आंबेगावच्या आरोग्य यंत्रणेला बळ, तांबडेमळा रुग्णालयासाठी 40 कोटींचा निधी मंजूर; दिलीप वळसे पाटलांची माहिती

आंबेगाव तालुक्यातील आरोग्य यंत्रणा अधिक सक्षम आणि दर्जेदार करण्यासाठी तांबडेमळा रुग्णालयाच्या विविध विकासकामांसाठी ४० कोटी रुपयांचा निधी मंजूर झाला असून, येथील १०० खाटांचे सुसज्ज रुग्णालय लवकरच सर्वसामान्यांच्या सेवेत दाखल होणार आहे.

• तांबडेमळा रुग्णालयासाठी ४० कोटींचा निधी मंजूर
• लवकरच १०० खाटांचे सुसज्ज रुग्णालय सेवेत दाखल
• मंचर उपजिल्हा रुग्णालयात महिलांसाठी विशेष आरोग्य सुविधा

मंचर : आंबेगाव तालुक्यातील आरोग्य यंत्रणा अधिक सक्षम आणि दर्जेदार करण्यासाठी तांबडेमळा रुग्णालयाच्या विविध विकासकामांसाठी ४० कोटी रुपयांचा निधी मंजूर झाला असून, येथील १०० खाटांचे सुसज्ज रुग्णालय लवकरच सर्वसामान्यांच्या सेवेत दाखल होणार आहे. तसेच मंचर येथे सध्या सुरू असलेल्या उपजिल्हा रुग्णालयात महिलांसाठी विशेष आरोग्य सुविधा उपलब्ध करून देण्याचे नियोजन असल्याचे प्रतिपादन माजी गृहमंत्री दिलीप वळसे पाटील यांनी केले. रजनी प्रकाश फाउंडेशनच्या वतीने दिलीप वळसे पाटील यांच्या वाढदिवसाचे औचित्य साधून मंचर येथे मोफत आरोग्य शिबिराचे आयोजन करण्यात आले होते. या शिबिराचा समारोप तसेच आरोग्य कर्मचारी व आशा सेविकांना दिवाळी भेटवस्तू आणि फराळ वाटप कार्यक्रमाप्रसंगी ते बोलत होते.

 

आरोग्य आणि पायाभूत सुविधांचे भक्कम जाळे

वळसे पाटील पुढे म्हणाले, “तालुक्यात पाबळ, घोडेगाव आणि मंचर येथे अत्याधुनिक आरोग्य सुविधांचे सक्षम जाळे उभारण्यात आले आहे. महामार्गावरील अपघातग्रस्तांना तातडीने उपचार मिळावेत यासाठी मंचर येथे सर्वोपचार अपघात केंद्र (ट्रॉमा केअर सेंटर) सुरू करण्यात आले आहे. आरोग्याबरोबरच शिक्षण क्षेत्रातही अभियांत्रिकी महाविद्यालय आणि दुर्गम भागातील आदिवासी विद्यार्थ्यांसाठी निवासी शाळांची उभारणी झाली आहे. मंचर शहराचा विकास आराखडा (डीपी) तयार झाला असून, शहराचा नियोजनबद्ध विकास साधण्यावर आमचा भर राहील.”

आंबेगाव तालुक्याची विकासात मोठी भरारी

पुणे म्हाडाचे अध्यक्ष व माजी खासदार शिवाजीराव आढळराव पाटील यांनी यावेळी मनोगत व्यक्त करताना सांगितले की, “आंबेगाव तालुक्याने आरोग्य, शिक्षण, रोजगार आणि मूलभूत पायाभूत सुविधांमध्ये मोठी प्रगती केली आहे. या सर्वंकष विकासामध्ये दिलीप वळसे पाटील यांचे योगदान अत्यंत मोलाचे आहे.” यावेळी माजी आमदार पोपटराव गावडे आणि जिल्हा शल्यचिकित्सक अंबादास देवमाने यांचीही समयोचित भाषणे झाली. शरद सहकारी बँकेचे अध्यक्ष देवेंद्रशेठ शहा यांनी आरोग्य कर्मचाऱ्यांच्या कार्याची प्रशंसा करत, आदिवासी भागात मोफत नेत्रतपासणी व चष्मे वाटप तसेच कुपोषणमुक्तीसाठी ठोस पावले उचलली जातील, असे नमूद केले.

हे सुद्धा वाचा : अजित पवारांचा जनसेवेचा वारसा पुढे चालवणार; जनतेच्या प्रश्नांसाठी सदैव कार्यरत राहणार, सुनेत्रा पवार यांची ग्वाही

मान्यवरांची मोठी उपस्थिती

कार्यक्रमास पूर्वा वळसे पाटील, नेत्रा शहा, भैरवनाथ पतसंस्थेचे उपाध्यक्ष सागर काजळे, पंचायत समितीचे सभापती कैलासबुवा काळे, नगराध्यक्ष संदीप (लक्ष्मण) थोरात, जिल्हा परिषद सदस्य विष्णु हिंगे पाटील, महिला काँग्रेसच्या अध्यक्षा सुषमा शिंदे, आदिवासी नेते सुभाषराव मोरमारे, तालुका खरेदी-विक्री संघाचे अध्यक्ष नवनाथ हुले यांच्यासह विविध क्षेत्रांतील पदाधिकारी, डॉक्टर्स, कर्मचारी व आशा सेविका मोठ्या संख्येने उपस्थित होत्या.