पुणेकरांनो लक्ष द्या! 'या' दिवशी पाणीपुरवठा दिवसभर राहणार बंद
पुणे : पुणे महापालिकेच्या विविध जलशुद्धीकरण केंद्रे व पंपिंग स्टेशन येथे तातडीच्या दुरुस्ती आणि देखभाल कामांमुळे गुरुवारी (दि. १६) शहरातील बहुतांश भागात पूर्ण दिवस पाणीपुरवठा बंद ठेवण्यात येणार आहे. बुधवार रात्री १२ वाजल्यापासून ते गुरुवार रात्री १२ वाजेपर्यंत पाणीपुरवठा बंद राहणार असून, शुक्रवारी कमी दाबाने पाणीपुरवठा होणार असल्याची माहिती महापालिकेच्या पाणीपुरवठा विभागाने दिली आहे.
महापालिकेच्या पाणीपुरवठा विभागाने दुरुस्ती आणि स्थापत्य विषयक कामे हाती घेतली आहेत. यामुळे शहरातील पाणी पुरवठा हा बंद ठेवावा लागणार आहे. या बंददरम्यान नवीन व जुने पर्वती जलशुद्धीकरण केंद्र, वडगाव जलकेंद्र, वारजे जलकेंद्र, लष्कर जलकेंद्र, राजीव गांधी पंपिंग स्टेशन, खडकवासला जॅकवेल तसेच भामा-आसखेड जलकेंद्र आदी ठिकाणी विद्युत, पंपिंग व स्थापत्य विषयक तातडीची कामे हाती घेण्यात येणार आहेत.
या कामांमुळे शहरातील पर्वती, सहकारनगर, बिबवेवाडी, कात्रज, हडपसर, मुंढवा, खराडी, कोथरूड, बावधन, बाणेर, औंध, शिवाजीनगर, डेक्कन, कर्वेनगर, धायरी, सिंहगड रोड परिसर तसेच लोहगाव, विमाननगर, विश्रांतवाडी आदी उपनगरांमध्ये पाणीपुरवठा पूर्णतः बंद राहणार आहे. महापालिकेने दिलेल्या माहितीनुसार, शुक्रवारी सकाळी उशीरा आणि कमी दाबाने पाणीपुरवठा सुरू होण्याची शक्यता आहे. त्यामुळे नागरिकांनी आवश्यक तेवढा पाणीसाठा करून सहकार्य करावे, असे आवाहन प्रशासनाकडून करण्यात आले आहे.
नासाडी रोखण्यासाठी मनपाचे आवाहन
बंडगार्डन पाणीपुरवठा विभागाच्या हद्दीत येणाऱ्या विविध भागांमध्ये झोनिंगनुसार वेगवेगळ्या वेळेत पाणीपुरवठा केला जात असून, या भागांची वेळोवेळी पाहणी करण्यात येत आहे. या पाहणीदरम्यान अनेक ठिकाणी नागरिकांच्या घरातील ओव्हरहेड टाक्या ओव्हरफ्लो होत असल्याचे तसेच टाक्यांना बॉल कॉक नसल्यामुळे मोठ्या प्रमाणावर पाणी वाया जात असल्याचे आढळून आले आहे. यामुळे पिण्याच्या पाण्याची नासाडी रोखण्यासाठी पुणे महानगरपालिकेच्या बंडगार्डन पाणीपुरवठा विभागाकडून नागरिकांना महत्त्वाचे आवाहन करण्यात आले आहे. कार्यकारी अभियंता एकनाथ गोडेकर यांनी नागरिकांनी जबाबदारीने वागून पाणी वाचवण्यास सहकार्य करावे, असे आवाहन केले आहे.
.png "Videos"){kind=small}
