पुणे जिल्हा परिषद विषय समित्यांच्या सभापतींची निवड; कुणाकुणाला मिळाली संधी?
पुणे : पुणे जिल्हा परिषद विषय समित्यांच्या निवडणुका गुरुवारी बिनविरोध पार पडत जिल्हा परिषदेच्या राजकारणात सहमतीचा सूर उमटला. यापूर्वी अध्यक्ष आणि उपाध्यक्ष निवडणुका देखील अजित पवार यांना श्रद्धांजली म्हणून बिनविरोध झाल्या होत्या. त्याच धर्तीवर विषय समित्यांची निवडणूकही एकमताने पूर्ण करण्यात आली आहे. विजयी उमेदवारांचे अभिनंदन करताना जिल्हा परिषद अध्यक्ष वीरधवल जगदाळे यांनी भाजप नेते प्रदीप कंद यांच्यावर हलक्याफुलक्या शब्दांत टोला लगावला. हे आमचे जुने सहकारी आहेत. आमचं ट्युनिंग चांगलं जमतं,” असे म्हणत त्यांनी भविष्यात एकत्रितपणे काम करण्याचा विश्वास व्यक्त केला.
निवडणूक बिनविरोध व्हावी यासाठी भाजप आणि राष्ट्रवादी काँग्रेसमधील नेत्यांमध्ये पूर्वीच चर्चा झाली होती. त्यानुसार सर्वांनी एकमताने ही निवडणूक पार पाडली. सार्वजनिक बांधकाम सभापतीपदी अमोल नलावडे, महिला व बालकल्याण सभापतीपदी अंकिता पाटील, तर समाजकल्याण सभापतीपदी जितेंद्र बडेकर, दीपाली खुलावळे यांची निवड झाली. राष्ट्रवादीचे गटनेते श्रीमंत ढोले यांनी विजयी सदस्यांचे अभिनंदन करताना विषय समित्यांमध्ये विरोधी पक्षांनाही योग्य सन्मान दिला जाईल, अशी ग्वाही दिली.
बिनविरोध निवडीची परंपरा पुढील पाच वर्षे कायम ठेवण्याचा प्रयत्न राहील, असे सांगताना जगदाळे यांनी विकासकामांसाठी सर्वांनी एकत्र काम करण्याचे आवाहन केले. विरोधी पक्षातील अनेक सदस्य हे जुने सहकारी असल्याने सभागृहात सहकार्याची भावना कायम राहील, असेही त्यांनी नमूद केले.
स्वर्गीय माजी उपमुख्यमंत्री अजितदादा पवार यांना श्रद्धांजली म्हणून बिनविरोध निवडणुका होण्याची प्रथा पडली आहे ती पुढे पाच वर्ष तशीच राहावी. विषय समित्यांच्या सभापतीपदी निवड झालेल्या सदस्यांना पुढील वाटचालीस शुभेच्छा देतो. – वीरधवल जगदाळे (पुणे जिल्हा परिषद अध्यक्ष)
दरम्यान, पुणे जिल्ह्यातील राजकारणात उत्तर आणि दक्षिण पुणे असा समतोल राखण्यात आला आहे. अध्यक्ष, उपाध्यक्ष आणि चार सभापती अशा सहा पदांपैकी प्रत्येकी तीन जागा उत्तर व दक्षिण भागाला देण्यात आल्या आहेत. लवकरच विषय समित्यांमध्ये सदस्यांची निवड प्रक्रिया सुरू होणार आहे.
अजित दादा पवार यांना श्रद्धांजली म्हणून यापूर्वी देखील जिल्हा परिषद अध्यक्ष आणि उपाध्यक्ष पदाची निवडणूक आम्ही बिनविरोध केली होती, त्याचप्रमाणे विषय समित्यांच्या सभापती पदांची निवडणूक देखील आम्ही बिनविरोध करत आहोत. – प्रदीप कंद (भाजप नेते)
.png "Videos"){kind=small}
