MPSC पेपरफुटीवर रोहित पवार आक्रमक, तुकाराम मुंढेंना अध्यक्ष करण्याची मागणी
मुंबई : महाराष्ट्र लोकसेवा आयोग अर्थात MPSC पेपरफुटीच्या मुद्द्यावरून राजकीय वातावरण चांगलंच तापलं आहे. आमदार रोहित पवार यांनी आयोगाचे अध्यक्ष विवेक भीमनवार यांच्या राजीनाम्याची थेट मागणी केली आहे. भीमनवार यांनी, ‘MPSC पेपरफुटी प्रकरणात माझ्याविरुद्ध पुरावे दाखवा, मी पायउतार होईल’, असं म्हटल्यानंतर रोहित पवारांनी पत्रकार परिषद घेत त्यांच्यावर जोरदार निशाणा साधला.
रोहित पवार यांनी भीमनवार यांच्या महापरिवहन विभागातील कार्यकाळातील तक्रारी, कथित गैरव्यवहार आणि घोटाळ्यांबाबत माहिती समोर ठेवली. याचबरोबर, भीमनवार यांच्या विरोधात तक्रार करण्यात आली असेल तर त्याची चौकशी का होत नाही, असा सवालही त्यांनी उपस्थित केला.
‘मुख्यमंत्र्यांनी भीमनवारांचा राजीनामा घ्यावा’, अशी मागणी करत रोहित पवार म्हणाले की, कारवाई झाली नाही तर भीमनवार हे मुख्यमंत्र्यांचे मित्र असल्यामुळे त्यांना पाठीशी घातलं जात असल्याचा संदेश समाजात जाईल. दरम्यान, पुण्यात MPSC ची तयारी करणाऱ्या विद्यार्थ्यांची भाजप आमदार विक्रम पाचपुते यांनी भेट घेतली. यावरूनही रोहित पवारांनी पाचपुते यांच्यावर टीका केली. ‘भाजपकडून कोणीतरी आलं होतं तुमच्याशी बोलायला, त्यांची फजिती झाली,’ असा टोला त्यांनी लगावला.
रोहित पवारांनी अमित शहा यांच्यावरही अप्रत्यक्ष निशाणा साधला. चाणक्यांचा फोटो दाखवत, ‘बरेच लोक चाणक्य असल्याचं सांगतात, त्यांचं तरी ऐका,’ असं म्हणत त्यांनी टोला लगावला.
यावेळी रोहित पवारांनी सत्ताधारी आमदारांनाही थेट आव्हान दिलं. ‘या माणसाचा राजीनामा व्हायला पाहिजे. सत्ताधारी आमदारांनी यावं, मी चर्चा करायला तयार आहे,’ असं म्हणत त्यांनी विक्रम पाचपुते यांना विद्यार्थ्यांसोबत आंदोलनात सहभागी होण्याचं आवाहन केलं. इतकंच नाही तर, भीमनवारांविरोधातील पुराव्यांचा ‘पार्ट-2’ देखील येणार, असा दावा रोहित पवारांनी केला.
दरम्यान, MPSC च्या अध्यक्षपदासाठी तुकाराम मुंढे योग्य ठरू शकतात, असा दावा रोहित पवारांनी केला. अध्यक्षपदाच्या अटी तपासल्या असून त्या निकषांनुसार तुकाराम मुंढे अध्यक्ष होऊ शकतात, असं सांगत मुंढेंना MPSC आयोगाच्या अध्यक्षपदी नियुक्त करण्याची मागणी त्यांनी केली.
MPSC विद्यार्थ्यांचा प्रश्न गंभीर असून त्यांच्या भवितव्याशी हा विषय जोडलेला आहे. त्यामुळे सरकारने या प्रकरणाकडे गांभीर्याने पाहून योग्य निर्णय घ्यावा, अशी भूमिका रोहित पवारांनी मांडली आहे.
.png "Videos"){kind=small}
