बाबो! पाषाणेतील गृहसंकुलात तब्बल ११ फुटांचा अजगर, रहिवाशांमध्ये उडाली खळबळ
कर्जत: कर्जत तालुक्याच्या शेवटच्या टोकाला असलेल्या पाषाणे गावातील नवीन वसाहतीमधील गॅलक्सी गृहसंकुलात तब्बल ११ फूट लांबीचा अजगर आढळून आल्याने रहिवाशांमध्ये एकच खळबळ उडाली. रात्री उशिरा हा भला मोठा अजगर इमारतीच्या तळमजल्यावर दिसल्यानंतर काही काळ रहिवाशांची मोठी धावपळ झाली.
गॅलक्सी गृहसंकुलातील केतन चौधरी, भूषण चौधरी, संगम सावंत, प्रमोद खडे आणि प्रसाद पदघमल यांना सर्वप्रथम अजगर दिसून आला. रात्री साडेअकराच्या सुमारास अजगर दिसल्याने परिसरात भीतीचे वातावरण निर्माण झाले.
अनेक रहिवासी बाहेरून येऊन या परिसरात वास्तव्यास असल्याने त्यांना मोठ्या सापाबाबत अधिक चिंता वाटू लागली. स्थानिकांनी सर्पमित्रांचे संपर्क क्रमांक शोधून त्यांच्याशी संपर्क साधण्यास सुरुवात केली. अखेर पाषाणेपासून सुमारे पाच किलोमीटर अंतरावर असलेल्या वांगणी येथील सर्पमित्रांशी संपर्क झाला. यानंतर अमित मयेकर आणि डोणे येथील मेजर राजू दुबे यांनी तातडीने पाषाणे गाठले. दोघांनी गॅलक्सी गृहसंकुलात पोहोचून परिस्थितीची पाहणी केली.
अजगर मोठ्या आकाराचा असल्याने सर्पमित्रांनी त्याबाबत वन विभागाला माहिती दिली. त्यानंतर वन विभागाच्या सहकार्याने अजगराला सुरक्षितपणे पकडण्याची मोहीम सुरू करण्यात आली. मध्यरात्री सुमारे साडेबारा वाजता अजगराला यशस्वीरीत्या पकडण्यात आले. तब्बल ११ फूट लांबीचा हा अजगर पाहून सर्पमित्रांनाही काही क्षण आश्चर्याचा धक्का बसला.
या परिसरातील जंगलांमध्ये आढळणाऱ्या अजगरांची लांबी साधारणपणे पाच ते सहा फूट असते. मात्र, गॅलक्सी गृहसंकुलात सापडलेला अजगर तब्बल ११ फूट लांब असल्याने तो विशेष लक्षवेधी ठरला. अजगराला सुरुवातीला सुरक्षित ठिकाणी ठेवण्यात आले. त्यानंतर वन विभागाचे कर्मचारी आणि सर्पमित्रांनी पुढील प्रक्रिया पूर्ण करून त्याला नैसर्गिक अधिवासात सोडण्याचा निर्णय घेतला.
अजगराला रात्री डोणे येथे सुरक्षित ठेवण्यात आले. त्यानंतर दुसऱ्या दिवशी दुपारी वन विभागाचे कर्मचारी आणि सर्पमित्रांच्या उपस्थितीत या अजगराला घनदाट जंगलात सुरक्षितपणे सोडण्यात आले. अजगराला कोणतीही इजा न करता त्याची सुटका करण्यात आल्याने स्थानिकांनी सर्पमित्र आणि वन विभागाचे आभार मानले.
दरम्यान, उल्हास नदीला आलेल्या महापुरामुळे हा अजगर जंगलातून वाहत मानवी वस्तीत आला असावा, असा अंदाज स्थानिकांकडून व्यक्त केला जात आहे. मात्र, अजगर नेमका कुठून आणि कसा गृहसंकुलापर्यंत पोहोचला, याबाबत अधिकृतपणे निश्चित माहिती समोर आलेली नाही. रहिवासी भागात एवढा मोठा अजगर आढळून आल्याने स्थानिकांमध्ये भीती निर्माण झाली होती. मात्र, सर्पमित्रांनी वेळीच घटनास्थळी पोहोचून सुरक्षित रेस्क्यू केल्याने मोठा धोका टळला.
कर्जत पळसदरी महामार्ग रस्त्याच्या कडेला महिलेचा मृतदेह, घातपाताची शक्यता
.png "Videos"){kind=small}
