सौजन्य - नवराष्ट्र टीम
पाटस : दौंड तालुक्यातील पाटस येथील आद्य क्रांतिवीर राजे उमाजी नाईक यांच्या फलकावर अज्ञात समाजकंटकांनी दगडफेक करून तोडफोड केल्याच्या निषेधार्थ जय मल्हार क्रांती संघटना आक्रमक झाल्याचे चित्र शनिवारी (दि. ४) पाहायला मिळाले. पुणे सोलापूर राष्ट्रीय महामार्गावर रास्ता रोको आंदोलन करत अर्धा तास रस्ता रोखून धरला. संबंधित समाजकंटक आरोपींना पुढील दोन दिवसांत पोलिसांनी अटक करावी, अन्यथा राज्यभर तीव्र आंदोलन छेडण्याचा इशारा संघटनेचे अध्यक्ष दौलत शितोळे यांनी दिला आहे.
दौंड तालुक्यातील पाटस येथील गाव प्रवेशद्वार लगत जुन्या बाजार तळात असलेल्या आद्य क्रांतिवीर राजे उमाजी नाईक यांच्या फलकावर २८ मार्च रोजी अज्ञात समाजकंटकांनी दगडफेक करून तोडफोड केल्याची घटना घडली होती. या घटनेनंतर जय मल्हार क्रांती संघटना आणि समाज बांधवांनी पाटसगाव बंद ठेवून या घटनेचा निषेध नोंदवला होता. संबंधित आरोपींना तातडीने अटक करण्याची मागणी पोलीस प्रशासनाकडे करण्यात आली होती. मात्र सहा सात दिवस उलटूनही संबंधित आरोपींना अटक करण्यात आली नसल्याने जय मल्हार क्रांती संघटनेने पुणे सोलापूर राष्ट्रीय महामार्गावर रास्ता रोको आंदोलन करण्याचा इशारा निवेदनाद्वारे प्रशासनाला दिला होता. त्यानुसार शनिवारी (दि.४ ) जय मल्हार क्रांती संघटनेचे राष्ट्रीय अध्यक्ष दौलत शितोळे यांच्या अध्यक्षतेखाली आणि मार्गदर्शनाखाली संघटनेने पुणे- सोलापूर राष्ट्रीय महामार्गावर पाटस टोला नाक्याजवळ रास्ता रोको आंदोलन केले.
अर्धा तास महामार्ग रोखला
जय मल्हार क्रांती संघटनेच्या पदाधिकाऱ्यांनी आक्रमक पवित्रा घेत महामार्गावर येत महामार्गावर बसून अर्धा तास महामार्ग रोखून धरला. त्यानंतर या मोर्चाचे रूपांतर सभेत झाले. याप्रसंगी बोलताना जय मल्हार क्रांती संघटनेचे अध्यक्ष दौलत शितोळे यांनी देशासाठी शहीद भुमीपुत्र राजे उमाजी नाईक यांची विटंबनेची घटना अतिशय निंदणीय असल्याचे सांगत कोणत्याही महापुरुषांचा अपमान सहन केला जाणार नाही, पोलीस प्रशासनाने पुढील दोन दिवसांत संबंधित आरोपींना अटक करून कायदेशीर कारवाई करावी, तसे न झाल्यास पाटस पोलीस चौकीच्या समोर ठिया आंदोलन केले जाईल, असा इशारा शितोळे यांनी यावेळी बोलताना दिला. यावेळी लक्ष्मण जाधव, शंकर पवार, अविनाश मोहिते, रंजना भंडलकर आदींनी तीव्र शब्दात आपल्या भावना व्यक्त केल्या.
आंदोलनात जय मल्हार क्रांती संघटनेचे पुणे जिल्हाध्यक्ष नानासाहेब मदने, युवा अध्यक्ष सुधीर नाईक, संघटनेचे नेते बापुराव खोमणे, दौंड तालुका अध्यक्ष दादासाहेब खोमणे, संभाजी ब्रिगेडचे अध्यक्ष अविनाश मोहिते, वंचित बहुजन आघाडीचे जिल्हा प्रवक्ते उत्तम गायकवाड, महाराष्ट्र झोपडपट्टी सुधार दलाचे नेते दत्ताभाऊ डाडर, नाभिक संघटनेचे नेते सुदाम गवळी, सुतार समाज संघाचे सामाजिक कार्यकर्ते गोरख सुतार आदींसह जय मल्हार क्रांती संघटनेचे पदाधिकारी, कार्यकर्ते, महिला आणि समाज बांधव मोठ्या संख्येने सहभागी झाले होते.
