कर्मयोगी शंकररावजी पाटील कारखान्याची निवडणूक बिनविरोध; २१ जागांसाठी २१ उमेदवारी अर्ज

इंदापूर तालुक्यातील महात्मा फुलेनगर- बिजवडी येथील कर्मयोगी शंकररावजी पाटील सहकारी साखर कारखान्याची निवडणूक हर्षवर्धन पाटील यांच्या मार्गदर्शनाखाली बुधवारी बिनविरोध पार पडली.

• कर्मयोगी कारखान्याची निवडणूक बिनविरोध
• हर्षवर्धन पाटलांसह २१ संचालक विजयी
• निवडणूक बिनविरोध, पण प्रश्न अनुत्तरितच!

इंदापूर : इंदापूर तालुक्यातील महात्मा फुलेनगर- बिजवडी येथील कर्मयोगी शंकररावजी पाटील सहकारी साखर कारखान्याची सन २०२१-२०३१ ची पंचवार्षिक निवडणूक राष्ट्रीय सहकारी साखर कारखाना महासंघ नवी दिल्लीचे अध्यक्ष व कारखान्याचे अध्यक्ष हर्षवर्धन पाटील यांच्या मार्गदर्शनाखाली बुधवारी (दि. ४) बिनविरोध पार पडली. या निवडणुकीसाठी उमेदवारी अर्ज मागे घेण्याच्या बुधवारी ( दि. ४ ) शेवटच्या दिवशी २१ जागांसाठी २१ उमेदवारी अर्ज शिल्लक राहिल्याने बिनविरोध निवडीची घोषणा निवडणूक निर्णय अधिकारी डॉ. यशवंत माने यांनी केली. कारखान्याच्या बिनविरोध निवड झालेल्या उमेदवारांमध्ये हर्षवर्धन पाटील, राजवर्धन पाटील आदी मान्यवर उमेदवारांचा समावेश आहे.

 

बिनविरोध निवड झालेले उमेदवार पुढीलप्रमाणे

हर्षवर्धन पाटील, राजवर्धन पाटील, राकेश रमेशप्रसाद शुक्ला, रविंद्र वामन सरडे, शांतीलाल दत्तात्राय शिदे, छगन धोडीबा भोंगळे, निलेश शामराव देवकर, राजेद्रकुमार प्रतापराव देवकर, संतोष लक्ष्मण काळे, श्रीकांत खिंवराव देवकर, विजय विठ्ठल खर्चे, पराग रमेशराव जाधव, रणजित नामदेव निकम, रोहित राजेंद्र गायकवाड, बिभिषण कल्याण नलवडे, अतुल शिवाजी शिगाडे, वसंत खंडू मोहोळकर, हरिश्चंद्र सदाशिव पारेकर, रत्नमाला संपत पवार, सुमन नारायण व्यवहारे, अमोल सुभाष जाधव.

सदर निवडणूक बिनविरोध पार पाडण्यासाठी उपमुख्यमंत्री सुनेत्रा पवार, कृषिमंत्री दत्तात्रय भरणे, खासदार सुप्रिया सुळे, पार्थ पवार, जिल्हा परिषद अध्यक्ष वीरधवल जगदाळे, जिल्हा बँकेचे संचालक आप्पासाहेब जगदाळे तसेच प्रदीप गारटकर, प्रवीण माने आदी सर्वपक्षीय नेते, पदाधिकारी, कार्यकर्ते, सभासद यांचे दुष्काळी परिस्थितीच्या पार्श्वभूमीवर सहकार्य मिळाल्याने हर्षवर्धन पाटील यांनी या सर्वांचे आभार व्यक्त केले.

हे सुद्धा वाचा : २५० सीसीटीव्हींचा माग, १० दिवसांची मेहनत; अखेर सराईत चोरट्याला पाठलाग करुन पकडले

…प्रश्न मात्र अनुत्तरित!

कर्मयोगी शंकररावजी पाटील सहकारी साखर कारखान्याची पंचवार्षिक निवडणूक बिनविरोध झाली; मात्र या निवडीमागील प्रक्रियेवरून उपस्थित झालेले प्रश्न अद्याप कायम आहेत. उमेदवारी अर्ज मागे घेण्यासाठी दबाव टाकल्याचे आरोप, अंतिम मुदतीनंतर अर्ज माघारी झाल्याचा आक्षेप आणि निवडणूक निर्णय अधिकारी यशवंत माने यांच्या स्पष्टीकरणावरून निर्माण झालेली चर्चा यामुळे निवडणूक प्रक्रियेची पारदर्शकता ऐरणीवर आली आहे. त्यातच अमोल सुभाष जाधव यांच्या ओबीसी व अनुसूचित जाती प्रवर्गातील कथित दोन जात प्रमाणपत्रांबाबत शरद चितारे यांनी पत्रकार परिषदेत गंभीर आक्षेप नोंदवत मुंबई उच्च न्यायालयात जनहित याचिका दाखल केल्याचा दावा केला आहे. निवडणूक स्थगित करून फेरनिवडणुकीची मागणीही त्यांनी केली आहे. दुसरीकडे, कारखाना चालविण्याची जबाबदारी बाबुराव बोत्रे-पाटील यांच्याकडे असल्याच्या पार्श्वभूमीवर नव्या संचालक मंडळाचे अधिकार नेमके किती, हा प्रश्नही महत्त्वाचा ठरतो. एकेकाळी राज्यात नावाजलेला कर्मयोगी कारखाना अद्याप पूर्ण क्षमतेने सुरू झालेला नसताना सभासद, ऊस उत्पादक शेतकरी आणि कामगारांच्या अपेक्षा वाढल्या आहेत.