SIR विरोधात रायगड काँग्रेसचा एल्गार
रायगड जिल्हा काँग्रेस कमिटीचे (दक्षिण) जिल्हाध्यक्ष राजाभाऊ ठाकूर यांच्या नेतृत्वाखाली हा मोर्चा काढण्यात आला. सकाळी ११ वाजता अलिबाग येथील बॅ. ए. आर. अंतुले भवन अर्थात काँग्रेस भवन, कर्वे रोड येथून मोर्चाला सुरुवात झाली. पक्षाचे पदाधिकारी, कार्यकर्ते आणि समर्थक मोठ्या संख्येने सहभागी झाले. घोषणाबाजी करत मोर्चेकरी जिल्हाधिकारी कार्यालयाच्या दिशेने रवाना झाले.
SIR प्रक्रियेच्या माध्यमातून मतदारांची नावे वगळली जात असल्याचा आरोप काँग्रेसने यावेळी केला. मतदार यादीतून पात्र नागरिकांची नावे चुकीच्या पद्धतीने वगळली जात आहेत का, याची स्वतंत्र चौकशी करण्यात यावी, अशी मागणी आंदोलकांनी केली. तसेच SIR प्रक्रियेत वगळण्यात आलेल्या आणि नव्याने समाविष्ट झालेल्या मतदारांची अधिकृत आकडेवारी सार्वजनिक करावी, अशी मागणीही करण्यात आली.
निवडणूक आयोगातील कथित अंतर्गत मतभेदांबाबत ‘इंडियन एक्स्प्रेस’मध्ये प्रसिद्ध झालेल्या वृत्ताचा दाखला काँग्रेसने दिला. निवडणूक आयुक्त सुखबीर सिंह संधू आणि विवेक जोशी यांनी आयोगाच्या काही निर्णयांवर औपचारिक आक्षेप नोंदविल्याचा दावा या वृत्ताच्या आधारे करण्यात आला आहे. SIR प्रक्रिया, मतदार नोंदणी-वगळणी तसेच निवडणूक आयोगाच्या IT प्रणालीशी संबंधित मुद्द्यांवरही आक्षेप नोंदविल्याचे काँग्रेसने निवेदनात म्हटले आहे. या पार्श्वभूमीवर निवडणूक आयोगाच्या निर्णयप्रक्रियेतील पारदर्शकतेवर काँग्रेसने प्रश्न उपस्थित केले. मतदार यादीतील बदलांची प्रक्रिया पारदर्शक आणि नागरिकांना पडताळता येण्याजोगी असावी, अशी भूमिका पक्षाने मांडली.
‘आपलं मत – आपला अधिकार’
‘आपलं मत – आपला अधिकार’ आणि ‘भारतीय संविधानाचे रक्षण’ या घोषणांसह काँग्रेस कार्यकर्त्यांनी आंदोलन केले. भारतीय नागरिकांच्या मतदानाच्या अधिकारावर गदा आणून लोकशाहीचा संकोच केला जात असल्याचा आरोप यावेळी काँग्रेसकडून करण्यात आला.
मुख्य निवडणूक आयुक्त ज्ञानेश कुमार यांनी आपल्या पदाचा राजीनामा द्यावा, तसेच त्यांच्या भूमिकेची स्वतंत्र चौकशी करण्यात यावी, अशी मागणी जिल्हाधिकाऱ्यांना देण्यात आलेल्या निवेदनातून करण्यात आली. SIR प्रक्रियेदरम्यान मतदारांची किती नावे वगळण्यात आली, त्यापैकी किती मतदारांनी आक्षेप नोंदविले आणि किती नावे पुन्हा मतदार यादीत समाविष्ट करण्यात आली, याची अधिकृत माहिती जाहीर करण्याची मागणीही काँग्रेसने केली.
आयोगाकडून स्पष्टीकरण
दरम्यान, निवडणूक आयोगाने या प्रकरणावर स्पष्टीकरण देताना आयोगातील प्रश्न, सूचना आणि अंतर्गत चर्चा या निर्णयप्रक्रियेचा भाग असल्याचे स्पष्ट केले आहे. तिन्ही निवडणूक आयुक्तांमध्ये संवादातून मतभेद दूर झाल्याचेही आयोगाने स्पष्ट केले आहे. त्यामुळे काँग्रेसने केलेले आरोप आणि मागण्या या पक्षाच्या राजकीय भूमिकेचा भाग असून, संबंधित बाबींवर अधिकृत नोंदी व स्वतंत्र चौकशीच्या आधारेच अंतिम निष्कर्ष निघू शकतो.
SIR प्रक्रियेवरून देशभरात राजकीय वाद सुरू असतानाच रायगडमध्ये काँग्रेसने रस्त्यावर उतरून आंदोलन केल्याने जिल्ह्यातील राजकीय वातावरणही तापले आहे. मतदार यादीतील बदल, पात्र मतदारांची नावे वगळली जाण्याची शक्यता आणि निवडणूक आयोगाच्या निर्णयप्रक्रियेतील पारदर्शकता हे मुद्दे या आंदोलनातून काँग्रेसने केंद्रस्थानी आणले आहेत.
.png "Videos"){kind=small}
