वडगाव शहराला दिलासा! ३९.३३ कोटींच्या पाणीपुरवठा योजनेतील दोन जलशुद्धीकरण केंद्रांचे लोकार्पण

वडगाव शहराला मोठा दिलासा मिळाला आहे. शहरातील ३९ कोटींचा जलशुद्धीकरण पाणीपुरवठा प्रकल्पाचे उद्घाटन करण्यात आले आहे. यामुळे नागरिकांना स्वच्छ व मुबलक पाणी उलब्ध होणार आहे.

• वडगावमध्ये दोन प्रकल्पांचे उद्घाटन
• ३९ कोटींच्या पाणी योजनेला गती
• आमदार शेळके यांच्या हस्ते जलशुद्धीकरण प्रकल्पांचे लोकार्पण

सतिश गाडे : वडगाव मावळ : महाराष्ट्र राज्य सुवर्ण जयंती नगरोत्थान महाअभियान योजनेअंतर्गत ३९ कोटी ३३ लाख रुपयांचा निधी मंजूर करून वडगाव शहरासाठी राबविण्यात आलेल्या वाढीव पाणीपुरवठा योजनेतील शिंदेटेकडी (२ MLD) आणि संस्कृती (२ MLD) या दोन महत्त्वपूर्ण जलशुद्धीकरण केंद्रांचे लोकार्पण शुक्रवार (२७ मार्च २०२६) रोजी उत्साहात पार पडले. माळीनगर येथील शिंदेटेकडी जलशुद्धीकरण केंद्र परिसरात आयोजित कार्यक्रमात आमदार सुनील आण्णा शेळके यांच्या हस्ते या प्रकल्पांचे उद्घाटन करण्यात आले.

हे देखील वाचा : Pune Water Supply: पुणे शहरावर पाणीटंचाईचे सावट? खडकवासला प्रकल्पातील नियोजनात मोठा बदल

या सोहळ्यास माजी उपसभापती गणेश अप्पा ढोरे, माजी सरपंच बाळासाहेब ढोरे, माजी महिला सरपंच नंदाताई ढोरे यांची प्रमुख उपस्थिती होती. यावेळी नगराध्यक्षा अबोली मयूर ढोरे, उपनगराध्यक्ष तथा पाणीपुरवठा व जलनिस्सारण सभापती सुनील गणेश ढोरे, नगरसेवक पंढरीनाथ ढोरे, अजय म्हाळसकर, गणेश म्हाळसकर, अजय भवार, विरोधी पक्षनेत्या अर्चना म्हाळसकर, अनंता कुडे, विशाल वहिले, पुनम भोसले, माया चव्हाण, वैशाली सोनवणे, सुनिता ढोरे, राणी म्हाळसकर, रूपाली ढोरे, आकांक्षा वाघवले, संदिप म्हाळसकर, रोहित धडवले यांच्यासह नगरपंचायतीचे पदाधिकारी, अधिकारी, विविध राजकीय पक्षांचे प्रतिनिधी आणि नागरिक मोठ्या संख्येने उपस्थित होते.

यावेळी बोलताना आमदार सुनील आण्णा शेळके यांनी शिंदेटेकडी जलशुद्धीकरण प्रकल्पासाठी जागा उपलब्ध करून दिल्याबद्दल म्हाळसकर कुटुंबियांचे विशेष आभार मानले. तसेच प्रकल्पाचे काम ठेकेदार ईगल इन्फ्रा, मुख्याधिकारी डॉ. प्रविण निकम आणि वडगाव नगरपंचायत प्रशासनाने उत्कृष्ट दर्जाने व नियोजित वेळेत पूर्ण केल्याबद्दल समाधान व्यक्त करत त्यांनी सर्वांचे कौतुक केले.
नगराध्यक्षा अबोली मयूर ढोरे यांनी आपल्या मनोगतात पाणीपुरवठा योजनेसाठी निधी उपलब्ध करून दिल्याबद्दल आमदार शेळके यांचे आभार मानले.

तसेच वडगाव शहराच्या सर्वांगीण विकासासाठी भविष्यातही मोठ्या प्रमाणात निधी मिळावा, अशी अपेक्षा त्यांनी व्यक्त केली.
कार्यक्रमाचे सूत्रसंचालन आरोग्य सभापती सौ. माया अमर चव्हाण यांनी केले. कार्यक्रमाच्या शेवटी पाणीपुरवठा व जलनिस्सारण सभापती श्री. सुनील गणेश ढोरे यांनी उपस्थित मान्यवर, पदाधिकारी व नागरिकांचे आभार मानले. दरम्यान, शिंदेटेकडी व संस्कृती या दोन्ही जलशुद्धीकरण प्रकल्पांमुळे वडगाव शहरातील नागरिकांना शुद्ध, स्वच्छ आणि मुबलक पाणीपुरवठा उपलब्ध होणार असून, शहराच्या पाणीपुरवठा व्यवस्थेत लक्षणीय सुधारणा होणार असल्याची भावना उपस्थितांनी व्यक्त केली.

हे देखील वाचा : Maval News : कार्ला येथे पालखी सोहळ्यानंतर दोन गटात भीषण हाणामारी; दगडफेकीने उडाली खळबळ