशासक म्हणून नियुक्ती करण्यात आली असून, समितीचे सर्व अधिकार त्यांच्या ताब्यात देण्यात आले आहेत.

हे देखील वाचा : पोटनिवडणुकीच्या प्रचाराने पवार कुटुंब एकत्र येणार? सुनेत्रा काकींच्या प्रचारासाठी रोहित पवार उतरले मैदानात

विशेष म्हणजे, काही संचालकांनी आमदार सुनील शेळके यांच्या विरोधात जाऊन भाजपला साथ दिली होती. मात्र, या निर्णयामुळे त्यांनाही मोठा राजकीय फटका बसल्याची चर्चा आहे. एकंदर पक्षांतर्गत मतभेद, फुटीरता आणि आमदार शेळके यांच्या निर्णायक हस्तक्षेपामुळे संपूर्ण समीकरण बदलले असून, मावळ तालुक्यात या राजकीय घडामोडींची जोरदार चर्चा सुरू आहे.