Baramati News : जुन्या वादाचा खतरनाक शेवट! कोयत्याने सपासप वार; २४ तासांत दोघे जेरबंद

Baramati News : बारामतीमध्ये जुन्या वादातून एका युवकावर कोयत्याने जीवघेणा हल्ला करण्यात आला. डोके, मान, हात आणि पाठीवर वार करून आरोपी पसार झाले होते. मात्र, पोलिसांनी वेगाने तपास करत अवघ्या २४ तासांत दोन्ही आरोपींना जेरबंद केले.

• घटना कुठे आणि कशी घडली
• ट्रॅक्टरच्या कामावरून जुना वाद
• गुन्ह्याचा पुढील तपास श्रेणी पोलीस उपनिरीक्षक वसंत वाघोले करीत आहेत.

Baramati News : तालुक्यातील कार्हाटी येथे युवकावर कोयत्याने प्राणघातक हल्ला करणाऱ्या दोघांना सुपा पोलिसांनी अवघ्या २४ तासांत अटक केली. निलेश उर्फ अमोल सदाशिव जाधव (वय २७, रा. कार्हाटी) यांच्यावर जुन्या किरकोळ वादातून हा हल्ला करण्यात आला होता. गंभीर जखमी अमोल जाधव यांच्यावर शेवाळवाडी, पुणे येथील लोटस् रुग्णालयात उपचार सुरू आहेत.

घटना कुठे आणि कशी घडली

पोलिसांनी दिलेल्या माहितीनुसार, १८ सप्टेंबर रोजी दुपारी साडेएकच्या सुमारास कार्हाटी येथील भैरवनाथ हॉटेलसमोर ही घटना घडली. ऋतिक बाळासो गिरमे (रा. कार्हाटी) आणि ओमकार हरिभाऊ भगत (रा. लोणीपाटी, लोणी भापकर, ता. बारामती) हे दोघे पिकअप वाहनातून घटनास्थळी आले. त्यानंतर हातातील लोखंडी धारदार कोयत्याने अमोल जाधव यांच्या डोक्यावर, मानेच्या डाव्या बाजूस, डाव्या हाताच्या बोटांवर, डाव्या हाताच्या पोटरीवर तसेच पाठीवर वार केल्याचे पोलिस तपासात समोर आले.

हल्ल्यानंतर दोन्ही आरोपी दुचाकीवरून घटनास्थळावरून पसार झाले. या प्रकरणी जखमीच्या आई द्वारका सदाशिव जाधव यांच्या फिर्यादीवरून सुपा पोलीस ठाण्यात गुन्हा दाखल करण्यात आला.

घटनेचे गांभीर्य लक्षात घेऊन सुपा पोलिसांनी तातडीने घटनास्थळी धाव घेत माहिती संकलित केली. उपविभागीय पोलीस अधिकारी चैतन्य कदम यांनी घटनास्थळी भेट देऊन तपासाबाबत आवश्यक सूचना दिल्या. त्यानंतर सुपा पोलीस ठाण्याचे प्रभारी अधिकारी सहाय्यक पोलीस निरीक्षक शशिकांत शेळके यांनी दोन तपास पथके तयार करून आरोपींच्या शोधासाठी रवाना केली.

पोलिसांनी तपासाची चक्रे वेगाने फिरवत घटनेपासून अवघ्या २४ तासांच्या आत दोन्ही आरोपींना ताब्यात घेतले आणि १९ सप्टेंबर रोजी कायदेशीररीत्या अटक केली.

Belhe Bus Stand : बेल्हे बसस्थानक नियंत्रकांच्या प्रतीक्षेत! सात वर्षांपासून वाहतूक नियंत्रक कक्ष कुलूपबंद

ट्रॅक्टरच्या कामावरून जुना वाद

अमोल जाधव आणि आरोपींकडे ट्रॅक्टर असून, जमीन लेव्हल करण्याचे काम घेण्यावरून यापूर्वी त्यांच्यात वाद झाले होते. याच जुन्या वादातून हल्ला केल्याचे आरोपींनी पोलिस तपासात सांगितल्याची माहिती पोलिसांनी दिली आहे.

Hadapsar Ghorpadi 3rd Railway Line: हडपसर-घोरपडी तिसऱ्या रेल्वे मार्गिकेच्या कामाला वेग; ‘डी-१५ ब्लॉक’चा पहिला टप्पा यशस्वी!

गुन्ह्याचा पुढील तपास श्रेणी पोलीस उपनिरीक्षक वसंत वाघोले करीत आहेत.

या कारवाईत श्रेणी पोलीस उपनिरीक्षक उदय पवार, पोलीस हवालदार राहुल भाग्यवंत, रूपेश साळुंखे, महेंद्र गायकवाड, दत्तात्रय धुमाळ तसेच पोलीस अंमलदार तुषार जैनक, किसन ताडगे, महादेव साळुंखे, सचिन कोकणे आणि निहाल वणवे यांनी महत्त्वाची भूमिका बजावली.

पोलीस अधीक्षक संदिपसिंह गिल्ल, अपर पोलीस अधीक्षक गणेश बिरादार, उपविभागीय पोलीस अधिकारी चैतन्य कदम आणि सुपा पोलीस ठाण्याचे सहायक पोलीस निरीक्षक शशिकांत शेळके यांच्या मार्गदर्शनाखाली ही कारवाई करण्यात आली.