बावधनमध्ये महापालिकेचा बुलडोझर! पाच अनधिकृत आरएमसी प्लांटवर मोठी कारवाई

पुणे महापालिकेच्या बांधकाम विभागाने बावधन बुद्रुक परिसरातील अनधिकृत रेडी मिक्स काँक्रिट (आरएमसी) प्लांटविरोधात मंगळवारी (दि. १३ ऑक्टोबर) धडक कारवाई केली आहे.

• बावधनमध्ये महापालिकेचा बुलडोझर!
• पाच अनधिकृत आरएमसी प्लांटवर मोठी कारवाई
• वरिष्ठ अधिकाऱ्यांच्या मार्गदर्शनाखाली कारवाई

पुणे : पुण्यातून एक मोठी बातमी समोर आली आहे. पुणे महापालिकेच्या बांधकाम विभागाने बावधन बुद्रुक परिसरातील अनधिकृत रेडी मिक्स काँक्रिट (आरएमसी) प्लांटविरोधात मंगळवारी (दि. १३ ऑक्टोबर) धडक कारवाई केली आहे. या कारवाईत पाच अनधिकृत आरएमसी प्लांटमधील सुमारे ३५ हजार चौरस फुटांचे अनधिकृत बांधकाम निष्कासित करण्यात आले आहे. तसेच, या पाचही प्लांटचा वीजपुरवठा महाराष्ट्र राज्य विद्युत वितरण कंपनीच्या माध्यमातून कायमस्वरूपी बंद करण्यात आला आहे. महापालिकेच्या आकाशचिन्ह विभागाने प्लांटच्या ऑपरेटिंग रूम सील केल्याने हे प्लांट बंद करण्यात आले आहेत.

बावधनमधील पाच प्लांटवर कारवाई

बावधन बुद्रुक येथील सर्व्हे क्रमांक २२१, २२३, २२४ आणि २२५ पार्ट या परिसरात अनधिकृतपणे सुरू असलेल्या आरएमसी प्लांटवर ही कारवाई करण्यात आली. यामध्ये द मार्क इन्फ्रा (सर्व्हे क्रमांक २२३), केईसी इंटरनॅशनल लिमिटेड (सर्व्हे क्रमांक २२१/२, २२१/३, २२४/२, २२४/५), डीएनव्ही इन्फ्राकॉन एलएलपी (सर्व्हे क्रमांक २२५/२), यशाई इन्फ्रा आणि अल्ट्राटेक आरएमसी (दोन्ही सर्व्हे क्रमांक २२१/१) या पाच आस्थापनांचा समावेश आहे.

मोठ्या यंत्रणेद्वारे निष्कासन

महापालिकेच्या बांधकाम विभागाने अनधिकृत बांधकाम व अतिक्रमण विभाग आणि आकाशचिन्ह विभागाच्या समन्वयाने ही मोहीम राबवली. कारवाईसाठी नऊ जेसीबी, दोन गॅस कटर, महाराष्ट्र सुरक्षा दलाचे ६० जवान, १५ पोलीस कर्मचारी, पाच अतिक्रमण निरीक्षक आणि ४० बिगारी सेवक तैनात करण्यात आले होते.

हे सुद्धा वाचा : पोलिस ठाण्यात बोलावून दुकानदाराला दिला त्रास, गुन्ह्याची धमकी देत उकळली खंडणी; पुण्यात खळबळ

वरिष्ठ अधिकाऱ्यांच्या मार्गदर्शनाखाली कारवाई

या कारवाईदरम्यान उपआयुक्त सोमनाथ बनकर आणि कोथरूड-बावधन क्षेत्रीय कार्यालयाचे सहाय्यक आयुक्त सुहास जाधव यांनी मार्गदर्शन केले. शहर अभियंता अनिरुद्ध पावसकर आणि अधीक्षक अभियंता प्रवीण शेंडे यांच्या सूचनेनुसार बांधकाम विकास विभागाचे उपअभियंता भास्कर हांडे आणि शाखा अभियंता अजय फाले यांनी कारवाईचे नियोजन केले. संबंधित विभागांच्या पथकांनी संयुक्तपणे ही कारवाई पूर्ण केली. बावधन परिसरातील पाच आरएमसी प्लांटवर एकाच वेळी करण्यात आलेल्या या कारवाईमुळे अनधिकृत बांधकामांविरोधात महापालिकेने कठोर भूमिका घेतल्याचे स्पष्ट झाले आहे.