पिंपरी-चिंचवडच्या विकासाचा ‘बूस्टर डोस’; स्थायी समितीकडून कोट्यवधींच्या विकासकामांना ‘ग्रीन सिग्नल’

पिंपरी-चिंचवड शहराच्या पायाभूत सुविधा अधिक सक्षम करण्यासाठी आणि नागरिकांना भेडसावणारे प्रलंबित प्रश्न मार्गी लावण्यासाठी महापालिकेच्या स्थायी समितीने आज महत्त्वाचे पाऊल उचलले आहे.

पिंपरी : पिंपरी-चिंचवड शहराच्या पायाभूत सुविधा अधिक सक्षम करण्यासाठी आणि नागरिकांना भेडसावणारे प्रलंबित प्रश्न मार्गी लावण्यासाठी महापालिकेच्या स्थायी समितीने आज महत्त्वाचे पाऊल उचलले आहे. स्थायी समितीच्या साप्ताहिक बैठकीत आरोग्य, पाणीपुरवठा, शिक्षण आणि रस्ते विकासाशी संबंधित विविध महत्त्वपूर्ण प्रस्तावांना प्रशासकीय मंजुरी देण्यात आली आहे.

 

पिंपरी येथील मुख्य प्रशासकीय भवनात स्थायी समितीचे सभापती अभिषेक बारणे यांच्या अध्यक्षतेखाली ही बैठक झाली. यावेळी अतिरिक्त आयुक्त विजयकुमार खोराटे, विक्रांत बगाडे, नगरसचिव मुकेश कोळप यांच्यासह विविध विभागांचे विभागप्रमुख उपस्थित होते.

पिंपरी-चिंचवड शहरातील आरोग्य व्यवस्था अधिक बळकट करण्यावर समितीने भर दिला आहे. पिंपरीतील नूतन जिजामाता रुग्णालयातील विद्युत देखभाल व दुरुस्तीच्या कामाला मंजुरी देण्यात आली आहे, ज्यामुळे रुग्णांना अखंडित सेवा मिळण्यास मदत होईल. तसेच, राष्ट्रीय आरोग्य कार्यक्रमांच्या प्रभावी अंमलबजावणीसाठी १९ टाटा सुमो वाहने दोन वर्षांसाठी भाडेतत्त्वावर घेण्याच्या प्रस्तावासही समितीने संमती दिली आहे.

पाणीपुरवठा यंत्रणेत तांत्रिक सुधारणा

शहराचा पाणीपुरवठा सुरळीत राहावा यासाठी रावेत येथील अशुद्ध जलउपसा केंद्रातील १६०० किलोवॅट क्षमतेच्या रोहित्र संच आणि ब्रेकर्सच्या दुरुस्तीचा खर्च मंजूर करण्यात आला आहे. याशिवाय: सेक्टर १० मध्ये नवीन ट्रान्सफॉर्मर व आरएमयू युनिट बसविणे. विविध पंपिंग हाऊसमध्ये तांत्रिक बिघाड टाळण्यासाठी ‘सॉफ्ट स्टार्टर’ बसविणे. थेरगाव गावठाण पंप हाऊसची क्षमता वाढवण्यासाठी आवश्यक विद्युत कामे तातडीने पूर्ण करणे.

शिक्षण आणि पायाभूत सुविधा

‘फ’ क्षेत्रीय कार्यालयांतर्गत महापालिका शाळांमधील नादुरुस्त इन्व्हर्टर व बॅटरी बदलण्याच्या कामाला मंजुरी देऊन विद्यार्थ्यांनी शैक्षणिक गैरसोय टाळण्याचा प्रयत्न केला आहे.

भूसंपादन : कासारवाडी येथील विकास योजनेतील १२ मीटर रस्त्यासाठी भूसंपादन करण्यास मान्यता.

पुनर्वसन : झोपडपट्टीधारकांच्या तात्पुरत्या निवासासाठी चिंचवड येथे ३० हजार चौरस फूट जागेवर ‘संक्रमण शिबिर’ उभारले जाणार आहे.

दुरुस्ती : प्रभाग ६ मधील रस्ते मजबुतीकरण, सांगवी-किवळे रस्त्यावरील बस थांबे दुरुस्ती आणि निगडीतील उद्यानांमधील स्थापत्य कामांना हिरवा कंदील मिळाला आहे.

पीएमपीएलची संचलन तूट

पुणे महानगर परिवहन महामंडळाच्या २०२४-२५ या आर्थिक वर्षातील संचलन तुटीच्या लेखापरीक्षण अहवालाच्या अवलोकनासाठी येणाऱ्या खर्चास समितीने प्रशासकीय मान्यता दिली आहे.

“शहराच्या हिताचे प्रकल्प कालबद्ध मर्यादेत पूर्ण करण्याच्या सूचना प्रशासनाला दिल्या आहेत. जिजामाता रुग्णालयातील कामे असोत किंवा पाणीपुरवठा यंत्रणेतील सुधारणा, नागरिकांना अखंडित सेवा देणे हेच आमचे प्राथमिक उद्दिष्ट आहे. संक्रमण शिबिरामुळे पुनर्वसनाचा प्रश्न सुटण्यास मदत होईल.” — अभिषेक बारणे (सभापती, स्थायी समिती, पिंपरी चिंचवड महानगरपालिका)

हे सुद्धा वाचा : मावळ, मुळशी, हवेलीचा चेहरामोहरा बदलणार, पीएमआरडीएकडून विकास आराखडा जाहीर; पर्यटनासाठी तब्बल…