चौकशीदरम्यान आरडाओरड अन् ‘अँग्झायटी अटॅक’चा दावा; डॉ. गायकवाड हल्ला प्रकरणात ‘बिग बॉस’फेम दिव्याची कोठडी वाढली

५ लाखांच्या खंडणीसाठी झालेल्या कथित कटाचा तपास पुढे सरकताच या प्रकरणाचे धागेदोरे आणखी खोलवर जात असल्याचे समोर आले आहे. १७ जणांचा सहभाग, हल्ल्यासाठी ८ दुचाकींचा वापर आणि हॉटेलमधील कथित गुप्त बैठक...

• दिव्याच्या कोठडीत २ ऑक्टोबरपर्यंत वाढ
• १७ जणांचा सहभाग; ८ दुचाकींचा वापर
• हॉटेल सीसीटीव्हीत खंडणीची बैठक कैद

 

पुणे : पुणे कॅन्टोन्मेंट बोर्डाचे माजी मुख्य वैद्यकीय अधिकारी डॉ. विद्याधर गायकवाड यांच्यावरील जीवघेणा हल्ला आणि पाच लाख रुपयांच्या खंडणी प्रकरणात तपासाला वेग आला आहे. या प्रकरणातील मुख्य सूत्रधार असल्याचा पोलिसांचा दावा असलेल्या ‘बिग बॉस’फेम दिव्या सुनील शिंदे हिच्या पोलीस कोठडीत प्रथमवर्ग न्यायदंडाधिकारी अमित कुलकर्णी यांनी २ ऑक्टोबरपर्यंत वाढ केली आहे. तपासादरम्यान या गुन्ह्यात आतापर्यंत तब्बल १७ जणांचा सहभाग निष्पन्न झाल्याचे पोलिसांनी न्यायालयात सांगितले. डॉ. गायकवाड यांच्यावर हल्ला करण्यासाठी आठ दुचाकींचा वापर करण्यात आल्याची माहितीही तपासातून समोर आली आहे.

हेही वाचा: कात्रज घाटात प्रवास करताना थरार! दगडूशेठच्या दर्शनासाठी निघाले पण दाम्पत्याला अडवून तिघांनी जे केले ते…

चौकशी टाळण्यासाठी आरडाओरड केल्याचा पोलिसांचा दावा

पोलीस चौकशीदरम्यान दिव्या शिंदे माहिती देण्यास टाळाटाळ करत असल्याचा दावा पोलिसांनी न्यायालयात केला. चौकशी टाळण्यासाठी ती विचित्र अंगविक्षेप करते, मोठ्याने आरडाओरड करते तसेच आपल्याला ‘अँग्झायटी अटॅक’ येत असल्याचे सांगते, असा पोलिसांचा आरोप आहे. या माध्यमातून ती तपासातील महत्त्वाची माहिती लपवण्याचा प्रयत्न करत असल्याचे पोलिसांनी न्यायालयात नमूद केले.

हॉटेलमधील सीसीटीव्ही फुटेज महत्त्वाचा पुरावा

तपास पथकाने पुणे कॅम्प परिसरातील एका हॉटेलचे सीसीटीव्ही फुटेज जप्त केले आहे. या फुटेजमध्ये मुख्य आरोपी अप्पा ढमढेरे, डॉ. गायकवाड आणि त्यांचा मुलगा यांच्यात पाच लाख रुपयांच्या खंडणीबाबत बैठक झाल्याचे दिसत असल्याचा दावा पोलिसांनी केला आहे. या प्रकरणात अप्पा ढमढेरे, निखिल शिंदे, निखिलची होणारी पत्नी, कोंढवा येथील ताहीर यांच्यासह अन्य १३ अज्ञात व्यक्तींचा सहभाग असल्याचे तपासात समोर आल्याचे पोलिसांनी सांगितले.

हेही वाचा: प्रतिस्पर्धी टोळीतील तरुणांशी मैत्री ठेवली म्हणून पिस्तूल रोखले; १९ वर्षीय तरुणाला बांबूने बेदम मारहाण

हत्यारांसह मोबाईल जप्त करणे बाकी

सरकारी वकील ॲड. आम्रपाली कस्तुरे यांनी न्यायालयात पोलिसांची बाजू मांडताना, हल्ल्यासाठी वापरलेले लोखंडी हत्यार, लाकडी दांडके, आरोपींच्या स्वाक्षऱ्यांचे नमुने तसेच हल्ल्याचे चित्रीकरण करणारा मुख्य मोबाईल फोन अद्याप जप्त करणे बाकी असल्याचे सांगितले. या संपूर्ण कटाची पाळेमुळे शोधण्यासाठी दिव्या शिंदेची पोलीस कोठडी आवश्यक असल्याचा युक्तिवाद सरकारी पक्षाने केला. मूळ तक्रारदारांच्या बाजूने ॲड. शिवम निंबाळकर यांनी काम पाहिले.