Raigad News: श्रीवर्धनमध्ये प्रस्तावित रस्ता रुंदीकरणाला व्यापारी-नागरिकांचा तीव्र विरोध; १३ ऑगस्टच्या सभेपूर्वी आंदोलनाचा इशारा

श्रीवर्धन शहरातील वाणी आळी बाजारपेठ परिसरातील प्रस्तावित रस्ता रुंदीकरणाचा मुद्दा आता चांगलाच तापला आहे. व्यापारी, बाधित व्यावसायिक आणि स्थानिक नागरिकांनी बैठक घेऊन या निर्णयाला विरोध करत प्रशासनासमोर आपली भूमिका स्पष्ट केली आहे.

• श्रीवर्धनमधील प्रस्तावित रस्ता रुंदीकरणाला व्यापारी आणि स्थानिक नागरिकांनी तीव्र विरोध दर्शवला.
• नगरसेवकांनाही अधिकृत माहिती नसताना १३ ऑगस्टच्या सर्वसाधारण सभेच्या अजेंड्यावर विषय आल्याने संताप व्यक्त करण्यात आला.
• नागरिकांना विश्वासात न घेता निर्णय घेतल्यास तीव्र लोकआंदोलन उभारण्याचा इशारा व्यापाऱ्यांनी दिला.

श्रीवर्धन: श्रीवर्धन शहरातील वाणी आळी बाजारपेठ परिसरातील व्यापारी, बाधित व्यावसायिक आणि स्थानिक नागरिकांची महत्त्वपूर्ण बैठक स्वप्नील पाब्रेकर यांच्या निवासस्थानी पार पडली. श्रीवर्धन शहरातील प्रस्तावित रस्ता रुंदीकरणाच्या विषयाला तीव्र विरोध व्यक्त करत या बैठकीत सविस्तर चर्चा करण्यात आली. बैठकीमध्ये या चर्चेसाठी प्रभाग क्रमांक ५, ६ आणि ७ मधील नगरसेवकांना विशेष निमंत्रित करण्यात आले होते. येत्या १३ ऑगस्ट रोजी होणाऱ्या सर्वसाधारण सभेच्या अजेंड्यावर रस्ता रुंदीकरणाचा विषय समाविष्ट करण्यात आल्याची माहिती समजताच व्यापारी व नागरिकांनी तातडीने ही बैठक बोलावली होती.

Nagpur : दूध ,खाद्यतेल आणि मसाल्यांमध्ये मोठी भेसळ ; ३.४० कोटींहून जास्त माल जप्त !

माहिती न देता महत्वाचा विषय अजेंड्यावर कसा?

मात्र बैठकीदरम्यान संबंधित नगरसेवकानीच “आम्हालाही या विषयाची कोणतीही अधिकृत माहिती नाही असे स्पष्ट केल्याने उपस्थितांमध्ये आश्चर्य आणि संताप व्यक्त करण्यात आला. बाधित नागरिक आणि स्थानिक प्रतिनिधींना माहिती न देता एवढा महत्त्वाचा विषय अजेंड्यावर कसा आला?”, असा प्रश्न उपस्थित करण्यात आला. (फोटो सौजन्य – AI Created) 

बाधित व्यावसायिक व नागरिकांची झाली बैठक

बैठकीत नागरिकांनी आठवण करून दिली की, निवडणुकीपूर्वी खासदार सुनील तटकरे आणि मंत्री आदिती तटकरे यांच्या उपस्थितीत बाधित व्यावसायिक व नागरिकांची बैठक झाली होती. त्या वेळी रस्ता रुंदीकरणाऐवजी पर्यायी रस्ता विकसित करण्याचे आश्वासन देण्यात आले होते, असा दावा बैठकीत करण्यात आला. त्यामुळे आता अचानक रस्ता रुंदीकरणाचा विषय पुन्हा पुढे येणे, तो सर्वसाधारण सभेच्या अजेंड्यावर समाविष्ट होणे, आणि त्याबाबत स्थानिक नगरसेवकांनाही माहिती नसणे, यामुळे संपूर्ण प्रकरण अधिकच गूढ बनले आहे.

निवृत्त कर्मचाऱ्यांना मोठा दिलासा! शेवटच्या वर्षातील वेतनवाढ नाकारणे चुकीचे; थकबाकी देण्याचे आदेश

…. तर तीव्र लोकआंदोलन उभारू ! व्यापाऱ्यांचा इशारा

बैठकीत उपस्थित व्यापारी आणि नागरिकांनी स्पष्ट इशारा दिला की, स्थानिक नागरिकांचा विश्वासात न घेता कोणताही निर्णय घेतल्यास तीव लोकआंदोलन उभारले जाईल. तसेच, १३ ऑगस्टच्या सर्वसाधारण सभेकडे आता संपूर्ण शहराचे लक्ष लागले असून, हा विषय नेमका कोणी, कोणत्या उद्देशाने आणि कोणाच्या सूचनेवरून अजेंड्यावर आणला, हे पाहणे महत्त्वाचे ठरणार आहे.

(डिस्क्लेमर: हे नवराष्ट्र वृत्तपत्राचे स्वयंचलित न्यूज फीड आहे. ते navarashtra.com च्या कर्मचाऱ्यांनी संपादित केलेले नाही.)