पिंपरी-चिंचवडकरांनो, पाणी जपून वापरा! १० टक्के पाणीकपातीला सुरुवात; अपव्यय केल्यास…; आयुक्तांनी दिला इशारा

पाण्याचा अपव्यय रोखण्यासाठी महापालिकेने कडक पावले उचलली असून, नासाडी करणाऱ्यांवर फौजदारी व दंडात्मक कारवाई करण्याचा इशारा आयुक्त डॉ. विजय सूर्यवंशी यांनी दिला आहे.

• पिंपरी-चिंचवडमध्ये १० टक्के पाणीकपात लागू.
• ३१ ऑगस्टपर्यंत पाणीकपात कायम राहणार.
• पाण्याचा अपव्यय केल्यास दंडात्मक कारवाईचा इशारा.

पिंपरी :  राज्यातील संभाव्य दुष्काळी परिस्थिती आणि धरणातील उपलब्ध साठ्याचे दीर्घकालीन नियोजन लक्षात घेऊन पिंपरी-चिंचवड शहरात कालपासून (शुक्रवार) दहा टक्के पाणीकपात लागू करण्यात आली आहे. जलसंपदा विभागाच्या आदेशानुसार ही कपात ३१ ऑगस्टपर्यंत कायम राहणार आहे. या पार्श्वभूमीवर पाण्याचा अपव्यय रोखण्यासाठी महापालिकेने कडक पावले उचलली असून, नासाडी करणाऱ्यांवर फौजदारी व दंडात्मक कारवाई करण्याचा इशारा आयुक्त डॉ. विजय सूर्यवंशी यांनी दिला आहे. दुसरीकडे, टँकरचा भुर्दंड टाळण्यासाठी शहरातील गृहनिर्माण सोसायट्यांनीही पाणीबचतीसाठी कठोर नियमावली तयार केली आहे.

 

शहरात नोव्हेंबर २०१९ पासून दिवसाआड पाणीपुरवठा सुरू आहे. पवना, आंद्रा व एमआयडीसी मिळून दररोज ६५० एमएलडी पाणीपुरवठा केला जातो. सध्या पवना व आंद्रा धरणे पूर्ण क्षमतेने भरलेली असली, तरी ‘एल निनो’च्या प्रभावामुळे भविष्यात निर्माण होणाऱ्या टंचाईवर मात करण्यासाठी राज्य शासनाने प्रतिबंधात्मक उपाय म्हणून ही १० टक्के पाणीकपात लागू केली आहे. परिणामी, शहराच्या दैनंदिन कोट्यातून सुमारे ६५ एमएलडी पाणी कमी मिळणार असून नियमित वेळेपेक्षा कमी वेळ पुरवठा होणार आहे.

महापालिकेचे कडक निर्बंध व इशारे

एसटीपी बंद असल्यास नळजोड तोडणार : मोठ्या गृहनिर्माण सोसायट्यांनी उद्याने, झाडे व स्वच्छतेसाठी सांडपाणी प्रक्रिया केंद्रातील (एसटीपी) पाण्याचाच वापर करावा. एसटीपी बंद ठेवणाऱ्या सोसायट्यांचे नळजोड कायमस्वरूपी तोडण्यात येतील.

बांधकामांसाठी पिण्याच्या पाण्यावर बंदी : बांधकाम व्यावसायिकांनी केवळ एसटीपीतील प्रक्रिया केलेले पाणी वापरावे. नदीतून बेकायदा पाणी उपसून टँकरद्वारे विक्री करणाऱ्यांवर थेट फौजदारी गुन्हे दाखल होतील.

वॉशिंग सेंटरवर पाळत : वाहने धुण्यासाठी पिण्याच्या पाण्याचा वापर करणाऱ्या सर्व्हिस सेंटरचे अनधिकृत नळजोड खंडित करून गुन्हे दाखल केले जातील. नवीन व्यावसायिक आस्थापनांना नळजोड मिळणार नाहीत.

मोटार पंपांवर जप्ती : नळाला थेट मोटार लावून पाणी खेचल्यास पंप जप्त करून दंडात्मक कारवाई केली जाईल.

सोसायट्यांचे पाणीबचतीचे नियोजन

कपातीच्या पार्श्वभूमीवर पिंपरी चिंचवड हाउसिंग सोसायटी फेडरेशन, रावेत-किवळे-मामुर्डी आणि चिखली-मोशी-चरहोली फेडरेशनने नागरिकांना काटकसरीचे आवाहन केले आहे.

हे सुद्धा वाचा : दारूच्या नशेत भरधाव कार अन् दुचाकींना धडक; कोथरुडच्या एमआयटी रस्त्यावर नेमकं काय घडलं?

फेडरेशनचे दत्तात्रेय देशमुख यांनी प्रसिद्ध केलेल्या पत्रकात पुढील मार्गदर्शक सूचना दिल्या आहेत

• वाहने धुण्यासाठी पाइपचा वापर पूर्णपणे बंद करून बादली वापरावी.
• पार्किंग, लॉबी, अंतर्गत रस्ते आणि गच्ची रोज पाण्याने धुणे टाळावे.
• सदनिकांमधील व सामाईक परिसरातील गळके नळ, फ्लश टाक्या तातडीने दुरुस्त कराव्यात.
• छतावरील टाक्या भरून पाणी वाहून जाणार नाही (ओव्हरफ्लो) याची खबरदारी घ्यावी.
• स्वच्छता व वाहन धुणाऱ्या कर्मचाऱ्यांना पाण्याचा अपव्यय टाळण्याच्या स्पष्ट सूचना द्याव्यात.

“आज वाचवलेला पाण्याचा प्रत्येक थेंब उद्याची सुरक्षितता ठरवणार आहे. नागरिकांनी शिळे पाणी फेकून न देणे, नाहक साठा न करणे आणि काटकसरीने वापर करून सहकार्य करावे. क्षेत्रीय पातळीवर विशेष भरारी पथके तैनात करण्यात आली असून अपव्यय करणाऱ्यांवर कठोर कारवाई होईल.”
— डॉ. विजय सूर्यवंशी, आयुक्त, पिंपरी-चिंचवड महापालिका.