Smart Meter Protest: ‘स्मार्ट मीटर हटवा, अन्यथा उखडून फेकू’; शेकापचे जयंत पाटील यांचा सरकारला इशारा

Smart Meter Protest: स्मार्ट मीटर आणि वाढीव वीजबिलांच्या मुद्द्यावर शेतकरी कामगार पक्षाने आक्रमक भूमिका घेतली आहे. स्मार्ट मीटर हटवण्यात आले नाहीत तर ते उखडून फेकले जातील, असा इशारा शेकापचे नेते जयंत पाटील यांनी सरकारला दिला आहे. स्मार्ट मीटरमुळे वाढीव वीजबिले येत असल्याचा आरोप करत ती रद्द करण्याची मागणी त्यांनी केली.

• वाढीव वीजबिलांवरून शेकाप आक्रमक
• गणपतीनंतर रायगडात स्मार्ट मीटरविरोधात आंदोलन
• वाढीव बिले रद्द करण्याची जयंत पाटील यांची मागणी

 

भारत रांजणकर, अलिबाग: महावितरणकडून वीज वितरण व्यवस्थेत पारदर्शकता आणि अचूकता आणण्यासाठी राज्यभर स्मार्ट मीटर बसविण्याची मोहीम राबविण्यात येत आहे. मात्र, प्रत्यक्षात हे स्मार्ट मीटर ग्राहकांसाठी फायदेशीर ठरत आहे की आर्थिक फटका देत आहेत, असा प्रश्न आता राज्यभरातील अनेक वीज ग्राहकांकडून उपस्थित केला जात आहे. तर दुसरीकडे स्मार्ट मीटरच्या नावाखाली वीज ग्राहकांवर आर्थिक बोजा टाकला जात असल्याचा आरोप करत शेतकरी कामगार पक्षाने राज्य सरकार आणि महावितरणविरोधात आक्रमक भूमिका घेतली आहे. स्मार्ट मीटरची सक्ती तात्काळ बंद करावी, बसविलेले मीटर हटवावेत आणि वाढीव वीजबिले रद्द करावीत, अशी मागणी शेकापचे सरचिटणीस आमदार भाई जयंत पाटील यांनी केली.

Buldhana News: खरीप पिकांवर किडींचा प्रादुर्भाव, महिनाभरापासून पावसाची दडी; तुषार सिंचनावर पीक जगवण्याची धडपड

स्मार्ट मीटरच्या कंत्राटातील वाढीव रकमेवर प्रश्न उपस्थित करताना अदानी एनर्जी सोल्युशन्सला सुरुवातीला सुमारे १३ हजार ८८८ कोटी रुपयांचे कंत्राट देण्यात आले होते. त्यानंतर ही रक्कम जवळपास २७ हजार ७४० कोटी रुपयांपर्यंत वाढल्याचा दावा शेकापने केला. बारामती-पुणे झोनमध्ये ३ हजार ३१४ कोटींच्या टेंडरऐवजी ६ हजार २९४ कोटी रुपयांची मंजुरी आणि प्रति मीटर दर ६ हजार ३१८ वरून ११ हजार ९९८ रुपयांपर्यंत वाढल्याचा मुद्दाही पक्षाने उपस्थित केला.

स्मार्ट मीटरसह संपूर्ण योजनेसाठी ३९ हजार ६०२ कोटी रुपयांच्या खर्चाला मंजुरी असून, महावितरण कर्जाद्वारे उभारणाऱ्या निधीचा भार भविष्यात ग्राहकांवर पडणार का, असा सवाल शेकापने केला. तसेच स्मार्ट मीटरमुळे पारंपरिक मीटर रीडिंग व बिल वितरणाची कामे कमी होऊन सुमारे २५ हजार स्थानिक तरुणांच्या रोजगारावर परिणाम होण्याची शक्यताही व्यक्त केली.

सरकारने स्मार्ट मीटरचे कंत्राट, दरवाढ, ग्राहकांची बिले आणि योजनेचा आर्थिक भार याबाबत संपूर्ण हिशेब जनतेसमोर मांडावा, अशी मागणी करण्यात आली. मागण्या मान्य न झाल्यास गणपतीनंतर रायगडात आंदोलन करून स्मार्ट मीटर उखडून फेकण्याचा इशारा जयंत पाटील यांनी दिला. पुढे राज्यव्यापी आंदोलन छेडण्याचा इशाराही त्यांनी दिला.

पत्रकार परिषदेला आमदार बाळाराम पाटील, सुरेश खैरे, चित्रलेखा पाटील, ॲड. मानसी म्हात्रे, ॲड. गौतम पाटील, प्रदीप नाईक, सुरेश घरत, ॲड. साम्या कोरडे आदी उपस्थित होते.

Shivsena News : विशाखा राऊत यांचं नगरसेवक पद रद्द; सहा वर्षांची निवडणूक बंदी, ठाकरे गटाला मोठा धक्का