पुण्यात Dengue, चिकुनगुनियाचा विळखा घट्ट; ९२० हून अधिक संशयित रुग्ण आढळल्याने खळबळ

डासजन्य आजारांचा संभाव्य उद्रेक रोखण्यासाठी महापालिकेच्या कीटक प्रतिबंधक विभागाने क्षेत्रीय पातळीवर सर्वेक्षण आणि औषधफवारणी सुरू केली आहे.

• डासांचा डंख वाढल्याने पुणेकर सावध
• पुणे शहरात १,७०८ डासोत्पत्तीस्थळांचा शोध
• ३९ जणांच्या चाचण्या पॉझिटिव्ह आल्या

सुनयना सोनवणे /पुणे: पावसामुळे शहराच्या विविध भागांत साचलेले पाणी डासांच्या वाढीसाठी पोषक ठरत असल्याने पुण्यात डासजन्य आजारांचा धोका वाढला आहे. यावर्षी आतापर्यंत डेंग्यूचे ९२० संशयित रुग्ण आढळले असून, ३९ जणांच्या चाचण्या पॉझिटिव्ह आल्या आहेत. त्याचबरोबर चिकुनगुनियाचे १४ रुग्णही आढळले आहेत. महापालिकेच्या सर्वेक्षणात डासांची उत्पत्ती होणारी तब्बल १,७०८ ठिकाणे आढळून आली आहेत. आज(२०ऑगस्ट ) जागतिक डास दिन साजरा होत असताना शहरातील ही स्थिती डास नियंत्रणासाठी नागरिकांच्या सहभागाची गरज अधोरेखित करणारी आहे. विशेषतः जून आणि जुलैमध्ये डेंग्यूच्या संशयित रुग्णसंख्येत झालेली वाढ चिंताजनक आहे.

डासजन्य आजारांचा संभाव्य उद्रेक रोखण्यासाठी महापालिकेच्या कीटक प्रतिबंधक विभागाने क्षेत्रीय पातळीवर सर्वेक्षण आणि औषधफवारणी सुरू केली आहे. संवेदनशील भागांची स्वतंत्र नोंद करून तेथे उपाययोजना करण्याबरोबरच तापाच्या रुग्णांचा शोध घेण्यात येत आहे. आशा कार्यकर्त्यांनाही या मोहिमेत सहभागी करून घेण्यात येत आहे.

डासांची उत्पत्ती रोखण्यासाठी केवळ औषधफवारणीवर अवलंबून न राहता पाणी साचणारी ठिकाणे नष्ट करणे, पाण्याचा निचरा करणे आणि गप्पी माशांचा वापर करण्यावर भर दिला जात आहे. शाळा, महाविद्यालये, सोसायट्या आणि विविध संस्थांमध्ये महापालिकेकडून जनजागृतीही केली जात आहे.

बदलत्या हवामानासोबत डासांचेही ‘गणित’ बदलले! का साजरा करतात जागतिक डास दिन? जाणून घ्या सविस्तर

पुण्यातील डेंग्यूचा ‘ग्राफ’ 

कालावधी डेंग्यूचे संशयित रुग्ण

जून – १७५
जुलै – ३२३
ऑगस्ट (१८ तारखेपर्यंत) – २४९
एकूण – ९२०

डेंग्यू पॉझिटिव्ह : ३९
चिकुनगुनिया : १४
डासोत्पत्तीस्थळे : १,७०८
डेंग्यू/मलेरियामुळे मृत्यू : शून्य

डासांना वाढण्यासाठी काय हवे?
थोडेसे साचलेले पाणी पुरेसे!
– कुंड्या आणि त्याखालील ताटल्या
– जुने टायर व टाकाऊ वस्तू
– उघड्या पाण्याच्या टाक्या
– घराच्या परिसरातील पाण्याचे डबके
– बांधकामाच्या ठिकाणी साचलेले पाणी
– नारळाच्या करवंट्या, प्लास्टिकच्या वस्तूंमध्ये साचलेले पाणी

महापालिकेची ‘आठ कलमी’ तयारी 

सर्वेक्षण → डासोत्पत्तीस्थळांचा शोध → औषधफवारणी → ताप रुग्णांचा शोध → संवेदनशील भागांवर लक्ष → आशा कार्यकर्त्यांचा सहभाग → गप्पी माशांचा वापर → जनजागृती

Health Update: शहरासह ग्रामीणमध्येही साथ रोगाचे थैमान! टायफाईड, मलेरीया, डेंग्यूचे रूग्ण वाढले; १ हजार आयवी सेटची मागणी

२० ऑगस्ट – जागतिक डास दिवस
१८९७ मध्ये मलेरियाच्या प्रसाराचा धागा उलगडला. सर रोनाल्ड रॉस यांनी संक्रमित मादी ॲनोफिलीस डासाच्या माध्यमातून मलेरियाचा प्रसार होत असल्याचे सिद्ध केले. या शोधाच्या स्मरणार्थ २० ऑगस्ट रोजी जागतिक डास दिन साजरा केला जातो. डेंग्यू, मलेरियासारख्या आजारांपासून बचावासाठी डासांची उत्पत्ती होऊ न देणे हाच सर्वात प्रभावी प्रतिबंधात्मक उपाय असल्याचा संदेश या दिवसातून दिला जातो.