रेल्वे स्टेशनवर दुहेरी गेट प्रणाली (फोटो- सोशल मीडिया)
पुणे रेल्वे स्टेशनवर दुहेरी गेट प्रणाली
सुरक्षा तपासणी होणार अधिक कडक
प्रवाशांच्या सुरक्षेसाठी मोठा निर्णय
पुणे/चंद्रकांत कांबळे: पुणे रेल्वे स्थानकावर प्रवाशांच्या सुरक्षेसाठी मोठा निर्णय घेण्यात आला असून, सध्या मुख्य प्रवेशद्वारावर प्रत्येक प्रवाशाची आणि त्यांच्या सामानाची तपासणी करूनच आत प्रवेश दिला जात आहे. ही व्यवस्था सध्या प्रायोगिक तत्त्वावर सुरू असून पुणे रेल्वे स्टेशनवर दुहेरी गेट प्रणाली राबविली जाणार आहे.एप्रिल महिन्याच्या अखेरपर्यंत अत्याधुनिक सुरक्षा यंत्रणा पूर्णपणे कार्यान्वित करण्यात येणार आहे.
या अंतर्गत रेल्वे प्रशासनाकडून ४ एक्स-रे बॅगेज स्कॅनर, ८ डोअर फ्रेम मेटल डिटेक्टर (डीएफएमडी) आणि १०० हँड-हेल्ड मेटल डिटेक्टर (एचएचएमडी) मशीन मागवण्यात आली आहेत. ही सर्व यंत्रणा एप्रिलअखेरपर्यंत स्थानकावर बसवली जाणार आहे. यामुळे स्थानकातील सुरक्षा अधिक बळकट होणार असल्याचे आरपीएफचे वरिष्ठ अधिकारी सुनील कुमार यादव यांनी सांगितले.
सध्या मार्च महिन्यात प्रायोगिक स्वरूपात एकाच प्रवेशद्वारातून प्रवाशांना आत सोडले जात असून,प्रत्येकाची काटेकोर तपासणी केली जात आहे. पुढील महिन्यात येण्या आणि जाण्यासाठी स्वतंत्र असे दोन गेट तयार करण्यात येणार आहेत. यामध्ये ‘आमरेला गेट’ हे प्रवेशासाठी,तर शेजारील गेट निर्गमनासाठी वापरले जाणार आहे.यामुळे प्रवाशांना येणे-जाणे अधिक सुलभ होणार आहे.हे काम पूर्ण झाल्यानंतर विभागीय रेल्वे कार्यालय आणि मेट्रो स्थानकाकडून येणाऱ्या प्रवाशांचीही याच पद्धतीने तपासणी केली जाणार आहे. या नवीन यंत्रणेमुळे सुरक्षितता मोठ्या प्रमाणात वाढणार आहे.
एप्रिल महिन्यात ही यंत्रणा बसवण्यात येणार
– एक्स-रे बॅगेज स्कॅनर ०४
– डोअर फ्रेम मेटल डिटेक्टर (डीएफएमडी) ०८
– हँड-हेल्ड मेटल डिटेक्टर (एचएचएमडी) १००
सुरक्षा यंत्रणांचे महत्त्व
रेल्वे स्थानकांवर एक्स-रे बॅगेज स्कॅनरद्वारे बॅगमधील वस्तू उघडल्याशिवाय तपासता येतात, तर डोअर फ्रेम मेटल डिटेक्टर प्रवाशांच्या अंगावरील धातूची वस्तू ओळखतात. हँड-हेल्ड मेटल डिटेक्टरद्वारे संशयास्पद व्यक्तींची सखोल तपासणी करता येते. त्यामुळे शस्त्रे, स्फोटके किंवा अन्य घातक वस्तू स्थानकात येण्यापासून रोखता येते.
Railway प्रवाशांसाठी खुशखबर! पुणे स्थानकावर सुरू झाली ‘ही’ जबरदस्त सुविधा, काय असणार खास?
रेल्वे विभाग प्रवाशांच्या सुरक्षिततेसाठी सदैव तत्पर आहे. पुणे विभागात एप्रिलअखेरपर्यंत सुरक्षा व्यवस्थेत मोठी वाढ करण्यात येणार असून प्रत्येक प्रवाशाची तपासणी करूनच प्रवेश दिला जाईल. तसेच येण्या-जाण्यासाठी स्वतंत्र व्यवस्था उभी केली जात आहे.
— हेमंत कुमार बेहरा, जनसंपर्क अधिकारी, रेल्वे विभाग पुणे
