गुरुवार, 5 नोव्हेंबर 2026
सोमेश्वर कारखान्याने ऊसाला प्रतिटन 4 हजारांची पहिली उचल द्यावी; दिलीप खैरे यांची मागणी
बारामती : यंदा उसाचे घटलेले उत्पादन, साखर कारखान्यांमधील वाढती स्पर्धा आणि ऊस उत्पादनाचा वाढलेला खर्च लक्षात घेता, श्री सोमेश्वर सहकारी साखर कारखान्याने ऊस उत्पादक शेतकऱ्यांना प्रतिटन किमान चार हजार रुपयांची पहिली उचल जाहीर करावी, अशी मागणी दिलीप खैरे यांनी केली आहे. तसेच डिसेंबर ते मार्चदरम्यान गाळप होणाऱ्या उसाला महिन्यानुसार अतिरिक्त प्रोत्साहन रक्कम द्यावी, अशी अपेक्षाही त्यांनी व्यक्त केली आहे.
पश्चिम महाराष्ट्रातील अनेक कारखाने प्रतिटन ३५०० ते ३८०० रुपयांच्या आसपास पहिली उचल देण्याच्या तयारीत आहेत. सोमेश्वर कारखान्याचा गेल्या हंगामातील १२.२७ टक्के साखर उतारा, गाळपाची कामगिरी आणि आर्थिक क्षमता विचारात घेता शेतकऱ्यांना चार हजार रुपये पहिली उचल देण्याबाबत सकारात्मक निर्णय घेणे आवश्यक असल्याचे खैरे यांनी म्हटले आहे.
महिन्यानुसार अतिरिक्त प्रोत्साहन द्या !
कारखान्याचा गाळप हंगाम अधिक काळ सुरू राहावा आणि ऊस अन्य कारखान्यांकडे जाण्याचे प्रमाण कमी व्हावे, यासाठी हंगामाच्या सुरुवातीपासूनच प्रोत्साहनपर दर देण्याची योजना राबवावी. त्यानुसार डिसेंबरमध्ये गाळप होणाऱ्या उसाला प्रतिटन १०० रुपये, जानेवारीत २०० रुपये, फेब्रुवारीत ३०० रुपये, तर मार्चमध्ये ४०० रुपये अतिरिक्त द्यावेत. ही रक्कम चार हजार रुपयांच्या प्रस्तावित पहिल्या उचलीव्यतिरिक्त असावी, अशी मागणी त्यांनी केली आहे.
हंगामाच्या प्रारंभापासून प्रोत्साहन दिल्यास शेतकरी आपला ऊस सोमेश्वर कारखान्याला देण्यास प्राधान्य देतील. परिणामी उसाची उपलब्धता टिकून राहून गाळपाचे नियोजन अधिक प्रभावीपणे करता येईल, असे त्यांनी स्पष्ट केले.
150 दिवसांहून अधिक गाळपाचे उद्दिष्ट ठेवा
यंदा उसाचे उत्पादन कमी असतानाही १३ ते १४ लाख टनांपेक्षा अधिक गाळपाचे उद्दिष्ट साध्य करण्यासाठी योग्य दर, वेळेवर तोडणी आणि वाहतुकीचे नियोजन आवश्यक आहे. कारखाना किमान १५० दिवस किंवा त्याहून अधिक काळ सुरू राहील, असे नियोजन करावे, असे आवाहन त्यांनी केले.
माळेगाव, छत्रपती आणि सोमेश्वर या तीन कारखान्यांच्या गाळपाची आकडेवारी, साखर उतारा, कर्जाचा बोजा आणि आर्थिक कामगिरी यांची तुलनात्मक माहिती सभासदांसमोर मांडावी. त्यासाठी श्वेतपत्रिका प्रसिद्ध करावी, अशी मागणीही करण्यात आली आहे.
तिन्ही कारखाने एकाच नेतृत्वाखाली असले तरी प्रत्येकाची आर्थिक परिस्थिती वेगळी आहे. त्यामुळे अन्य कारखान्यांच्या हितासाठी सोमेश्वरच्या शेतकऱ्यांचे नुकसान होऊ नये. सोमेश्वरचा ऊस अन्य कारखान्यांकडे वळू नये, यासाठी शेतकऱ्यांना रास्त दर, पारदर्शक वजन, वेळेवर ऊस बिल आणि तोडणीची हमी द्यावी. संचालक मंडळाने शेतकरी हिताला प्राधान्य देत चार हजार रुपये पहिली उचल आणि अतिरिक्त प्रोत्साहन रक्कम जाहीर करावी, अशी मागणी दिलीप खैरे यांनी केली आहे.
FAQ
१. सोमेश्वर साखर कारखान्याकडे कोणती मागणी करण्यात आली आहे?
ऊस उत्पादक शेतकऱ्यांना प्रतिटन किमान चार हजार रुपये पहिली उचल द्यावी, अशी मागणी करण्यात आली आहे.
२. ही मागणी कोणी केली आहे?
दिलीप खैरे यांनी ही मागणी केली आहे.
३. मागणी करण्यामागचे मुख्य कारण काय आहे?
उसाचे घटलेले उत्पादन, साखर कारखान्यांमधील वाढती स्पर्धा आणि ऊस उत्पादनाचा वाढलेला खर्च ही प्रमुख कारणे आहेत.
