पुरंदरच्या ग्रामसेवकांची पंचायत समितीत रंगली आखाड पार्टी, घरकुलांच्या कामाकडे दुर्लक्ष; सीईओंच्या आदेशाला केराची टोपली
सासवड : पुरंदर तालुक्यातील नागरिकांना घरकुले वेळेत मिळवीत, बांधकामे व्हावीत यासाठी जिल्हा प्रशासन आग्रही असून जिल्हा परिषदेचे अतिरिक्त मुख्य कार्यकारी अधिकारी सातत्याने पाठपुरावा करीत आहेत. घरकुले तातडीने पूर्ण करण्याचे त्यांनी नुकतेच आदेश दिले आहेत. मात्र त्यांच्या बैठकीला २४ तास होत नाहीत तोवरच ग्रामसेवकांसह सर्वच अधिकाऱ्यांनी पंचायत समितीच्या विश्रामगृहात आखाड पार्टीत दंग होत सीईओंच्या आदेशाला अक्षरशः केराची टोपली दाखवली आहे.
सध्यस्तितीत पुरंदर तालुक्यात एकूण १८८० घरकुले अपूर्ण आहेत. यामध्ये ६५३ अंतिम टप्यात असून ४३० घरकुलांचे अद्याप कामही सुरु झालेले नाहीत, उर्वरित ७९७ घरकुलांचे काम विविध टप्यावर सुरू आहे. दरम्यान घरकुलांच्या कामाबाबत जिल्हा परिषदेचे अतिरिक्त मुख्य कार्यकारी अधिकारी चंद्रकांत वाघमारे यांनी नाराजी व्यक्त केली. पुरंदर पंचायत समितीमध्ये सभापती, पदाधिकारी तसेच गटविकास अधिकारी यांच्या उपस्थितीत बैठक घेवून कामे तातडीने मार्गी लावण्याच्या ग्रामसेवक व विस्तार अधिकारी यांना सूचना केल्या.
केंद्र, राज्य आणि जिल्हा परिषद पुरस्कृत आवास योजनेतील अपूर्ण घरकुलांचा आढावा घेवून ग्रामपंचायत अधिकारी व नोडल अधिकारी यांना दर आठवड्यामध्ये अपूर्ण घरकुल यांच्या कामांना भेटी देऊन लाभार्थीच्या अडचणी व शंकांचे निरसन करणे, घरकुल कामाचे वेळेवर जिओ टॅग करणे, वेळेवर हप्ता मागणी सादर करणे, प्रलंबित मनरेगा मस्टर जलद गतीने काढण्यात यावे, कोणत्याही लाभार्थीचा हप्ता प्रलंबित राहणार नाही याची दक्षता घेवून अडचणी दूर करून मोहीम स्वरूपात काम करण्याचे आदेश वाघमारे यांनी दिले.
युनियनच्या पाठीमागे राजकीय ताकद असल्याची चर्चा
सीईओंनी आदेश दिल्यानंतर दुसऱ्या दिवशी गावोगावी ग्रामसेवक, विस्तार अधिकाऱ्यांनी भेटी देऊन पाठपुरावा करणे अपेक्षित होते. मात्र अधिकाऱ्यांच्या आदेशाला सर्वानीच अक्षरशः केराची टोपली दाखवली असल्याचे दिसून आले आहे. ग्रामसेवक युनियन व विस्तार अधिकारी युनियन कार्यकारिणीची नुकतीच निवड करण्यात आली असून नवनिर्वाचित पदाधिकारी यांचा भव्य सत्कार सोहळा पंचायत समितीच्या मुख्य इमारतीत आयोजित करण्यात आला. या दरम्यान पंचायत समितीच्या शासकीय विश्रामगृहात सर्व बाजूने कापडी कणात टाकून बंदिस्त पद्धतीने आखाड पार्टी आयोजित करण्यात आली. संपूर्ण पंचायत समिती कर्मचाऱ्यासह ग्रामसेवक मंडळी व्हेज नॉनव्हेजच्या पार्टीत व्यस्त असल्याचे पाहायला मिळाले. एवढेच नाही तर पार्टीत काही विघ्न नको म्हणून जवळच्या राजकीय पदाधिकाऱ्यांनाही पार्टीत सामील करून अडचणी दूर केल्या. यापूर्वी देखील टेकवडी येथील ग्रामसेवकांची आखाड पार्टी सर्वत्र गाजलेली होती त्यातच आता थेट पंचायत समितीतच जेवणावळी केल्याने ग्रामसेवक युनियनच्या पाठीमागे मोठी राजकीय ताकद असल्याची चर्चा सर्वत्र रंगली आहे.
पुरंदर पंचायत समितीच्या विश्रामगृहात आखाड पार्टी झाली असल्यास ग्रामसेवक युनियनच्या पदाधिकाऱ्यांची झालेल्या प्रकाराबद्दल चौकशी करणार असून, या ठिकाणी जेवणावळी घेण्यास कोणाची परवानगी घेतली? याची शहानिशा करणार आहे. यातील जबाबदार कर्मचाऱ्यावर नियमानुसार कारवाई केली जाईल. -अविनाश थोरात, प्रभारी गटविकास अधिकारी.
.png "Videos"){kind=small}
